သျှမ်းပြည် တောင်ကြီးမြို့နယ်တွင် ယမ်းပေါက်ကွဲမှုကြောင့် အမျိုးသမီး ၁ ဦးသေဆုံးပြီး ၂ ဦးဒဏ်ရာ ရရှိခဲ့ကြောင်း သတင်းသိရှိရသည်။
ယနေ့ အောက်တိုဘာလ ၂၈ ရက် နံနက် ၉ နာရီဝန်းကျင်တွင် တောင်ကြီးမြို့နယ် ဖါမွန်းကျေးရွာအုပ်စု ကောင်ရွေးရွာတွင် မီးရှူးမီးပန်းများ ပြုလုပ်နေစဉ် ပေါက်ကွဲမှုဖြစ်ပွားပြီး အမျိုးသမီး ၁ ဦးသေဆုံးကာ ၂ ဦး ဒဏ်ရာပြင်းထန်စွာရရှိခဲ့ကြောင်း တောင်ကြီးမြို့ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“ဖြစ်စဉ်က မနက်တုန်းက ယမ်းထောင်းရင်းနဲ့ ပေါက်ကွဲကာ။ မီးလောင်ပြီးတော့ အမျိုးသမီးတစ်ယောက်က ဆုံးသွားတယ်။ နှစ်ယောက်က ခြေ နဲ့ လက်မှာ မီးဒဏ်ရာနဲ့ဆေးရုံ့ပို့ထားရတယ်”ဟု ၎င်းက ပြောသည်။
သေဆုံးသွားသူမှာ အသက် ၄၀ နှစ်ဝန်းကျင် အရွယ်ရှိ အမျိုးသမီးတစ်ဦးဖြစ်ပြီး လက်ရှိ ထိခိုက်ဒဏ်ရာရရှိသူ ၂ ဦးကို တောင်ကြီးမြို့ စဝ်စံထွန်းဆေးရုံသို့ ပို့ဆောင်ထားကြောင်း သိရသည်။
တောင်ကြီးမြို့ တန်ဆောင်တိုင် မီးပုံးပျံပွဲတော်သည် ယမန်နေ့ အောက်တိုဘာလ ၂၇ ရက်နေ့မှစတင်၍ မီးပုံးပျံနေ့လွှတ် အရုပ်များကို စတင်လွှတ်တင်နေခြင်းဖြစ်ပြီး ပထမရက်တွင် နေ့လွှတ်အရုပ် မီးပုံးပျံပေါင်း အလုံး ၃၀ လွှတ်တင်ပေးခဲ့ကြောင်း သိရသည်။
ယနှစ်တွင် ညလွှတ်မီးပုံးပျံ စာရင်းများမှာ စိန်နားပန် ၃၇ လုံး၊ ၂၂ ပေ ၂၅ လုံး၊ ၂၅ ပေ ၁၈ လုံး စုစုပေါင်း ညလွှတ် အလုံး ၈၀ ကျော်လွှတ်တင်မည်ဖြစ်ကြောင်းသိရသည်။
ထိုသို့ တန်ဆောင်တိုင် မီးပုံးပျံပွဲတော် ကာလအတွင်း မီးရှူးမီးပန်းများကို ပြုလုပ်ရာမှ မတော်တဆ ပေါက်ကွဲမှုများ ဖြစ်ပွားခဲ့ခြင်းဖြစ်ကြောင်း ဒေသခံများက ပြောသည်။
ပြီးခဲ့သည့် ၂၀၂၄ မေလအတွင်းတွင်လည်း အောက်ပန်းမြို့ ရပ်ကွက် (၃) နယ်မြေ (၉)တွင် မီးပုံးပြုလုပ်ရန် ယမ်းထောင်စဉ် မတော်မဆပေါက်ကွဲမှုဖြစ်ပွားခဲ့ပြီ အမျိုးသား ၂ ဦးသေဆုံးခဲ့ပြီး ထိခိုက်ဒဏ်ရာပြင်းထန်သူများ ရှိခဲ့ကြောင်း သိရသည်။
Leave a Comments