သျှမ်းပြည် မူဆယ်မြို့ လွယ်တိန်ခမ်းတောင်ရှိ သာသနာ့နယ်မြေကို ပွဲစားများ ပိုင်နက်ကျူးကျော်ကာ တရုတ်လုပ်ငန်းရှင်များထံ အကွက်ရိုက် ပြန်ရောင်းချနေကြောင်း စုံစမ်းသိရသည်။

မူဆယ်မြို့တွင် လွန်ခဲ့သည့် နှစ်နှစ်ခန့်မှ စတင်ကာ တိုက်ပွဲကြား အခွင့်ကောင်းယူပြီး မြေပွဲစားများနှင့် စစ်ကော်မရှင်လက်အောက်ခံ ဌာနဆိုင်ရာများ ပူးပေါင်း၍ မြို့ပြင်နှင့် အနီးအနားရှိ မြေလွတ်မြေရိုင်းများကို ခွဲတမ်းကျ အကွက်ရိုက်ပြီး တရုတ်လုပ်ငန်းရှင်များထံ ရောင်းချခဲ့ကြောင်း ဒေသခံများက ပြောသည်။

ထိုထဲတွင် မူဆယ်မြို့ လွယ်တိန်ခမ်းတောင်ရှိ မြေပုံစံနှင့် မြေရာဇဝင် ရှိထားသော သာသနာ့နယ်မြေများလည်း ပါဝင်ခဲ့ခြင်းကြောင့် ဒေသခံများအကြား ဝေဖန်မှု မြင့်တက်နေပြီး မြေပွဲစားများမှ သာသနာမြေ ၃ ဧကခန့်အထိ ပိုင်နက်ကျူးကျော်ပြီး အကွက်ရိုက်ထားကြောင်း မူဆယ်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

“ပွဲစားတွေ မြေရှင်းထားတာ တစ်နှစ်ခွဲလောက်တော့ ရှိပြီ၊ အဲ့တုန်းက တိုက်ပွဲစဖြစ်လို့ လက်နက်ကြီးလည်းကျတော့ ဂေါပကလည်း သွားမကြည့်ရဲဘူး။ အစတုန်းက တောင်အောက်နားပဲ လုပ်ထားတာ၊ နောက်ပိုင်း အပေါ်ဘက် ထပ်ချဲ့တော့ အခု မိဂဒါစေတီ အောက်နားတောင် ရောက်တော့မယ်။ သာသနာ့နယ်မြေ မကျူးကျော်ရ ဆိုင်းဘုတ်တွေ၊ သာသနာ့အလံတွေ ထောင်ထားတာလည်း ဖျက်ဆီးခံရတယ်”ဟု ဖြစ်စဉ်သိရှိသူ မူဆယ်ဒေသခံ ၎င်းအမျိုးသားက ပြောသည်။

လွယ်တိန်ခမ်းတောင် သာသနာ့နယ်မြေထဲ ကျူးကျော်ပြီး အကွက်ရိုက်ထားမှုနှင့် ပတ်သက်၍ ဇူလိုင်လ ၂၅ ရက်တွင် အဆိုပါ မြေနေရာသို့ စစ်ကော်မရှင် လက်အောက်ခံ မြို့နယ်အုပ်ချုပ်ရေးမှူးနှင့် မြေတိုင်းဦးစီးဌာန တာဝန်ရှိသူများ လာရောက်ကြည့်ရှု့ခဲ့ပြီး နေရာပြန်လည် သတ်မှတ်ပေးခဲ့သော် အဆိုပါ အမှတ်အသားများကို မြေပွဲစားများက ပြန်လည်ဖျက်ဆီးခဲ့ကြောင်း မူဆယ်ဒေသခံများက ပြောသည်။

၎င်းနောက်တွင် လွယ်တိန်ခမ်းတောင် သာသနာ့မြေ ထိန်းသိမ်းစောင့်ရှောက်ရေးအဖွဲ့နှင့် မြေပွဲစားများအကြား ထပ်မံတွေ့ဆုံ ညှိနှိုင်းခဲ့ကြောင်း သိရသော်လည်း ဆွေးနွေးမှုရလဒ်ကို မသိရပေ‌။

“မြေစာရင်းရုံးဘက်ကလည်း မြေပုံဇယားနဲ့ သတ်မှတ်ထားပေးတာ နှစ်နဲ့ချီ ရှိနေပြီ။ ဘယ်နေရာ ဘယ်နားအထိ ဆိုတာ မြေပုံနဲ့ တိတိကျကျ သတ်မှတ်ထားပြီးသား ရှိတယ်။ ကိုဗစ်ကြောင့်ရယ်၊ တိုက်ပွဲကြောင့်ရယ် အဲ့မြေပေါ်မှာ ဘာအကာအကွယ်မှ မလုပ်နိုင်တော့ အပြင်က တဖြည်းဖြည်း ကျူးကျော်လာတာ၊ အဲ့လိုနဲ့ ဒီနှစ်ထဲမှာ ပြဿနာ ကြီးလာတာ။ ဌာနဆိုင်ရာတွေကို လာဘ်ထိုးထားတော့ သူတို့က ပွဲစားဘက်ကပဲပေါ့”ဟု ဖြစ်စဉ်သိရှိသူ မူဆယ်ဒေသခံ ၎င်းအမျိုးသားက ပြောသည်။

ယခုကဲ့သို့ သာသနာ့မြေကို ကျူးကျော်ပြီး ပွဲစားများမှ တရုတ်လုပ်ငန်းရှင်များထံ အကွက်ရိုက် ပြန်ရောင်းချနေခြင်းကို အလျင်အမြန် ဟန့်တားနိုင်ရန် ကျွမ်းကျင်သူ ဥပဒေ ပညာရှင်များနှင့်လည်း ဆွေးနွေးတိုင်ပင်လျက်ရှိကြောင်း လွယ်တိန်ခမ်းတောင် သာသနာ့မြေ ထိန်းသိမ်းစောင့်ရှောက်ရေးအဖွဲ့နှင့် နီးစပ်သူများထံမှ သိရသည်။

လွန်ခဲ့သည့် ၂၀၁၉ ခုနှစ်ကလည်း အဆိုပါ မြေပွဲစားများမှာ မူဆယ်မြို့ လွယ်တိန်ခမ်းတောင်ခြေရှိ ပြည်သူပိုင်မြေကွက်များကို ကျူးကျော်ကာ အခြားသူထံ လက်လွှဲရောင်းချခဲ့ခြင်းများ ပြုလုပ်ခဲ့ပြီး ဒေသခံများကိုလည်း လက်နက်ကိုင်တပ်ဖွဲ့ နောက်ခံဖြင့် အကြပ်ကိုင် ခြိမ်းခြောက်ခဲ့ခြင်းကြောင့် အချို့မှာ မန္တလေးဘက်သို့ ထွက်ပြေးတိမ်းရှောင်သွားရကြောင်း ဒေသခံများက ပြောသည်။

ထို့ကြောင့် သာသနာမြေ ကျူးကျော်ခံရခြင်းကို အကြောင်းပြု၍ လူမျိုးရေးနှင့် ဘာသာရေး ပဋိပက္ခများ မဖြစ်ပွားစေရန် ဒေသခံအချင်းချင်း အပြန်အလှန် နားလည်မှုနှင့် လေးစားမှု ထားရှိရန် လိုအပ်ပြီး တရားမျှတမှု အမြန်ဆုံးရရှိရန် မူဆယ်ဒေသခံများက တောင်းဆိုထားသည်။