သျှမ်းပြည်မြို့တော် တောင်ကြီးမြို့နယ်အတွင်း ဝင်ရောက်ယှဉ်ပြိုင်မည့် ပြည်သူ့ရှေ့ဆောင်ပါတီ (PPP) ၏ လွှတ်တော်အမတ်လောင်းနှင့် ၎င်း၏သားဖြစ်သူတို့ကို လူသတ်မှုစွဲချက်ဖြင့် စစ်ကောင်စီက ဖမ်းဆီးထားကြောင်း စုံစမ်းသိရသည်။

တောင်ကြီးမြို့နယ် အေးသာယာမြို့၊ ရပ်ကွက်(၁) နယ်မြေ (၂) တွင် နေထိုင်သည့် PPP ပါတီ၏ ပြည်နယ်လွှတ်တော် ကိုယ်စားလှယ်လောင်း ဦးစိုင်းရွှေထီး နှင့် ၎င်း၏သား စိုင်းကျော်စိုးမိုး တို့က အိမ်နီးချင်းဖြစ်သူ ဦးစိုင်းထွန်းဆာ ဆိုသူအား နိုဝင်ဘာလ ၅ ရက် နံနက်အစောပိုင်း ၂ နာရီခွဲ အချိန်ခန့်တွင် ဝိုင်းဝန်းရိုက်နှက်ရာမှ သေဆုံးသွားခဲ့ကြောင်း ဖြစ်စဉ်ကို သိရှိသူ တောင်ကြီးဒေသခံများက ပြောသည်။

“ပတ်ဝန်းကျင်က လူတွေ ပြောတာကျတော့ ကြက်ခိုးတာ မဟုတ်ဘူး။ အခု သတ်တဲ့သူနဲ့ အသတ်ခံရတဲ့သူ အိမ်က ကပ်ရပ်လေ။ ရှေ့မှာ လမ်းမကြီး၊ သူတို့နှစ်အိမ် နောက်ဘက်က လမ်းကြားသေးသေးလေး ရှိတယ်။ အသတ်ခံရတဲ့ ဦးလေးက အဲဒီဘက်ကနေ ပြန်လာတာ၊ အဲဒါကို အမတ်လောင်းရဲ့သားက သူခိုး၊ သူခိုး ဆိုပြီး အော်ကာ သူတို့သားအဖ ဝိုင်းရိုက်တာလို့လည်း ပြောကြတာ”- ဟု အေးသာယာမြို့မှ ဖြစ်စဉ်သိရှိသူ အမျိုးသားတစ်ဦးက ပြောသည်။

ပြီးခဲ့သည့် တန်ဆောင်မုန်းလပြည့်ည (မြန်မာ့ရိုးရာ ပံ့သကူပစ်ခြင်း သို့မဟုတ် သူခိုးကြီးည) တွင် တောင်ကြီးမြို့နေ PPP ပါတီ လွှတ်တော်အမတ်လောင်း ဦးစိုင်းရွှေထီးနှင့် ၎င်း၏သားဖြစ်သူ တို့သည် ကြက်ခိုးယူရန် ကြိုးပမ်းသည်ဟု အိမ်နီးချင်း အမျိုးသားတစ်ဦးကို စွပ်စွဲကာ တုတ်ဖြင့် ဝိုင်းဝန်းရိုက်နှက်ခဲ့ရာမှ လူသေဆုံးမှုအထိ ဖြစ်ပွားခဲ့ကြောင်း စစ်ကောင်စီလက်အောက်ခံ မီဒီယာများတွင် ဖော်ပြသည်။

“အဲဒီ အမတ်လောင်းရဲ့ သားကလည်း နဂိုကတည်းက ဆေးကြောင်သလို၊ အရက်ကြောင်သလို ဖြစ်နေတာ။ အရင်ကလည်း ရွာထဲက အိမ်တွေကို ကြောင်ပြီး ခဲနဲ့ လိုက်ပစ်သေးတယ်။ အဲဒီ အမတ်လောင်းသားနဲ့ အသတ်ခံရတဲ့ ဦးလေးနဲ့ကလည်း သူတို့အရင်က ဘော်ဒါတွေ။ ဘာအမှုနဲ့ အရေးယူတယ်လို့တော့ မသိဘူး၊ ဖမ်းသွားတာပဲ သိတယ်” – ဟု ဖြစ်စဉ်သိရှိသူ ၎င်းအမျိုးသားက ဆက်ပြောသည်။

