စစ်အာဏာသိမ်းပြီး ၄နှစ်ကျော် ကာလအတွင်း သျှမ်းပြည်အထင်ကရမြို့တော်ဖြစ်သည့် တောင်ကြီးမြို့ပေါ်တွင် မကြုံစဖူး ဒုစရိုက်သမားများ ပေါများလာကြောင်း ဒေသခံများထံစုံစမ်းသိရသည်။

မြန်မာနိုင်ငံတဝှမ်းတွင် အာဏာသိမ်း စစ်ကောင်စီကို နည်းမျိုးစုံဖြင့် တွန်လှန်တော်လှန်နေကြပြီး၊ မြန်မာနိုင်ငံ၏ ဒေသအများစုတွင် စစ်ကော်မရှင်တပ်နှင့် တိုင်ရင်းသားလက်နက်ကိုင်တပ်ဖွဲ့များ၊ တော်လှန်ရေး အင်အားစုများဖြင့် စစ်ရေး ပဋိပက္ခ ဖြစ်ပွားနေကြသည်။

ထို့ကြောင့် စစ်ရေး ပဋိပက္ခမှုကြောင့် မြေပြန့်ဒေသနှင့် အခြားသော ဒေသများတွင် တောင်ကြီးမြို့ပေါ်သို့ လာရောက်ခိုလှုံမှုပြုကြသည်။

လက်ရှိတွင်တောင်ကြီးမြို့၌လူမျိုးစုံ လာရောက်ကျင်လည် လုပ်ကိုင်စားသောက်နေကြကြောင်းလည်း သိရသည်။

တောင်ကြီးမြို့တွင် လူမျိုးပေါင်းစုံကျင်လည်လာမှုနှင့်အတူ ခိုးဆိုးလုယက်မှုများ၊ ဓားပြတိုက်မှုများ၊ ခါးပိုက်နှိုက်မှုများ ခပ်စိတ်စိပ်ကြုံလာရသည်။

ယမန်နေ့ (အောက်တိုဘာ ၁၂)ရက် ညနေပိုင်းတွင် အမျိုးသမီးငယ်တစ်ဉီး တောင်ကြီးမြို့ရှိ ကမ္ဘောဇ ညစျေးတန်းတွင် သူငယ်ချင်းများနှင့် သွားရောက်လည်ပတ်နေချိန် ပိုက်ဆံအိတ်ခါးပိုက်နှိုက်ခံရသည်။
“ မနေ့က ကျမတို့ သူငယ်ချင်းတွေနဲ့ ညစျေးတန်းသွားရင်းနဲ့ ကျမ ခါးပိုက်နှိုက်ခံရတယ်။ ခုံဘေးမှာ ခဏလေး ချထားတာ ပါသွားတာပဲ” ဟု ခါးပိုက်နှိုက်ခံရသည့် အသက် ၂၀ကျော်အရွယ် အမျိုးသမီးငယ် က သျှမ်းသံတော်ဆင့်ကိုပြောသည်။

အလားတူ အောက်တိုဘာ ၁၁ရက် တောင်ကြီးမြို့မစျေးနေ့တွင်လည်း အမျိုးသမီးတစ်ဉီး၏ ပိုက်ဆံအိတ် ဖောက်ခံရပြီး၊ ပိုက်ဆံနှင့် ဖုန်းပါသွားကြောင်း သိရသည်။

“မြို့မဈေးထဲမှာလည်း ဈေးသုံးနေရင်း ပိုက်ဆံရှင်းမယ်လုပ်တဲ့အချိန် ပိုက်ဆံအိတ်က ပေါက်နေပြီ။ အဲတုန်းက ရွာက မိဘအတွက် လိုအပ်တာ ဈေးလိုက်ဝယ်ပေးတာ။ကိုယ့်က သတိမထားမိလိုက်တဲ့ အချိန် ခဏပဲ ပိုက်ဆံ ၁၀ သိန်းလောက် ပါသွားတယ်။ဓားနဲ့ လား ကပ်ကြေးနဲ့လား အိမ်ခွဲပြီး ယူသွားတာ။”ဟု တောင်ကြီးတွင် အလုပ်လုပ်ကိုင်နေသည့် အမျိုးသမီး တစ်ဦးက ပြောသည်။

