သျှမ်းပြည်တောင်ပိုင်း ရွာငံမြို့နယ်၊ ကျောက်ပိဇပ်ကျေးရွာတွင် ကျေးရွာအုပ်ချုပ်ရေးမှူးနှင့် အရပ်သားတစ်ဦး အသတ်ခံရပြီးနောက် စစ်ကော်မရှင်တပ်ဖွဲ့ဝင်များက ကျေးရွာအတွင်း အဝင်အထွက်ကို တင်းကြပ်စွာ ကန့်သတ်ထားကြောင်း ဒေသခံများ ပြောပြချက်အရ သိရသည်။

အောက်တိုဘာလ ၂၈ ရက်မှစ၍ ယနေ့ (နိုဝင်ဘာလ ၄ ရက်) အထိ ရွာငံမြို့နယ်အတွင်း လှုပ်ရှားနေသည့် စစ်ကော်မရှင် တပ်ဖွဲ့ဝင်များက ကျောက်ပိဇပ်ကျေးရွာအနီး ဂိတ်ထောင်ကာ ဝင်ထွက်သွားလာသည့် ဒေသခံများအား စစ်ဆေးမှု တင်းကြပ်နေသည်။

ထို့အပြင် ထောက်ခံစာမရှိပါက သွားလာခွင့်မပြုသည့်အပြင် ခွင့်ပြုပေးသည့် ဒေသခံများအနေဖြင့်လည်း မည်သည့်အချိန် ပြန်လာမည်ကို အတိအကျ သတ်မှတ်ပေးထား ကြောင်း ဒေသခံများက သျှမ်းသံတော်ဆင့်ကို ပြောသည်။

ဒေသခံများအနေဖြင့် မဖြစ်မနေ သွားလာရန်ကိစ္စများ ကြုံလာပါက စစ်ကော်မရှင်တပ်ထံတွင် မည်သို့ သွားမည်၊ မည်သည့်အချိန် ပြန်လာမည် စသည်ဖြင့် စာတင်ရပြီး ၎င်းစစ်ကော်မရှင်တပ်သားများက ခွင့်ပြုမှသာ သွားလာခွင့်ရခြင်းကြောင့် အခက်ကြုံနေရကြောင်း ဒေသခံအမျိုးသားတစ်ဦးက ပြောသည်။

“ခြံမသွားရတော့ ဝင်ငွေမရှိဘူးလေ။ လောလောဆယ်တော့ ရှိတာလေးနဲ့ ဖြေရှင်းနေရတယ်။ စစ်တပ်က ရွာထဲမှာ တပ်စွဲထားတော့ ကြောက်နေရတယ်၊ သူတို့ရှိလဲ မလုံခြုံသလို ခံစားရတယ်” ဟု ခြံလုပ်ငန်းဖြင့် အသက်မွေးဝမ်းကြောင်းပြုနေသူ ဒေသခံအမျိုးသားတစ်ဦးက ပြောသည်။

စစ်ကော်မရှင်တပ်ဖွဲ့ဝင်များသည် ရွာငံမြို့နယ် ကျောက်ပိဇပ်ကျေးရွာအတွင်း စစ်အင်အား ၅၀ ခန့် ဖြင့် လာရောက် တပ်စွဲထားပြီး ကျေးရွာအတွင်း လှည့်လည်စစ်ဆေးခြင်း၊ ပြည်သူများကို အမှတ်မထင် ခေါ်ယူစစ်ဆေးခြင်းများ ပြုလုပ်နေကြောင်းလည်း ၎င်းဒေသခံက ဆက်ပြောသည်။

ထို့အပြင် စစ်ကော်မရှင်တပ်သားများသည် ရေဦးကျေးရွာ ဈေးအနီးတွင် ဂိတ်ချထားပြီး လမ်းသွားလမ်းလာ ပြည်သူများကို စစ်ဆေးမှုများ ပြုလုပ်နေကာ တစ်ခါတစ်ရံ ခြိမ်းခြောက် ငွေညှစ် တောင်းယူမှုများလည်း ရှိနေကြောင်း သိရသည်။

