သျှမ်းပြည် တောင်ကြီးခရိုင် ဖယ်ခုံမြို့နယ်တွင် ယခုရက်သတ္တပတ်အတွင်း စစ်ကော်မရှင်တပ်၊ ပအိုဝ်းပြည်သူ့စစ် (PNO) ပူးပေါင်းတပ်နှင့် ကရင်နီတော်လှန်ရေးတပ်ပေါင်းစုတို့ တိုက်ပွဲများ ပြင်းထန်ခဲ့ပြီး နှစ်ဖက်ထိခိုက် သေဆုံးမှုများသည့်အပြင် ဒေသခံလူထုလည်း သေဆုံးမှုရှိသည်ဟု သတင်းရရှိသည်။

နိုဝင်ဘာလ ၁ ရက်မှ နိုဝင်ဘာလ ၃ ရက်နေ့အထိ ဖယ်ခုံမြို့နယ် အနောက်ဘက်ခြမ်းရှိ ဘောရန်ကျေးရွာ အနီးတဝိုက်တွင် စစ်ကော်မရှင်တပ်၊ ၎င်းလက်အောက်ခံ ပအိုဝ်းပြည်သူ့စစ် (PNO) ပူးပေါင်းတပ်တို့နှင့် ကရင်နီ တော်လှန်ရေးတပ်ပေါင်းစုတို့ နှစ်ဖက်တိုက်ပွဲ ပြင်းထန်စွာ ဖြစ်ပွားခဲ့ကြောင်း အသက် ၃၀ ဝန်းကျင်ရှိ စစ်ရေးသတင်းရင်းမြစ် တစ်ဦးက သျှမ်းသံတော်ဆင့်သို့ ပြောသည်။

“နိုဝင်ဘာ ၁ ရက် တုန်းက နှစ်ဖက်တိုက်ပွဲတွေ တအားဖြစ်တယ်။ ပြီးတော့ နိုဝင်ဘာ ၂ ရက်နေ့ ည ၇ နာရီမှာ စစ်ကြောင်းတွေ ထပ်ထိုးလာတယ်။ ၃ ရက်နေ့ မနေ့တုန်းကတော့ မနက်ကနေ ည ၅ နာရီ လောက်ထိကို တိုက်ပွဲတွေ ဖြစ်နေတာ ညလောက်မှပဲ ငြိမ်သွားတယ်” ဟု အဆိုပါ စစ်ရေးသတင်းရင်းမြစ်က ပြောသည်။

အဆိုပါ သုံးရက်တာ တိုက်ပွဲအတွင်း နှစ်ဖက်စလုံးတွင် ထိခိုက်သေဆုံးမှုများ ရှိခဲ့သည့်အပြင် အရပ်သားတစ်ဦးပါ သေဆုံးခဲ့ကြောင်း ၎င်းစစ်ရေးသတင်းအရင်းမြစ်က ဆက်လက်ပြောကြားသည်။

“ပြည်သူတစ်ယောက်က တိုက်ပွဲအတွင်းမှာ ရင်ဘက်ကို ကျည်ထိပြီး ပွဲချင်းပြီး သေတာ။ ဒီသုံးရက် အတွင်းမှာ ကျွန်တော်တို့ဘက်က ရဲဘော်တစ်ယောက် ကျတယ်။ ဒဏ်ရာရတာတွေလည်း ရှိပါတယ်။ စစ်ကောင်စီဘက်တော့ ရာထူးကြီးတဲ့ထဲက တစ်ယောက်သေတယ်။ ကျန်တာကတော့ သူတို့ လက်အောက်ငယ်သားတွေ သေတယ်” ဟု အဆိုပါ မြေပြင်သတင်းရင်းမြစ်က ရှင်းပြသည်။

လက်ရှိ ဖယ်ခုံမြို့နယ်အတွင်း ဖြစ်ပွားသည့် တိုက်ပွဲများတွင် စစ်ကော်မရှင်တပ်ဘက်မှ လက်နက်ကြီးများအပြင် ဒရုန်းများကိုပါ အသုံးပြု၍ တိုက်ခိုက်နေသည်ဟုလည်း ၎င်းစစ်ရေးသတင်းရင်းမြစ်က ပြောဆိုသည်။

ပြီးခဲ့သည့် အောက်တိုဘာလ ပထမပတ်နှင့် ဒုတိယပတ်တွင် ဖယ်ခုံမြို့နယ် အနောက်ဘက်ခြမ်းရှိ တောင်စလုံးကျေးရွာ၊ မြောက်စလုံးကျေးရွာနှင့် ဘောရန်ကျေးရွာ တစ်ကြောကို စစ်ကော်မရှင်တပ်နှင့် ပအိုဝ်းပြည်သူ့စစ် (PNO) ပူးပေါင်းစစ်ကြောင်းက စတင်ထိုးစစ်ဆင် ဝင်ရောက်ခဲ့ပြီး နေအိမ်များကို မီးရှို့ဖျက်ဆီးခဲ့သည်ဟုလည်း ဒေသခံများ ပြောပြချက်အရ သိရသည်။

စစ်ကော်မရှင်တပ်မှ ဖယ်ခုံမြို့နယ် အနောက်ဘက်ခြမ်းရှိ တောင်စလုံး၊ မြောက်စလုံးရွာ၊ ဘောရန်အပေါ်ရွာနှင့် ဘောရန်အောက်ရွာ စသည့် ကျေးရွာများကို စစ်ကြောင်းထိုးခဲ့ပြီးနောက် ဒေသခံ ၃,၀၀၀ ခန့် သည် နီးစပ်ရာ ကျေးရွာများနှင့် တောတောင်အတွင်းသို့ ထွက်ပြေးတိမ်းရှောင် နေကြရပြီး လက်ရှိအချိန်အထိလည်း စားနပ်ရိက္ခာနှင့် ဆေးဝါးအကူအညီများ လိုအပ်နေကြောင်း သိရသည်။