ထိုကဲ့သို့ ခါးပိုက်နှိုက်ခံရခြင်း၊ ဓားပြတိုက်ခံရခြင်းနှင့်ပတ်သက်ပြီး ကျူးလွန်ခံရသူများသည် ရဲစခန်းသို့ သွားရောက် တိုင်ကြားလျှင် ရဲများက အမှုဖွင့်ခ တောင်းခံခြင်းနှင့် ငွေညှစ်ခြင်းတို့ပြုလုပ်လေ့ရှိသဖြင့် သွားတိုင်ရန် ခက်ခဲကြောင်း ၎င်းအမျိုးသမီးက ဆိုသည်။

“ ကိုယ်က ခါးပိုက်နှိုက်ခံရလို့ သွားတိုင်ရင် ရဲက ကိုယ်ကို တရားခံစစ်သလိုပြန်မေးတာနဲ့ နောက်ဖုန်းကို စစ်ဆေးတာနဲ့ ပိုက်ဆံညှစ်တောင်းတာတွေလည်းရှိတယ်။ ရဲစခန်းသွားရင် စိတ်ပိုရှုပ်လို့ ဘယ်သူမှ မတိုင်ချင်ဘူး” ဟု အထက်ပါ အမျိုးသမီးက ပြောသည်။

စစ်အာဏာသိမ်းပြီးနောက်ပိုင်း မြန်မာနိုင်ငံအတွင်း ကုန်စျေးနှုန်းများလည်း အဆမတန်မြင့်တက်လာပြီး၊ အလုပ်အကိုင်အခွင့်အလမ်းများကလည်း ရှားပါးလာမှုကြောင့် တောင်ကြီးမြို့ပေါ်တွင် မကြုံစဖူး ဒုစရိုက်သမားများ ပေါလာရခြင်းဖြစ်ကြောင်း တောင်ကြီးမြို့ခံများ က ထောက်ပြပြောသည်။

“ အရင်က တောင်ကြီးမှာ အရမ်းအေးချမ်းတယ်။ ဒီလို ခါးပိုက်နှိုက်၊ သူခိုး၊ ဓားပြဆိုတာ မရှိသလောက်ပဲ။ အခုကျတော့ လူပေါင်းစုံတယ်။ အလုပ်ကလည်း မရှိ၊ ကုန်စျေးနှုန်းကလည်း တက်ပြီးရင်းတက်တော့ ပိုဆိုးလာတာပေါ့။ ကိုယ့်လုံခြုံရေးကိုယ်ပဲတာဝန်ယူရတယ်” ဟု တောင်ကြီးမြို့ အသက် ၄၀အရွယ်ရှိ အမျိုးသားတစ်ဉီးက သျှမ်းသံတော်ဆင့်ကိုပြောသည်။

တောင်ကြီးမြို့အတွင်းသို့ လွိုင်ကော်မြို့နယ်၊ ပင်လောင်းမြို့နယ်၊ ဆီဆိုင်မြို့နယ်နှင့် သျှမ်းပြည်မြောက်ပိုင်း သိန္နီ၊ လားရှိုး၊ ကျောက်မဲ၊ သီပေါမြို့နယ်ဘက်မှ စစ်ဘေးရှောင်များအပြင် မြေပြန့်ဒေသဘက်မှ တက်လာသည့် စစ်ဘေးရှောင်များလည်း ရှိကြောင်း သိရသည်။

တောင်ကြီးမြို့သည် စစ်ကော်မရှင်တပ် အရှေ့ပိုင်းတိုင်း စစ်ဌာနချုပ် အခြေစိုက်သည့် ဒေသဖြစ်သော်လည်း လက်ရှိတွင် ဒုစရိုက်သမားပေါများသည့် ဒေသတစ်ခုဖြစ်နေသည်။