စစ်ကောင်စီလက်အောက်ခံ ရဲတပ်ဖွဲ့မှ ၎င်းတို့သားအဖကို နိုဝင်ဘာလ ၅ ရက်တွင် ဖမ်းဆီးခဲ့ပြီး တောင်ကြီးမြို့၊ အေးသာယာ နယ်မြေရဲစခန်းတွင် ပုဒ်မ ၃၀၂/၁၁၄ (လူသတ်မှု၊ လူသတ်ရန် အားပေး ကူညီမှု) စွဲချက်များဖြင့် အမှုဖွင့်ကာ ချုပ်နှောင်ထားကြောင်း သိရသည်။

စစ်ကောင်စီကျင်းပမည့် ရွေးကောက်ပွဲတွင် ဝင်ရောက်ယှဉ်ပြိုင်မည့် လွှတ်တော်ကိုယ်စားလှယ် လောင်းတစ်ဦးမှ အိမ်နီးချင်းတစ်ဦးအား ရိုက်နှက်ရာမှ သေဆုံးသွားခဲ့သည့် ဖြစ်စဉ်ကြောင့် ဒေသခံများအကြား စိုးရိမ်ထိတ်လန့်မှု ဖြစ်ပွားခဲ့ပြီး ဝေဖန်မှုများလည်း မြင့်တက်နေကြောင်း တောင်ကြီးမြို့ခံများက ပြောသည်။

ဦးစိုင်းရွှေထီးသည် လာမည့်ရွေးကောက်ပွဲတွင် PPP ပါတီကိုယ်စားပြု၍ အချိုးကျ (PR) စနစ်ဖြင့် တောင်ကြီးမြို့နယ် မဲဆန္ဒနယ်အမှတ် (၁) တွင် ပြည်နယ်လွှတ်တော်ကိုယ်စားလှယ်လောင်းအဖြစ် ဝင်ရောက်ယှဉ်ပြိုင်ရန် စစ်ကောင်စီလက်အောက်ခံ UEC မှ အမည်စာရင်း ကြေညာထားသူ ဖြစ်သည်။

သို့သော် ရွေးကောက်ပွဲမတိုင်မီ လူသတ်မှုစွဲချက်ဖြင့် ဖမ်းဆီးခံထားရခြင်းကြောင့် ၎င်း၏ ကိုယ်စားလှယ်လောင်းနေရာ လစ်လပ်သွားခဲ့ပြီး ကိုယ်စားလှယ်လောင်း အမည်စာရင်း တင်သွင်းသည့် ကန့်သတ်ရက် ကျော်လွန်သွားခြင်းကြောင့် အစားထိုး၍ မရတော့ကြောင်း PPP ပါတီ ဒုဥက္ကဋ္ဌ ဦးစောဟန်အေး က မီဒီယာများတွင် ဖြေကြားထားသည်။

အခြားတစ်ဖက်တွင်လည်း PPP ပါတီဥက္ကဋ္ဌဖြစ်သူ ဒေါ်သက်သက်ခိုင် အား လွှတ်တော်ကိုယ်စားလှယ်လောင်း အဖြစ်မှ ပယ်ဖျက်ကြောင်း စစ်ကောင်စီလက်အောက်ခံ ပြည်ထောင်စုရွေးကောက်ပွဲကော်မရှင် (UEC) က အောက်တိုဘာလကုန်ပိုင်းတွင် ကြေညာခဲ့ရာ ၎င်းက အသနားခံစာ တင်သွင်းထားသော်လည်း ယနေ့အထိ ထူးခြားမှု မရှိသေးပါ။

လာမည့် ဒီဇင်ဘာလတွင် စစ်ကောင်စီ ကျင်းပမည့် ရွေးကောက်ပွဲတွင် PPP ပါတီမှ ကိုယ်စားလှယ်လောင်း ၅၀၀ ကျော်ဖြင့် နိုင်ငံတစ်ဝန်းလုံး၌ ဝင်ရောက်ယှဉ်ပြိုင်မည်ဟု သိရသည်။