သျှမ်းပြည်တောင်ကြီးမြို့တွင် အုပ်စုဖွဲ့ကာ နည်းမျိုးစုံသုံးပြီ ငွေလိမ်လည်မှုများရှိနေကြောင်း သတင်းရရှိသည်။

တောင်ကြီးမြို့တွင် ယခုရက်ပိုင်း အမျိုးသား၃ဦးဖွဲ့ကာ ရပ်ကွက်ထဲသို့ ဝင်ရောက်လာပြီး ကုန်စုံဆိုင်နှင့် နေအိမ်များကို လိုက်လံ လိမ်လည်မှုများပြုလုပ်ပြီး၊ ၎င်းတို့တောင်းဆိုသည့် ငွေကြေးမရရှိလျှင် ဓားထောက်ခြိမ်းခြောက်သည့် အထိ ပြုလုပ်နေကြောင်း ကိုယ်တိုင်ကြုံတွေ့ရသည့် မြေဖြူရပ်ကွက် ဒေသခံအမျိုးသားတစ်ဉီးက သျှမ်းသံတော်ဆင့်ကိုပြောသည်။

“အမျိုးသား၃ယောက်က အိမ်ထဲကို အတင်းပြီးပြီး ဆေးသုတ်သွားတာ၊ တားလည်းမရဘူး။ နောက် ငွေ ၃သိန်းတောင်တော့ စကားများကြသေးတယ်။ သူတို့မှာ ဓားပါလာတော့ ဓားနဲ့ခြိမ်းခြောက်လို့ ငွေကျပ် ၅သောင်းနဲ့ပြီးသွားတယ်” ဟု ကိုယ်တိုင်ကြုံတွေ့ရသည့် အမျိုးသားက ဆိုသည်။

အဆိုပါ အုပ်စုဖွဲ့ ငွေလိမ်သူများသည် မြေဖြူရပ်ကွက်၊ ညောင်ဖြူစခန်းရပ်ကွက်၊ မင်္ဂလာဦးရပ်ကွက်တွင် လိုက်လံလိမ်လည်ခဲ့ပြီး၊ အဓိကအားဖြင့် သက်ကြီးရွယ်အိုများရှိသည့်နေအိမ်ကို ပစ်မှတ်ထား လိမ်လည်နေကြောင်း သိရသည်။

ထိုသူများသည် အခြားရပ်ကွက်များတွင် ထီလက်မှတ်ရောင်းချခြင်း၊ ဖုန်းငွေဖြည့်ကဒ်ရောင်းသည်ဟု ဆိုပြီး အတင်းအဓမ္မလိမ်လည်သွားခြင်းကို ပြုလုပ်သေးကြောင်း တောင်ကြီးမြို့ပေါ်တွင် ဖွင့်လှစ်ထားသည့် ကုန်စုံဆိုင် မှ အမျိုးသမီးတစ်ဉီးက သျှမ်းသံတော်ဆင့်ကိုပြောသည်။

“ ကျမတို့ဆီမှာတော့က အသင့်ပါတဲ့ ခဲပြန်အုပ်ထားတဲ့ ငွေဖြည့်ကဒ်နဲ့ ကျမတို့ဆီက ငွေဖြည့်ကဒ်အသစ်နဲ့လဲသွားတာ။ နောက် ဘီယာဗူးအဟောင်းရေဖြည့်ထားတာနဲ့ ဘီယာဗူးအဟောင်းလဲသွားတာ ငွေစက္ကူအတုနဲ့အစစ်တွေလဲတာတွေ ရောလုပ်တယ်။” ဟု ၎င်းအမျိုးသမီးက ကြုံတွေ့ခဲ့ရသည့် အကြောင်းကိုပြောသည်။

စစ်အာဏာသိမ်းပြီးနောက် တောင်ကြီးမြို့တွင် လူမျိုးပေါင်းစုံ ရွှေ့ပြောင်းရောက်ရှိနေထိုင်လာပြီး ခိုးဆိုးလုယက်မှုများ၊နည်းမျိုးစုံသုံ ငွေလိမ်လည်မှုများ၊ ဓားပြတိုက်မှုများတို့ ကြုံတွေ့လာရသည်။

တောင်ကြီးမြို့အတွင်းသို့ လွိုင်ကော်မြို့နယ်၊ ပင်လောင်းမြို့နယ်၊ ဆီဆိုင်မြို့နယ်နှင့် သျှမ်းပြည်မြောက်ပိုင်း သိန္နီ၊ လားရှိုး၊ ကျောက်မဲ၊ သီပေါမြို့နယ်ဘက်မှ စစ်ဘေးရှောင်များအပြင် မြေပြန့်ဒေသဘက်မှ တက်လာသည့် စစ်ဘေးရှောင်များလည်း ရှိကြောင်း သိရသည်။

တောင်ကြီးမြို့သည် စစ်ကော်မရှင်တပ် အရှေ့ပိုင်းတိုင်း စစ်ဌာနချုပ် အခြေစိုက်သည့် ဒေသဖြစ်သော်လည်း လက်ရှိတွင် ဒုစရိုက်သမားပေါများသည့် ဒေသတစ်ခုဖြစ်နေသည်။