စစ်တပ်သည် အရပ်သားအစိုးရကို ဖြုတ်ချပြီး မတရား အာဏာသိမ်းယူခဲ့သည်မှာ ငါးနှစ်ကာလထဲ ရောက်ရှိလာခဲ့ပါပြီ။ထိုအာဏာသိမ်းသည့် ၂၀၂၁ ခုနှစ်မှ ယနေ့အထိ စစ်အုပ်စုများကြောင့် နွေဦးတော်လှန်ရေးကာလအတွင်း သေဆုံးခဲ့ရသည့် ဒီမိုကရေစီရေးလှုပ်ရှားသူများနှင့် ပြည်သူ စုစုပေါင်း (၇,၃၀၃) ဦးရှိခဲ့ကြောင်း နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) က စက်တင်ဘာလ ၂၉ ရက်တွင် ထုတ်ပြန်ထားသည်။ 

ထို့အပြင် အာဏာသိမ်းပြီးနောက်ပိုင်း မြန်မာနိုင်ငံသည် ကမ္ဘာပေါ်တွင် မြေမြှုပ်မိုင်းနှင့် ပေါက်ကွဲစေတတ်သော စစ်လက်နက်များကြောင့် ထိခိုက်သေဆုံးမှု အများဆုံးနိုင်ငံဖြစ်လာကြောင်း  ယခုနှစ် ဖေဖော်ဝါရီလတွင် ကုလသမဂ္ဂလူသားချင်း စာနာမှုဆိုင်ရာညှိနှိုင်းရေးရုံး (OCHA) က အသိပေးထုတ်ပြန်ထားသည်။

ထိုထဲတွင် အာဏာသိမ်းစစ်တပ်၏ မြေမြှုပ်မိုင်းကြောင့် သာမက တော်လှန်ရေးတပ်ဖွဲ့များ၏ မြေမြှုပ်မိုင်းကြောင့် ထိခိုက်ဒဏ်ရာရသူ များစွာရှိသည်။ ၎င်းတို့သည် စိတ်ပိုင်းဆိုင်ရာ၊ ရုပ်ပိုင်းဆိုင်ရာကို ပြန်လည်ကုစားရန်အတွက် အလွန်ပင် အရေးကြီးသည်။ 

ထိုကြောင့် နွေဦးမေတ္တာယုံကြည်ရာ စင်တာကို ၂၀၂၄ ဇူလိုင် ၁၁ ရက်နေ့က ထိုင်း-မြန်မာနယ်စပ် တစ်နေရာတွင် နိုင်ငံရေးတက်ကြွလှုပ်ရှားသူ တဦးဖြစ်သည့် မယုလှိုင်သင်းက ဦးဆောင်ပြီးဖွင့်လှစ်ခဲ့သည်။ 

သို့သော်လည်း အမေရိကန် ပြည်ထောင်စု၏ အကူအညီများ ရပ်ဆိုင်းခြင်းကြောင့် ထောက်ပံ့မှုများ မရှိတော့သဖြင့် လက်ရှိ နွေဦးမေတ္တာယုံကြည်ရာ စင်တာတွင် လူနာများ၏ ကျန်မာရေး စောင်ရှောက်မှုများ ရပ်နားထားရသည်။

လက်ရှိတွင် နွေဦးမေတ္တာယုံကြည်ရာ စင်တာသည် လူထု၏ ထောက်ပံ့ငွေဖြင့် လည်ပတ်နေရပြီး လူနာ (၂၀) ခန့်အတွက် ဆေးကုသမှုဆက်လက် လုပ်ဆောင်နေသော်လည်း ဆေးကုသမှု ခက်ခဲနေသည်။ ထိုစင်တာတွင် ဆေးကုသမှု ခံယူနေရသူများ၏ အခြေအနေများကို သျှမ်းသံတော်ဆင့်က သတင်းဓာတ်ပုံ ရယူနိုင်ခဲ့သည်။