“နေ့ဘက်တော့ ဂိတ်မချထားဘူး၊ ညမှာပဲ ဂိတ်တွေချတယ်။ ညနေခင်း အလုပ်ကပြန်ချိန်ဆို သူတို့ဂိတ်မှာ အကုန်စစ်ဆေးတယ်၊ မထင်ရင် မထင်သလို ဆဲတယ်။ ငွေတောင်းတယ်၊ တစ်ခါတောင်းရင် ငါးထောင် အထက်ပဲ။ တစ်နေ့လုပ်အားမှ တစ်သောင်းပဲရတာ” ဟု နေ့စားလုပ်ရင်း အသက်မွေးနေသူ ရွာငံ ဒေသခံ တစ်ဦးက ပြောသည်။

စစ်ကော်မရှင်၏ အဆိုပါ ရေဦးကျေးရွာဈေးအနီးရှိ ဂိတ်သည် ကျောက်ပိဇပ်ကျေးရွာ အုပ်ချုပ်ရေးမှူး အသတ်ခံရပြီး နောက်ပိုင်းမှ လာရောက်ဂိတ်ချထားခြင်း ဖြစ်သည်ဟုလည်း ဒေသခံများ ပြောဆိုသည်။

ရွာငံမြို့နယ်တွင် ကျေးရွာအုပ်ချုပ်ရေးမှူး အသတ်ခံရသည့် ဖြစ်စဉ်များမှာ ယမန်နှစ် ၂၀၂၄ ခုနှစ်မှ ယခု ၂၀၂၅ ခုနှစ်အတွင်း ၅ ကြိမ်ထက်မနည်း ဖြစ်ပွားခဲ့သည်။

၂၀၂၅ အောက်တိုဘာလ ၆ ရက်တွင်လည်း ရွာငံမြို့နယ် ကျန်တောကျေးရွာ အုပ်ချုပ်ရေးမှူး ဦးဘမွှေးနှင့် မြသိန်းတန်ကျေးရွာနေ ဦးမျိုးကျော် တို့ ရွာငံမြို့ ဝက်သတ်ခုံတွင် အသတ်ခံခဲ့ရသည်။

ထို့အတူ ၂၀၂၄ ခုနှစ်၊ အောက်တိုဘာလတွင် ရွာငံမြို့နယ် သိမ်ကုန်းကျေးရွာမှ အုပ်ချုပ်ရေးမှူးနှင့် ၎င်း၏ဇနီး အသတ်ခံရပြီး ၂၀၂၄ ခုနှစ်၊ နိုဝင်ဘာလ ၂၆ ရက်တွင်လည်း ရွာငံမြို့နယ် ဘုရားကြီးကုန်းကျေးရွာ၌ အုပ်ချုပ်ရေးမှူးနှင့် အရပ်သားတစ်ဦး အသတ်ခံခဲ့ရကြောင်း သိရသည်။

လက်ရှိအချိန်တွင် ရွာငံမြို့နယ် မြောက်ဘက်ကျေးရွာများတွင် စစ်ကော်မရှင် တပ်စွဲထားပြီး အနီးအနား တောတောင်ထဲသို့ မကြာခဏ စစ်ကြောင်းထိုးကာ တော်လှန်ရေးတပ်ဖွဲ့များကို လိုက်လံရှာဖွေနေကြောင်း သိရသည်။

ရွာငံမြို့နယ်တွင် စစ်ကော်မရှင်တပ်၊ ပအိုဝ်းပြည်သူ့စစ် (PNO) တပ်နှင့် တော်လှန်ရေး တပ်ဖွဲ့များဖြစ်သည့် ဓနုပြည်နယ် အမျိုးသားလွတ်မြောက်ရေးတပ်မတော် (DSNDA) အပါအဝင် ရွာငံ PDF တပ်ဖွဲ့ စသည့် လက်နက်ကိုင်အဖွဲ့အစည်းများ ရှိနေကြသည်။