သျှမ်းပြည် မိုင်းရှူးမြို့တွင် ရွှေဆိုင်တစ်ဆိုင်ကို အမည်မသိ လက်နက်ကိုင်ဆောင်သူ အမျိုးသားနှစ်ဦးက ဝင်ရောက်ဓားပြတိုက်ခဲ့ပြီး ကျပ်သိန်း ၁၀၀ ကျော်ပါသွားကြောင်း သတင်းရရှိသည်။

ယမန်နေ့ (သြဂုတ်လ ၁၂ ရက်) ညနေ ၄ ဝန်းကျင်တွင် မိုင်းရှူးမြို့ ရပ်ကွက် (၃) မြို့မဈေးအရှေ့ဘက်ရှိ ရွှေဆိုင်တစ်ဆိုင်ကို အမည်မသိ လက်နက်ကိုင်ဆောင်သူ အမျိုးသားနှစ်ဦးက သေနတ်ဖြင့်ဝင်ရောက် ဓားပြတိုက်ခဲ့ပြီး မြန်မာကျပ်ငွေ သိန်း ၁၀၀ ကျော်ပါသွားကြောင်း မိုင်းရှူးမြို့ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

“ညနေ ဆိုင်ပိတ်တဲ့အချိန်လောက် ဓားပြဝင်တိုက်တာ။ရွှေတွေကတော့ သူတို့ အိမ်မှာပြန်သိမ်းလိုက်လို့ ဆိုင်မှာရှိတဲ့ ပိုက်ဆံသိန်း ၁၀၀ ကျော်ကိုပဲ သူတို့ ယူသွားတာ။အဲ့ချိန်
လူသွား လူလာလည်း ရှိနေတယ်။ ”ဟု ၎င်းက ပြောသည်။

ပြီးခဲ့သည့် (သြဂုတ်လ ၁၂ ရက်) တွင်လည်း မိုင်းရှူးမြို့ ရပ်ကွက် (၃) မြို့မဈေး အရှေ့ဘက်ရှိ မောင်ဟိန်းရွှေဆိုင်ကို အမည်မသိ လက်နက်ကိုင်ဆောင်သူ အမျိုးသားနှစ်ဦး သေနတ်ရှည်ဖြင့်ဝင်ရောက် ဓားပြတိုက်ခဲ့သဖြင့် ရွှေ ၆၀ကျပ်သား နှင့် ငွေကျပ်သိန်း ၂၀၀ ပါသွားခဲ့သည်။

အာဏာသိမ်းပြီးနောက်ပိုင်း မိုင်းရှူးမြို့နယ်တွင် အမည်မသိ လက်နက်ကိုင်ဆောင်သူပေါများလာနေပြီး မကြာခဏ ဓါးပြတိုက်မှုများ ဖြစ်ပွားလျက်ရှိသော်လည်း သက်ဆိုင်ရာ အာဏာပိုင်းများက ဖမ်းဆီးအရေးယူ ဆောင်ရွက်နိုင်ခြင်းမရှိကြောင်း ဒေသခံများ ပြောသည်။