သျှမ်းပြည်တောင်ပိုင်း၊ ရွာငံမြို့နယ် ကျောက်ပိဇပ်ကျေးရွာတွင် အုပ်ချုပ်ရေးမှူးနှင့် အရပ်သားတစ်ဦး ထပ်မံသတ်ခံရကြောင်း သတင်းရရှိသည်။
ပြီးခဲ့သည့် အောက်တိုဘာလ ၂၈ ရက်တွင် အမည်မသိ လက်နက်ကိုင်အုပ်စုမှ ကျောက်ပိဇပ်ကျေးရွာသို့ လာရောက်ပြီး အသက် ၄၀ ကျော် အရွယ် ရွာလူကြီး ဦးတင့်ဝေ နှင့် အရပ်သား ဖြစ်သူ အသက် ၃၀ ကျော် ညီထွဋ် တို့ကို သေနတ်ဖြင့် ပစ်ခတ် သတ်ဖြတ်သွားကြောင်း အသက် ၃၀အရွယ်ရှိ ရွာငံဒေသခံ အမျိုးသမီးတစ်ဉီးက သျှမ်းသံတော်ဆင့်ကိုပြောသည်။
“ ရွာသူကြီးနဲ့ ရွာသားတစ်ဉီးအသတ်ခံရတာ။ ဘယ်အဖွဲ့က ပစ်လည်းဆိုတာတော့မသိသေးဘူး။ အခု အကုန်စစ်ဆေးနေတယ်။ စစ်ဆေးမှု တင်းကြပ်နေတယ်” ဟု ၎င်းအမျိုးသမီး တစ်ဉီး ကပြောသည်။
အဆိုပါ အသတ်ခံရသည့် ရွာသူကြီးသည် စစ်ကော်မရှင်နှင့် နီးစပ်မှုရှိသည်ဟု သိရပြီး အသတ်ခံရသည့် အရပ်သားတစ်ဦးသည် ရွာလူကြီးနှင့် ခင်မင်ရင်းနှီးသူ ဖြစ်ကြောင်း ၎င်းက ဆက်ပြောသည်။
ထိုသို့ ကျေးရွာ အုပ်ချုပ်ရေးမှူးများ အသတ်ခံရမှုများ မကြာခဏ ဖြစ်လာသောကြောင့် ကျေးရွာအတွင်း အုပ်ချုပ်ရေးမှူး လုပ်မည့်သူပင် မရှိတော့ကြောင်းနှင့် ကျေးရွာတချို့တွင်လည်း ရွာလူကြီးများ စိုးရိမ်စိတ်များဖြင့် နေနေရကြောင်း သိရသည်။
“အသတ်ခံရတဲ့ ရွာတွေမှာဆို ရွာလူကြီး လုပ်မဲ့သူတောင် မရှိတော့ဘူး။ ဘယ်သူ မလုပ်ရဲကြဘူး။ တချို့ရွာက အုပ်ချုပ်ရေးမှူးတွေလည်း လန့်နေကြတာ။ ဒီလိုပဲ အုပ်ချုပ်ရေးမှူးတွေက နှစ်ဘက်လုံး ကြောက်နေရတယ်။”ဟု ရွာငံ ဒေသခံ အမျိုးသားတစ်ဦးက ပြောသည်။
ပြီးခဲ့သည့် အောက်တိုဘာလ ၆ ရက်နေ့တွင်လည်း ရွာငံမြို့နယ် ကျန်တောကျေးရွာ အုပ်ချုပ်ရေးမှူး ဦးဘမွှေးနှင့် မြသိန်းတန်ကျေးရွာနေ ပြည်သူ့စစ် ဦးမျိုးကျော်တို့ကို ရွာငံမြို့ ဝက်သတ်ခုံတွင် အသတ်ခံခဲ့ရသည်။
ပြီးခဲ့သည့် ၂၀၂၄ ခုနှစ် အောက်တိုဘာလတွင် ရွာငံမြို့နယ် သိမ်ကုန်းကျေးရွာမှ အုပ်ချုပ်ရေးမှူးနှင့် ၎င်း၏ဇနီး အသတ်ခံရပြီး အလားတူ ၂၀၂၄ ခုနှစ် နိုဝင်ဘာလ ၂၆ ရက်နေ့တွင်လည်း ရွာငံမြို့နယ် ဘုရားကြီးကုန်းကျေးရွာ၌ အုပ်ချုပ်ရေးမှူးနှင့် အရပ်သားတစ်ဦး ထပ်မံ အသတ်ခံရကြောင်း သိရသည်။
ထို့အပြင် ပြီးခဲ့သည့် အောက်တိုဘာလ ၃၀ရက်နေ့တွင် ရွာငံမြို့နယ် ရနဲကျေးရွာအုပ်စု အနီးတွင် ရိတ်ခါလာရောက် ပို့ဆောင်သော အင်အား ၂၀ ဝန်းကျင် ပါသည့် စစ်ကော်မရှင် စစ်ကြောင်းကို ဓနုပြည်နယ် အမျိုးသား လွတ်မြောက်ရေးတပ်မတော် DSNDA တို့ ကြားဖြတ်တိုက်ခိုက်ရာ စစ်ကော်မရှင်ဘက်မှ ၂ဦးကျဆုံးကြောင်း DSNDAမှ နိုဝင်ဘာလ ၁ ရက်စွဲဖြင့် ထုတ်ပြန်လာသည်။
ယခုလက်ရှိရွာငံတွင် စစ်ကော်မရှင်မှ မကြာခဏ စစ်ကြောင်းထိုးနေပြီး ပြည်သူများကိုလည်း အစစ်ဆေးတင်းကျပ်နေကြောင်း သိရသည်။
Leave a Comments