သျှမ်း-ကရင်နီ(ကယား)နယ်စပ် ဖယ်ခုံမြို့တွင် နေရပ်ပြန် စစ်ရှောင်များ လုံခြုံမှုမရှိသောကြောင့် ဘုန်းကြီးကျောင်းတွင် ရွှေ့ပြောင်းအိပ်နေရကြောင်း သတင်းရရှိသည်။

ကရင်နီတော်လှန်ရေးတပ်များ ထိန်းချုပ်ထားသည့် ဖယ်ခုံမြို့ နှင့် မိုးဗြဲမြို့ကို စစ်ကောင်စီက ပြီးခဲ့သည့် ဇူလိုင်လ ပထမပတ်အတွင်းတွင် ပြန်လည်ထိန်းချုပ်နိုင်ခဲ့သည်။

ဖယ်ခုံအရှေ့ခြမ်းကို စစ်ကော်မရှင်တပ်က ထိန်းချုပ်ပြီး စစ်ရှောင်များ ယခုနှစ် ဇူလိုင် ၇ရက်တွင် နေရပ်ပြန်နေထိုင်ခဲ့ကြသည်။

ထိုသို့ စစ်ရှောင်များ နေရပ်ပြန်လာခဲ့ကြသော်လည်း လက်နက်ကြီးသံများ မကြာခဏကြားရခြင်း၊ စစ်ကော်မရှင်တပ်နှင့် ပအိုဝ်းပြည်သူ့စစ် PNO တပ်သားများက ကျေးရွာအတွင်း တပ်စွဲထားသောကြောင့် စိတ်လုံခြုံမှု မရှိသည့်အတွက် ဘုန်းကြီးကျောင်းသို့ ပြောင်းရွှေ့အိပ်နေရကြောင်း ဖယ်ခုံမြို့ ဒေသခံအမျိုးသမီးတစ်ဉီးကပြောသည်။

“နေရပ် ပြန် လာပေမဲ့လည်း စိတ်ပူရသေးတယ်။ မလုံခြုံသေးဘူး။ ညညဆို လက်နက်ကြီးသံတို့ကြားရတယ်၊ စစ်တပ်ဘက်ကလည်း ရွာထဲမှာ ရှိတော့ ကြောက်နေရတယ်။မြေမြုပ်မိုင်းတွေလည်း မရှင်းပေးသေးတော့ တောခြံတွေလည်း သိပ်မသွားရဲဘူး။” ဟု ၎င်းက ပြောသည်။

ထို့အပြင် ဖယ်ခုံအနောက်ခြမ်းဖြစ်သည့် တောင်စလုံးရွာ၊ မြောက်စလုံးရွာ ဘက်တွင် စစ်ကော်မရှင်တပ်၊ PNO ပူးပေါင်းတပ်နှင့် ကရင်နီအမျိုးသားကာကွယ်ရေး တပ်ဖွဲ့ KNDFတို့ တိုက်ပွဲဖြစ်ပွားနေသောကြောင့် ဖယ်ခုံမြို့ အရှေ့ခြမ်း အဝင်ထွက်များကို စစ်ကော်မရှင်က တင်းကြပ်ထားကြောင်း သိရသည်။

ဆက်လက်ပြီး ဖယ်ခုံအရှေ့ခြမ်းတွင် စစ်ကော်မရှင်တပ်က ပြန်လည်ထိန်းချုပ်ထားသော်လည်း ပြည်သူများ လျှပ်စစ်မီးမရရှိဘဲ အစိုးရ ဝန်ထမ်းများသာ လျှပ်စစ်မီး ရရှိနေကြောင်း သိရသည်။

“စစ်ကော်မရှင်က မီးပေးတယ်ဆိုရင် သူတို့လက်အောက်က ဝန်ထမ်းတွေပဲ ပေးတာ။ ပြည်သူတွေက မီးယူမယ်ဆိုရင် တစ်လ ကျပ်ငါးသောင်းပေးရမယ်ပြောတယ်။ စစ်ရှောင်ပြီး ပြန်လာတာ မကြာသေးတော့ ရှာစားလို့လည်း မရ ၊တစ်လ ကျပ်ငါးသောင်းဆို မတတ်နိုင်ဘူး။”ဟု ဖယ်ခုံ ဒေသခံ အသက် ၄၀ ဝန်းကျင် အမျိုးသားတစ်ဦးက ပြောသည်။

အဆိုပါ နေရပြန် စစ်ရှောင်များသည် တစ်လ ငွေကျပ် ငါးသောင်း ပေးပြီး လျှပ်စစ်မီးသုံးစွဲရန် မတတ်နိုင်သောကြောင့် ဆိုလာ ဘယ်ထရီ မီးကိုသာလျှင် အသုံးပြုနေရကြောင်း ၎င်းက ဆက်ပြောသည်။

ပြီးခဲ့သည့် ဩဂုတ်လ ၁၈ ရက်တွင် ဖယ်ခုံမြို့ အရှေ့ဘက်ကမ်းရှိ အခြေခံပညာအလယ်တန်းနှင့် အထက်တန်းကျောင်းကို စစ်ကော်မရှင်လက်အောက်ခံ ပညာရေးဝန်ထမ်း များကို ပြန်ခေါ်ပြီး ကျောင်းပြန်လည် ဖွင့်ခဲ့သည်။

ဖယ်ခုံမြို့နယ် လွယ်ပေါ၊ နမ့်ပေါ်လုံ၊ ဆောင်နန်းခဲ၊ လဟယ်၊ မခေခမ်း၊ ပိန္နဲကုန်း၊ နားဟီး၊ အုံတိုင်း၊ ဘန့်ခူး၊ နားကုန်း၊ ကာလရှေ့၊ ညောင်မွန်း၊ တောင်ပို့ကြီး၊ ဆင်ဖြူ၊ ငါးမူးနှင့် ညောင်ရွှေမြို့နယ် တောင်ပို့ကွဲ၊ စန့်စွဲ၊ စန့်လိတ်၊ လွယ်လုံရွာမှ စစ်ဘေးရှောင်ဦးရေ တစ်သောင်းခန့် နေရပ်တွင် ပြန်နေကြပြီး ပြန်လည်ထူထောင်ရေးလုပ်ငန်းတွင်လည်း အကူညီများလိုအပ်နေကြကြောင်း သိရသည်။