သျှမ်းပြည် တောင်ကြီးမြို့တွင် သက်တမ်းကုန်ဆုံးသည့် စားသောက်ကုန်များကို ရက်စွဲပြန်လည်ပြင်ဆင်ပြီး ရောင်းချနေကြောင်း ကိုယ်တိုင်ကြုံတွေ့သည့် စျေးဝယ်သူများက ပြောသည်။

စစ်တပ် အာဏာသိမ်းပြီးနောက် လမ်းပန်းဆက်သွယ်ရေး အခက်အခဲနှင့်အတူ စစ်ကော်မရှင်က နယ်စပ်ဒေသမှ တင်သွင်းသည့် ကုန်ပစ္စည်းများကို စစ်ဆေးတင်းကြပ်ခြင်း၊ ပိတ်ပင်ထားခြင်းတို့ကြောင့် သျှမ်းပြည်တောင်ပိုင်းတွင် ကုန်ပစ္စည်းပြတ်လပ်မှုများ ဖြစ်ပေါ်လာသည်။

ထိုသို့ ကုန်ပစ္စည်းပြတ်လပ်ခြင်းများ ကြုံလာသည့်အခါ ကျန်ရှိနေသည့် ရက်စွဲကုန်ဆုံးနေသော သက်တမ်းလွန် စားသောက်ကုန်များကို ဆိုင်ရှင်များက ရက်စွဲပြန်လည်ပြင်ဆင်ပြီး ရောင်းချနေခြင်းကြောင့် စားသုံးသူများမှာ စိတ်ချစွာ မစားသုံးရဲတော့ကြောင်း တောင်ကြီး မြို့ခံများက သျှမ်းသံတော်ဆင့်ကို ပြောသည်။

“တစ်ခုခုဝယ်ရင် ရက်စွဲ သေချာကြည့်ဝယ်တာ။ တချို့ မုန့်တွေဆို မှိုတက်နေပြီ၊ ရက်စွဲက ဒီလမှ ထုတ်ထားပြီး နောက်သုံးနှစ်မှ ကုန်မယ် ရေးထားတာ။ ယုံတောင် မယုံနိုင်ဘူး၊ ကုန်ပစ္စည်းတွေလည်း ပြတ်တော့ ကျန်တဲ့ သက်တမ်းကုန် ပစ္စည်းတွေကို ရောင်းတာနေမှာ”ဟု တောင်ကြီး ဒေသခံ အမျိုးသမီးတစ်ဦးက ပြောသည်။

ထို့အပြင် လူကြီးမိဘများနှင့် ကလေးသူငယ်များက ရက်စွဲများကို မကြည့်တတ်သောကြောင့် ပို၍ စိုးရိမ်စရာ ဖြစ်လာပြီး သက်တမ်းကုန်ဆုံးနေသော မုန့်များ စားမိလျှင် ရောဂါဖြစ်လာမည်ကို စိုးရိမ်နေရကြောင်း ၎င်းက ဆက်ပြောသည်။

ဆက်လက်ပြီး စားသောက်ကုန်များသာမက ဆေးဝါးများလည်း သက်တမ်းလွန် ကုန်ဆုံးနေသောကြောင့် ဆေးဝယ်သောက်ရာတွင် ဂရုတစိုက် ကြည့်သင့်ကြောင်းနှင့် ကျန်းမာရေး တစုံတရာ ဖြစ်ခဲ့လျှင် ဆေးရုံကြီးများထံတွင် ဆေးဝယ်သင့်ကြောင်း တောင်ကြီးဒေသခံ အသက် ၂၀ ကျော်အရွယ်ရှိ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

“စက်တင်ဘာလ နောက်ဆုံးပတ်က အမေ နေမကောင်းလို့ ဆေးသွားဝယ်တာ အိမ်ပြန်ရောက်မှ ရက်စွဲကြည့်တော့ လွန်ခဲ့တဲ့ ငါးလလောက်ကတည်းက ကုန်ဆုံးနေတာ။ အဲဒါနဲ့ ဆေးလည်း မတိုက်လိုက်ရဘူး။ နောက်နေ့မှ ဆေးခန်းတွေ မဟုတ်ဘဲ ဆေးရုံဆီ တိုက်ရိုက် သွားပြပေးရတာ။ တော်သေးတယ် ရက်စွဲကုန်နေတဲ့ ဆေးမစားမိလိုက်လို့၊ စားမိရင် ဘာတွေ ဖြစ်လာမလဲ မသိဘူး”ဟု အဆိုပါ တောင်ကြီးမြို့ခံ အမျိုးသမီးက ပြောသည်။

တောင်ကြီးမြို့ပေါ်တွင်သာမက ကျေးရွာဘက်တွင်လည်း စားသောက်ကုန် ဝယ်ယူရာတွင် သက်တမ်းကုန်ဆုံးရက် ကြည့်လေ့မရှိသောကြောင့် ရေရှည် ကျန်းမာရေး ထိခိုက်လာနိုင်၍ ဆိုင်ရှင်များအနေဖြင့် သက်တမ်းကုန်ဆုံးနေသည့် ကုန်ပစ္စည်းများကို မရောင်းချရန် လိုအပ်ကြောင်း ၎င်းအမျိုးသမီးက ပြောဆိုသည်။

လက်ရှိတွင် သက်တမ်းကုန်ပစ္စည်းများနှင့် ဆေးဝါးများကို ရွာငံ၊ အောင်ပန်း၊ ပင်းတယ၊ ဟိုပုံးနှင့် ဆီဆိုင်မြို့နယ် ဘက်တွင်လည်း ရက်စွဲပြန်လည်ပြုပြင် ရောင်းချမှုများ ရှိနေကြကြောင်း ဒေသခံများက ပြောသည်။