သျှမ်းပြည်တောင်ပိုင်း တောင်ကြီးမြို့တွင် ပအိုဝ်းပြည်သူ့စစ် PNOတပ်သားတစ်ဦး ကို စစ်ကော်မရှင် တပ်သားများက အုပ်စုဖွဲ့ ဝိုင်းရိုက်ခဲ့ကြောင်း သတင်းရရှိသည်။

ဖြစ်စဉ်မှာ ပြီးခဲ့သည့် စက်တင်ဘာလ (၃၀)ရက်နေ့ ညတွင် အသက် ၃၀ ကျော်အရွယ် PNO တပ်ဖွဲ့ဝင်တစ်ဦးမှ တောင်ကြီးမြို့ထဲသို့ ဆိုင်ကယ်ဖြတ်မောင်းစဉ် စစ်ကော်မရှင် တပ်သား အယောက် ၂၀ ကျော်မှ အဆိုပါ PNOတပ်ဖွဲ့ဝင်တစ်ဦးကို ဝိုင်းရိုက်ခဲ့ပြီး ပြန်လွှတ်ပေးလိုက်ကြောင်း သိရသည်။

“သူတို့က ကျနော်တို့ကားကို တားပြီး ကားပေါ်က ဆင်းခိုင်းတာ။ ပြီးရင်သူတို့က အုပ်စုလိုက် ရိုက်တော့တာပဲ။ ကျနော် မျက်နှာ၊ ကျောဆို ရစရာကို မရှိတော့ဘူး။ ညိုမဲစွဲသွားတာ။ သူတို့က PNOတပ်ဖွဲ့ဝင်လို့ ပြောမှ ပြန်လွှတ်ပေးတာ။ မမေး မမြန်းဘဲ ရိုက်တော့ လွန်တာပေါ့။”ဟု ဖြစ်စဉ်ကို သိရှိသူ အမျိုးသားတစ်ဦးက ပြောသည်။

တောင်ကြီးမြို့တွင် ည ၁၁ နာရီအချိန် နောက်ပိုင်းတွင် စစ်ကော်မရှင်တပ်ဖွဲ့က ကင်းလှည့်နေစဉ် ဆိုင်ကယ်၊ ကားများကို တွေ့ရှိပါက တားပြီး ရပ်ခိုင်းကာ စစ်ဆေးမေးမြန်းခြင်း၊ ငွေညှစ်ခြင်းများ လုပ်ဆောင်နေကြောင်း သိရသည်။

ထို့အပြင် ကျန်းမာရေး အရေးပေါ် ဆေးကုသရန်အတွက် ညအချိန် အပြင်ထွက်သွားလာလျှင်လည်း စစ်ကော်မရှင် နှင့် ခိုးဆိုလုယက်သူများကို ကြောက်နေရသည့် အခြေအနေဖြစ်နေကြောင်း တောင်ကြီးမြို့စျေးရောင်းချနေသည့် အမျိုးသမီးတစ်ဉီးက သျှမ်းသံတော်ဆင့်ကိုပြောသည်။

“ညဆို ကျန်းမာရေး ကိစ္စဖြစ်ဖြစ် အရေးပေါ် ညနက်သန်းခေါင်သွားရမှာတို့၊ ဈေးရောင်းသွားရမှာတို့ဆို ညအချိန်သွားရတယ်လေ စစ်ကော်မရှင်က တွေ့ရင် စစ်ဆေး မေးမြန်းတာထက် ခြိမ်းခြောက်တယ်၊ ပိုက်ဆံ ပါသလောက် တောင်းသွားတယ်။ ခုတလောက ခိုးဆိုးလုယက်သူတွေ များလာတော့ ဒီမှာ မလုံခြုံတော့သလို လုပ်စားဖို့တောင် အဆင်မပြေတော့ဘူး။” ဟု ၎င်း စျေးသည်က ဆိုသည်။

ထိုသို့ စစ်ကော်မရှင်က ခြိမ်းခြောက်ငွေ ညှစ်သည့်အပြင် စစ်မှုထမ်း တပ်သားသစ်အဖြစ် ပေါ်တာဆွဲ ခေါ်ယူမှုများလည်း ရှိနေသည်။

ပြီးခဲ့သည့် ( သြဂုတ် ၁၂)ရက် နံနက် ၃နာရီတွင် တောင်ကြီးမြို့ ဘုရားဖြူစျေးတွေ ကုန်စိမ်းရောင်းချရန်အတွက် မြို့မစျေးသို့ ကုန်စိမ်းများသွားရောက်သယ်ယူနေစဉ် ရဲနှင့်စစ်သားများက မှောင်ရိပ်ခိုပြီး ပိုက်ဆံတောင်းသည့် ဖြစ်စဉ်လည်း ရှိခဲ့သည်။

ပြီးခဲ့သည့် ဇူလိုင်လ ပထမ ပတ်တွင်လည်း တောင်ကြီးမြို့ပေါ် မြို့မဈေးမြောက်ဘက်နှင့် ကံသာရပ်ကွက်၊ စိန်ပန်းရပ်ကွက်တွင် ညအချိန်အလုပ်မှ ပြန်လာသူ လူငယ်များကို စစ်သားနှင့် ရဲများက ပေါ်တာဆွဲဖမ်းဆီးသွား၍ လူငယ် (၂၀)ကျော်ပါသွားကြောင်း သိရသည်။