သျှမ်းပြည် မူဆယ်မြို့တွင် စစ်ကောင်စီတပ်နှင့် လက်အောက်ခံရဲတပ်ဖွဲ့တို့ တစ်နှစ်ကျော်ကာလအတွင်း ဖမ်းဆီးထားသည့် ကျားဖြန်လုပ်ကိုင်သူ (၆၀၀)ကျော်ကို ယနေ့ (အောက်တိုဘာ ၁၆)ရက်တွင် ပြန်လွှတ်ပေးကြောင်းသတင်းရရှိသည်။

ထိုပြန်လွှတ်လာသည့် ကျားဖြန်သမားများသည် ပြီးခဲ့သည့် ၂၀၂၄ နှစ်အစပိုင်း နှင့် နှစ် လယ်ပိုင်းတွင် စစ်ကောင်စီတပ်သားနှင့် ရဲတပ်ဖွဲ့တို့က ဖမ်းဆီးထားသူများဖြစ်သည်။

“အခုပြန်လွှတ်လာတဲ့သူတွေက မြန်မာနိုင်ငံသားတွေပါပဲ။ တခါလွှတ်ရင် အယောက် ၄၀ ယောက်ရှိမယ်။ ရဲစခန်းကနေ လမ်းလျှောက်ထွက်လာတာ။ ပြောတာတော့ ၆၀၀ကျော် လွှတ်မယ်လို့သိရတယ်” ဟု မူဆယ်မြို့ ဒေသခံ အမျိုးသားတစ်ဉီး ပြောသည်။

ယနေ့ (အောက်တိုဘာ ၁၆)ရက် အချုပ်ထဲမှ ထွက်လာသည့် ကျားဖြန့်သမားအချို့သည် တနှစ်ကျော် ချုပ်နှောင်ခံရပြီး၊ အချို့သည် ရှစ်လခန့်သာ ချုပ်နှောင်ခံရကြောင်းသိရသည်။

ထိုအွန်လိုင်းကျားဖြန့် ငွေလိမ်ဂိုဏ်းတွင် အလုပ်လုပ်ကိုင်သူများသည့် မူဆယ်မြို့ရှိ ရဲစခန်းတွင် ၁ နှစ် ကျော်ကြာ ဖမ်းဆီးထိန်းသိမ်းခံထားရသူများဖြစ်ကြောင်း ဟု မူဆယ်မြို့နယ် ဒေသခံအမျိုးသား တစ်ဦးက ဆက်ပြောသည်။

ပြီးခဲ့သည့် ၂၀၂၄ခုနစ် လယ်ပိုင်းတွင် တရုတ်အစိုးရ၏ ဖိအားကြောင့် စစ်ကောင်စီ နှင့် လက်အောက်ခံ ရဲတပ်ဖွဲများက မူဆယ်မြိုနယ်ရှိ ရပ်ကွက်တော်တော်များများကို ဝင်ရောက်စစ်ဆေးကာ အွန်လိုင်း ကျားဖြန့်လုပ်ငန်းလုပ်ကိုင်သူ များကိုလည်း ဖမ်းဆီးရမိခဲ့သည်။

သို့သော်လည်း ကျားဖြန့်လုပ်ငန်းသည် မူဆယ်မြို့တွင် ပပျောက်သွားခြင်းမရှိဘဲ ယနေ့အချိန်ထိ ဆက်လက်လုပ်ကိုင် နေဆဲဟု ဒေသခံများပြောသည်။

“ ကျားဖြန့်က ဘယ်လောက်ဖမ်းဖမ်း ဆက်ပြီးလုပ်နေတာပဲ။ အခုလည်း ပုံမှန်လုပ်နေပါတယ်။” ဟု မူဆယ်မြို့အသက် ၄၀အရွယ် အမျိုးသားတစ်ဉီးက ပြောသည်။

မူဆယ်မြို့သည် စစ်ကော်မရှင် ထိန်းချုပ်ထားသည့် နယ်မြေဖြစ်ပြီး၊ ကျားဖြန့်လုပ်ငန်းကို စစ်ကော်မရှင်၏လက်အောက်ခံ ပြည်သူ့စစ်များ အကာအကွယ်ပေးနေကြောင်း သိရသည်။