သျှမ်းပြည်အရှေ့ပိုင်း မိုင်းလားမြို့သို့ ‘ဝ’ပြည်သွေးစည်းညီညွတ်ရေးတပ်မတော် UWSA လက်အောက်ရှိ တရားစီရင်ရေးကော်မတီ ကိုယ်စားလှယ်အဖွဲ့ သွားရောက်ပြီး တရားစီရင်ရေး လုပ်ထုံးလုပ်နည်းများ ဆွေးနွေးခဲ့ကြကြောင်း သတင်းသိရသည်။

အမျိုးသားဒီမိုကရက်တစ်မဟာမိတ်တပ်ဖွဲ့ NDAA ၏ ဖိတ်ကြားချက်အရ UWSA လက်အောက်ခံ တရားစီရင်ရေးကော်မတီသည် NDAA လက်အောက်ခံ အထူးဒေသ(၄) ၏ နိုင်ငံရေးနှင့် ဥပဒေရေးရာ ကော်မတီတို့ တရားစီရင်ရေးလုပ်ငန်းများ တွေ့ဆုံဆွေးနွေးခဲ့ကြောင်း ယမန်နေ့ (နိုဝင်ဘာလ ၉ ရက်) တွင် UWSA ဘက်မှ သတင်းထုတ်ပြန်သည်။

အဆိုပါ တွေ့ဆုံမှုအတွင်း အခြေအနေသစ်များအောက်တွင် နှစ်ဘက်စလုံး ရင်ဆိုင်နေရသည့် တရားစီရင်ရေးလုပ်ငန်း အခွင့်အလမ်းများနှင့် စိန်ခေါ်မှုများကို အဓိကထား ဆွေးနွေးခဲ့ကြကြောင်း ထုတ်ပြန်ချက်တွင် ရေးသားထားသည်။

ထို့အပြင် နယ်စပ်ဖြတ်ကျော် ရာဇဝတ်မှုများ စုံစမ်းစစ်ဆေးရာတွင် ပူးပေါင်းဆောင်ရွက်ရေး၊ ဖမ်းဆီးထိန်းသိမ်းထားသူများနှင့် တရားရေးဆိုင်ရာ အထောက်အထားများ လွှဲပြောင်းပေးရေးကဲ့သို့ ကိစ္စရပ်များကို အသေးစိတ် ဆွေးနွေးခဲ့ကြကြောင်း ဆိုသည်။

ဥပဒေကျင့်သုံးမှုနှင့် ပတ်သက်သည့် အတွေ့အကြုံများ၊ စံပြ အမှုအခင်းများကိုလည်း ဆွေးနွေးဖလှယ်ခဲ့ကြပြီး တရားစီရင်ရေးဆိုင်ရာ လုပ်ထုံးလုပ်နည်းများ အပြန်အလှန် မျှဝေခဲ့ကြကြောင်း UWSA ၏ ဥပဒေ ပညာပေးနှင့် ပြန်ကြားရေးဌာန ထုတ်ပြန်ချက်တွင် ဖော်ပြထားသည်။

အလားတူ တရားရေးဆိုင်ရာ အကာအကွယ်ပေးမှုနှင့် နယ်စပ်ဒေသတွင် ဥပဒေရေးရာ အကူအညီပေးရေး ကိစ္စရပ်များကိုလည်း သီးသန့်ဆွေးနွေးခဲ့ပြီး ‘ဝ’ဒေသနှင့် မိုင်းလားဒေသ နှစ်ခုလုံးတွင် တရားဥပဒေစိုးမိုးရေး ခိုင်မာစေမည်ဖြစ်ကြောင်း ဆိုထားသည်။

လက်ရှိ NDAA ထိန်းချုပ် မိုင်းလားနှင့် UWSA ထိန်းချုပ် ‘ဝ’ဒေသ တို့တွင် ဖမ်းဆီးရမိသည့် အွန်လိုင်းကျားဖြန့် ငွေလိမ်လုပ်ငန်း လုပ်ကိုင်သူများကို သက်ဆိုင်ရာတပ်ဖွဲ့များက တရုတ်နိုင်ငံဘက်သို့ လွှဲပြောင်းပို့ဆောင်ပေးလျက် ရှိသည်။

ယခုနှစ်ပိုင်းအတွင်း မိုင်းလားတပ်ဖွဲ့ (NDAA) သည် တရုတ်နိုင်ငံမှ တရားစီရင်ရေး အဖွဲ့အစည်းများနှင့် ပူးပေါင်းဆောင်ရွက်သည့် ပုံမှန်ချိတ်ဆက်မှု ယန္တရားများ တည်ဆောက်ခဲ့ပြီး နယ်စပ်ဖြတ်ကျော်၍ ကျားဖြန့်လုပ်ကိုင်မှု မြင့်တက်လာခြင်းကို ထိန်းချုပ်ရာတွင် ပါဝင်ဆောင်ရွက်ခဲ့သည်ဟု နိုဝင်ဘာလ (၄) ရက်တွင် ထုတ်ပြန်ထားသည်။

ပြီးခဲ့သည့် ဩဂုတ်လ ပထမပတ်တွင် စစ်ကော်မရှင်လက်အောက်ခံ သျှမ်းပြည်နယ်အစိုးရ ကိုယ်စားလှယ်အဖွဲ့များသည် UWSA ထိန်းချုပ် ပန်ဆန်း(ပန်ခမ်း)မြို့၊ မိုင်းပေါက်မြို့နှင့် NDAA ထိန်းချုပ် မိုင်းလားမြို့သို့ သွားရောက်ပြီး ထိပ်ပိုင်းခေါင်းဆောင်များနှင့် ပညာရေး၊ ကျန်းမာရေး၊ ဒေသဖွံ့ဖြိုးရေးအပြင် ရွေးကောက်ပွဲကိစ္စများ ဆွေးနွေးခဲ့ကြောင်း သိရသည်။