သျှမ်းပြည် တောင်ကြီးမြို့ ညောင်ဖြူစခန်းရပ်ကွက်တွင် မိုးသည်းထန်စွာ ရွာသွန်းခဲ့ပြီးနောက် တောင်စောင်းမှ နေအိမ်တစ်လုံး ပြိုကျပျက်စီးသွားကြောင်း သတင်းရရှိသည်။

ဖြစ်စဉ်မှာ ယမန်နေ့ (အောက်တိုဘာလ ၁၁ ရက်) ညနေပိုင်းတွင် တောင်ကြီးမြို့၊ ညောင်ဖြူစခန်းရပ်ကွက်၊ စဝ်စံထွန်းရပ်ကွက်နှင့် ရတနာသီရိရပ်ကွက် တို့တွင် မိုးသည်းထန်စွာ ရွာသွန်းခဲ့ပြီးနောက် ညောင်ဖြူစခန်းရပ်ကွက် နယ်မြေ (၇) အနောက်ဘက်ခြမ်း တောင်စောင်းနား ကပ်နေသည့် နေအိမ်တစ်လုံး ပြိုကျခဲ့သည်။

ထိုအိမ်ပြိုကျစဉ် လူထိခိုက်မှု မရှိခဲ့သော်လည်း ဘေးပတ်ဝန်းကျင်မှ နေအိမ်များပါ ထိခိုက် ပျက်စီးသွားခဲ့ရကြောင်း ဒေသခံများက ပြောသည်။

“မနေ့ညနေက မိုးအရမ်းကြီးတော့ တောင်စောင်းနားက အိမ်တစ်လုံး ပြိုကျသွားတယ်။ အိမ်က မနေတာ ကြာတော့ လူထိခိုက်မှုမရှိဘူး။ ဒါပေမဲ့ ပြိုကျတော့ ဘေးနားက ပိသွားတဲ့ အိမ်တွေတော့ ပျက်စီးသွားတယ်။ အိမ်ဘယ်နှလုံးလောက် ပျက်စီးသွားလဲတော့ မသိရသေးဘူး”ဟု ဖြစ်စဉ်သိရှိသူ တောင်ကြီးဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

ထိုသို့ နေအိမ်ပြိုကျ ပျက်စီးနေသည်ကို သက်ဆိုင်ရာ ရပ်ကွက်အုပ်ချုပ်ရေးမှူးမှ လာရောက်ဖြေရှင်းပေးခြင်း မရှိဘဲ ယနေ့ထိ အပျက်အစီးများကို ကူညီဖယ်ရှားပေးခြင်း မရှိသေးခြင်းကြောင့် ရပ်ကွက်နေ ပြည်သူများ အဆင်မပြေဖြစ်ရကြောင်း ဒေသခံ အမျိုးသမီးတစ်ဦးက ပြောသည်။

“အုပ်ကြီးက လာတောင် မကြည့်ဘူး။ စစ်မှုထမ်းကြေးတော့ လူမရှိလည်း ထည့်ရတယ်။ လူကြီးတစ်ချို့လည်း လာကြည့်ပြီး ပြန်သွားတယ်။ ဒီနေ့မှပဲ အရပ်ဖက် အဖွဲ့အစည်းတွေ သွားကြည့်ပြီး ကူမယ်လို့တော့ ကြားတာပဲ။ ညတွင်းချင်း လာကူလို့ရတာကို မကူကြဘူး” ဟု အဆိုပါ တောင်ကြီးဒေသခံ အမျိုးသမီးက ဆိုသည်။

ထို့အပြင် လူနေထူထပ်ပြီး နေအိမ်များလာခြင်းကြောင့် ညောင်ဖြူစခန်းရပ်ကွက်ရှိ တောင်စောင်းနား နေအိမ်များလည်း ဂရုတစိုက် နေထိုင်သင့်ကြောင်း မြေပြိုမှုများ ဖြစ်လာနိုင်ကြောင်း အဆိုပါ အမျိုးသမီးက ထပ်လောင်းပြောသည်။

တောင်ကြီးမြို့တွင် မြေငလျင်ဒဏ်နှင့် မိုးရွာသွန်းမှုကြောင့် မြေသားများ ပျော့လာပြီး တောင်စောင်းဘေးရှိ နေအိမ်များလည်း ဂရုတစိုက် နေထိုင်သင့်ကြောင်း၊ တောင်စောင်းတွင် မြေကွက်ဝယ်ခြင်း၊ အိမ်ဆောက်ခြင်းများ မလုပ်သင့်ကြောင်း ဒေသခံများက အကြံပြုသည်။

ပြီးခဲ့သည့် ၂၀၂၃ ခုနှစ်တွင်လည်း မိုးအဆက်မပြတ် ရွာသွန်းမှုကြောင့် ညောင်ဖြူစခန်းရပ်ကွက်ရှိ မြေသားပျော့ပြီး တောင်စောင်းပေါ်ရှိ နေအိမ်ပြိုကျခြင်း၊ မြေပြိုခြင်းများ ဖြစ်ပေါ်ခဲ့ဖူးကြောင်း သိရသည်။

ဓာတ်ပုံ-တောင်ကြီးမြို့ ညောင်ဖြူစခန်းရပ်ကွက်ရှိ နေအိမ်တစ်လုံး ပြိုကျပြီးနောက် တွေ့ရစဉ် (ဓာတ်ပုံ-ဒေသခံ)