စစ်ကော်မရှင်နှင့် ပူးပေါင်းပြီး ရွာငံမြို့နယ်ဒေသခံများထံ ငွေညှစ်သည့် တပ်ကုန်းကျေးရွာမှ အုပ်ချုပ်ရေးမှူးနှင့် မြသိန်းတန် ကျေးရွာမှ ရွာသားတစ်ဦး ဓားထိုးအသတ်ခံရကြောင်း သတင်းရရှိသည်။

ဖြစ်စဉ်မှာ ပြီးခဲ့သည့် အောက်တိုဘာလ ၅ ရက်နေ့တွင် ရွာငံမြို့နယ် တပ်ကုန်းကျေးရွာမှ အသက် ၄၅ ဝန်းကျင် အုပ်ချုပ်ရေးမှူးနှင့် မြသိန်းတန်ကျေးရွာမှ အသက် ၃၅ နှစ်အရွယ် အမျိုးသားတစ်ဦးတို့သည် ရွာငံမြို့ပေါ်ရှိ ဝက်သတ်ရုံတွင် ဓားဖြင့်အထိုးခံရပြီး အသတ်ခံခဲ့ရကြောင်း ရွာငံမြို့မှ အမျိုးသားတစ်ဉီး က သျှမ်းသံတော်ဆင့်ကိုပြောသည်။

“တပ်ကုန်းရွာက အုပ်ချုပ်ရေးမှူး နဲ့ မြသိန်းတန်က တစ်ယောက် အသတ်ခံရတယ်။ ဝက်သတ်ခုံမှာပဲ ဓားနဲ့ အသတ်ခံရတာ။ သူတို့က စစ်ကော်မရှင်နဲ့ ပူးပေါင်းပြီး ရွာသားတွေနား ခြိမ်းခြောက် ငွေတောင်းတယ် ။ မြသိန်းတန်က တစ်ယောက်က လည်း အလိုတူ အလိုပါမို့ အသတ်ခံရတယ် ထင်တာပဲ။ဘယ်သူ သတ်သွားမှန်းတော့ မသိဘူး။”ဟု ၎င်းအမျိုးသားက ဆိုသည်။

အဆိုပါ အုပ်ချုပ်ရေးမှူးသည် စစ်ကော်မရှင် အာဏာသိမ်းပြီး တစ်နှစ်အကြာတွင် တပ်ကုန်းကျေးရွာ အုပ်ချုပ်ရေးမှူး ပြုလုပ်ကာ ဒေသခံများအပေါ် ငွေများ မတရားကောက်ခံခြင်း၊ ၎င်းအမြင်မကြည်သူများကိုလည်း စစ်ကော်မရှင်ထံသို့ တိုင်ကြားခြင်းများ ပြုလုပ်ကြောင်း ၎င်းက ထပ်လောင်း ပြောသည်။

၎င်း တပ်ကုန်းကျေးရွာ အုပ်ချုပ်ရေးမှူးနှင့် အရပ်သားတစ်ဉီးသတ်ခံရသည့် ရွာငံမြို့ပေါ် ဝက်သတ်ရုံနေရာသည် ဆိုင်ကယ်ဖြင့် နာရီဝက်ခန့်သာ သွားရကြောင်း သိရသည်။

ထိုသို့ စစ်ကော်မရှင် လက်အောက်ခံ အုပ်ချုပ်ရေးမှူးများ အသတ်ခံရသည်မှာ ရွာငံမြို့နယ်အတွင်း ၅ ဉီး ထက်မနည်းရှိနေပြီး ကျေးရွာအများစုတွင်လည်း အုပ်ချုပ်ရေးမှူး လုပ်မည့်သူ မရှိကြောင်း ရွာငံမြို့ဒေသခံ အသက် ၃၀ ဝန်းကျင် အမျိုးသမီးတစ်ဦးက သျှမ်းသံတော်ဆင့်ကို ပြောသည်။

“အသတ်ခံရတာက ၅ဉီး ထက်နည်းရှိနေပြီ။ ရွာမှာလည်း အသတ်ခံရတဲ့ အုပ်ချုပ်ရေးမှူးနေရာကို ဝင်လုပ်မယ့်သူမရှိဘူး။ ဘယ်သူမှ မလုပ်ရဲကြဘူး။ စစ်ကော်မရှင်က အတင်းခန့်တဲ့ သူတွေကတော့ မလုပ်ချင်လည်း လုပ်နေကြရတာ။ အုပ်ချုပ်ရေးမှူးက ဟိုဘက်လည်း ကြောက်ရ ဒီဘက်လည်း ကြောက်ရနဲ့ မလွယ်ဘူး။”ဟု ၎င်း အမျိုးသမီး တစ်ဦးက ပြောသည်။

ထို့အပြင် အုပ်ချုပ်ရေးမှူးအသတ်ခံရသည့် ကျေးရွာများတွင် စစ်ကော်မရှင် လက်အောက်ခံ ပျူစောထီးများက လက်နက်ကိုင် ခြိမ်းခြောက်၍ ငွေတောင်းခြင်း၊ မတရားဖမ်းဆီးခြင်းများ ပြုလုပ်နေကြောင်း သိရသည်။

ပြီးခဲ့သည့် ၂၀၂၄ ခုနှစ် အောက်တိုဘာလတွင် ရွာငံမြို့နယ် သိမ်ကုန်းကျေးရွာမှ အုပ်ချုပ်ရေးမှူးနှင့် ၎င်း၏ဇနီး အသတ်ခံရပြီး အလားတူ ၂၀၂၄ ခုနှစ် နိုဝင်ဘာလ ၂၆ ရက်နေ့တွင်လည်း ရွာငံမြို့နယ် ဘုရားကြီးကုန်းကျေးရွာ၌ အုပ်ချုပ်ရေးမှူးနှင့် အရပ်သားတစ်ဦး ထပ်မံ အသတ်ခံရကြောင်း သိရသည်။