သျှမ်းပြည်တောင်ပိုင်း၊ တောင်ကြီးမြို့ ၊မြို့မရပ်ကွက် စဝ်စံထွန်းလမ်းထဲတွင် အသတ်ခံထားရသည့် သက်လတ်ပိုင်းအရွယ် အမျိုးသားအလောင်း တစ်လောင်းတွေ့ရှိကြောင်း သတင်းရရှိသည်။
ဖြစ်စဉ်မှာ ယမန်နေ့ အောက်တိုဘာလ ၁၆ရက်နေ့ ည ၁၁ နာရီအချိန်တွင် မြိုမရပ်ကွက် စဝ်စံထွန်းလမ်းထဲတွင် အသတ်ခံထားရသည့် သက်လတ်ပိုင်းအရွယ် အမျိုးသားအလောင်းကို ကားတစ်စီးဖြင့်လာပစ်ချသွားခဲ့ပြီး အဆိုပါ အမျိုးသားရုပ်အလောင်းကို အမှတ် ၁နှင့်၂ ရဲစခန်းမှ ညတွင်းချင်း မှတ်တမ်းယူကာ စဝ်စံထွန်းဆေးရုံသို့ ပို့ဆောင်ခဲ့ကြောင်းသိရသည်။
“သေဆုံးနေတဲ့ အမျိုးသားအလောင်းမှာ နားရွက်တစ်ဖက်လည်း မရှိတော့ဘူး။ ကြိုးတုတ်ထားတဲ့ အရာတွေလည်း တွေ့တယ်၊ မီးလောင်ထားတဲ့ ဒဏ်ရာတွေကော၊ ဓားနဲ့ ထိုးသွင်းထားတဲ့ ဒဏ်ရာတွေကော ကြောက်ဖို့ကောင်းတယ်။”ဟု တောင်ကြီးဒေသခံ အမျိုးသမီးတစ်ဦးက ပြောသည်။
ယနေ့ အောက်တိုဘာလ ၁၇ ရက်နေ့ နေ့လည်ပိုင်းအချိန်တွင် အမှတ်၁ နှင့်၂ ရဲစခန်းမှာ စိန်ပန်းရဲဌာန ရုံးမှတဆင့် စီစီတီ ဗွီမှတ်တမ်းမှ ခြေရာခံလိုက်နေပြီး ကားနှင့် လာချသွားသည့် တရားခံကို ရှာဖွေမတွေ့ရှိသေးကြောင်း သိရသည်။
ယခင်က လူသတ်အလောင်းစွန့်ပစ်မှု ဖြစ်ရပ်မျိုးသည် နယ်စပ်ဒေသတွင်သာ အဖြစ်များခဲ့ပြီး တောင်ကြီးတွင် ဖြစ်လေ့ဖြစ်ထ မရှိခဲ့ဖူးကြောင်း ဒေသခံများက ပြောသည်။
“လမ်းထိပ်သွားရင်တောင် ဂရုစိုက်ပြီး သွားလာသင့်တယ်။ခေတ်ကာလက အရင်လိုမကောင်းတော့ဘူး။ တောင်ကြီးမှာက လူစုံလာတော့ ပိုဆိုးတာပေါ့၊အရင်လို မအေးချမ်းတော့ဘူး။”ဟု ဒေသခံ အသက် ၅၀ ဝန်းကျင် အမျိုးသမီးတစ်ဦးက သျှမ်းသံတော်ဆင့်ကို ပြောသည်။
အလားတူ ယနေ့ (အောက်တိုဘာလ ၁၇) ရက်နေ့မနက်ပိုင်းတွင်လည်း အောင်ပန်းမြို့အဝင် မင်္ဂလာကန်တွင် အသက် ၂၅ နှစ်အရွယ် ကိုထက်ကျော်၏ ရုပ်အလောင်းကိုတွေ့ရှိခဲ့သည်ဟု သိရသည်။
အဆိုပါ ကိုထက်ကျော်သည် အောင်ပန်းမြို့ ညောင်ပင်ထောင် ရပ်ကွက်မှ လူငယ်တစ်ဦးဖြစ်ပီး ပျောက်ဆုံးနေသည်မှာ သုံးရက်ရှိပြီဖြစ်ကာ ယခုကဲ့သို့ သေဆုံးလျက်ပြန်လည်တွေ့ရှိရသည်ဟု သိရသည်။
ယခုလက်ရှိတောင်ကြီးမြို့တွင် ခိုးဆိုးလုယက်မှုများ နေ့စဉ်နှင့်အမျှ ခပ်စိပ်စိပ်ဖြစ်လာပြီး လုယက်မှု ၊ ပြန်ပေးဆွဲမှုများပါ မကြာခဏ ကြားလာရသောကြောင့် အများပြည်သူများ အသွားလာဂရုစိုက်သင့်ကြောင်း ဒေသခံများက အသိပေးတိုက်တွန်းထားသည်။
Leave a Comments