သျှမ်းပြည်တောင်ပိုင်း၊ ရွာငံမြို့နယ် တွင် စစ်ကော်မရှင် က ဖမ်ဆီးခေါ်ဆောင်သွားသော ဒေသခံ ၇ဦးကို ယနေ့အထိ ပြန်မလွှတ်ပေးသေးကြောင်း သတင်းရရှိသည်။
စစ်ကော်မရှင် ဖမ်းဆီးသွားသည့် ရွာငံမြို့နယ်တွင်နေထိုသည့် ဒေသခံ (၇)ဦးသည် အောက်တိုဘာလလယ်တွင် ဒေသခံ (၅)ဦး နှင့် နိုဝင်ဘာလ ပထမပတ်တွင် ဒေသခံ (၂)ဦး ဖြစ်ကြပြီး၊ ထိုဖမ်းဆီးခံရသည့်သူများသည် အသက် (၄၀)အရွယ်ရှိ အမျိုးသားများဖြစ်ကြကြောင်း ဒေသခံများပြောပြချက်အရ သိရသည်။
“စစ်သားတွေ အိမ်ထဲအထိ ဝင်ဆွဲသွားတယ်လို့ သိရတယ်။ ဖမ်းသွားတာ ဒီနေ့အပါ (၆) ရက်လောက်ရှိပြီ။ ဘာကြောင့်ဖမ်းသွားလဲ မသိဘူး။ နိုင်ငံရေးနဲ့လည်း ဘာမှမပတ်သက်ဘူး သူတို့ဟာ သူတို့ အေးဆေးနေတဲ့သူတွေ။ ဘာကြောင့် လာဖမ်းသွားလဲ မသိနေဘူး။”ဟု ရွာငံမြို့နယ် နွားဘန်းကျေးရွာမှ ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
အလားတူ ရွာငံမြို့နယ် တပင်ပျော်ကျေးရွာတွင်လည်း ပြီးခဲ့သည့် အောက်တိုဘာလ လယ်ခန့်က ရွာသား (၅)ဦးကို စစ်ကော်မရှင်က ဖမ်းဆီးခေါ်ဆောင်သွားပြီး ယနေ့အထိ မိသားစုနှင့် အဆက်သွယ်မရသေးပေ။
“လာ ဖမ်းသွားတာ တစ်လလောက်ရှိပြီ။ ဘာကို ဖမ်းသွားလည်း မသိဘူး။ ကြားတာကတော့ ထောင် (၁၀)နှစ် ချလိုက်ပြီလို့ ကြားတယ်။ ဘယ်ကိုခေါ်သွားမှန်း မသိတော့ မလိုက်သွားကြဘူး။ စိတ်ပူရုံကလွဲ ဘာမှ လုပ်လို့မှ မရတာ။”ဟု တပင်ကျော်ကျေးရွာဒေသခံတစ်ဉီးက ပြောသည်။
တပင်ပျော်ကျေးရွာအုပ်စု အတွင်း စစ်ကော်မရှင်တပ်စွဲထားသည့် နယ်မြေဖြစ်ပြီး၊ ၎င်းတို့သည် နီးစပ်ရာ တောတောင်ဘက်သို့ နေ့စဉ် စစ်ကြောင်းထိုးဝင်ရောက်နေကြောင်း သိရသည်။
ထို့အပြင် ရွာငံမြို့နယ် အတွင်း တစ်နှစ်သာအတွင်း ကျေးရွာအုပ်ချုပ်ရေးမှူး (၅)ဉီးထက်မနည်း အသတ်ခံနေရသည်။
Leave a Comments