သျှမ်းပြည် ကျောက်မဲမြို့တွင် တစ်ရက်အတွင်း အမျိုးသားနှစ်ဦး မြေမြှုပ်မိုင်းနင်းမိကာ ပွဲချင်းပြီး သေဆုံးခဲ့ကြောင်း စုံစမ်းသိရသည်။
ယမန်နေ့ (စက်တင်ဘာလ ၂၉ ရက်) နံနက် ၁၀ နာရီဝန်းကျင်တွင် တအာင်း(ပလောင်) အမျိုးသားလွတ်မြောက်ရေးတပ်မတော် TNLA ထိန်းချုပ်ထားသည့် ကျောက်မဲမြို့ အေးချမ်းသာသုဿာန်တွင် သင်္ချိုင်းတာဝန်ခံ အမျိုးသားတစ်ဦး အရိုးပြာ သွားသွန်နေစဉ် မြေမြှုပ်မိုင်း နင်းမိကာ ပွဲခြင်းပြီး သေဆုံးခဲ့သည်။
စက်တင်ဘာလ ၂၉ တစ်ရက်တည်း၌ ညနေ ၄ နာရီခွဲခန့်တွင်လည်း အဆိုပါ အေးချမ်းသာ သုဿာန်အနီး နွားကျောင်းနေသည့် လူငယ်တစ်ဦးလည်း မြေမြှုပ်မိုင်း နင်းမိ၍ ပွဲချင်းပြီး သေဆုံးခဲ့ကြောင်း နမ့်ခုံးရှမ်းများ ပရဟိတအသင်း တာဝန်ရှိသူတစ်ဦးက သျှမ်းသံတော်ဆင့်ကို ပြောသည်။
“တစ်ရက်ထဲ နှစ်ကြိမ် ဖြစ်သွားတာပါ။ ပထမဆုံး မိုင်းနင်းမိတဲ့လူက သင်္ချိုင်းမြေထဲ လာရောက် ကူညီနေတဲ့လူပါ၊ သူက ပြာတွေကို ရှင်းရင်းနဲ့ နင်းမိပြီး ပွဲချင်းပြီး ဆုံးသွားပါတယ်။ ဒုတိယတစ်ယောက်လည်း အဲ့နားတဝိုက်ပဲ ဖြစ်သွား၊ ကလေးတစ်ယောက်က နွားကျောင်းပြီး အပြန်မှာ မြေမြှုပ်မိုင်း နင်းမိပြီး ချက်ချင်းဆုံးသွားတာပါ” ဟု ပရဟိတအသင်း တာဝန်ရှိသူတစ်ဦးက ပြောသည်။
ထိုမိုင်းနင်းမိဖြစ်စဉ် နံနက်ပိုင်းတွင် သေဆုံးသွားသူမှာ အသက် ၅၅ ဝန်းကျင် ကိုဦး ဖြစ်ပြီး ညနေပိုင်းတွင် မိုင်းနင်းမိ၍ သေဆုံးသွားသူမှာ အသက် ၁၄ နှစ်အရွယ် မောင်အိုက်လော့ ဖြစ်ကြောင်း သိရသည်။
မြေမြှုပ်မိုင်း ပေါက်ကွဲခဲ့သည့် နေရာသည် ကျောက်မဲမြို့ အေးချမ်းသာသုဿာန် သင်္ချိုင်းမြေ အတွင်း ရှိနေခြင်းကြောင့် ဂရုစိုက်သွားလာကြရန် လိုအပ်ကြောင်းလည်း ၎င်းအမျိုးသားက ပြောသည်။
အလားတူ စစ်ကော်မရှင်တပ် ပြန်လည်ထိန်းချုပ်ထားသည့် နောင်ချိုမြို့နယ် ဉာဏ်တောကျေးရွာအုပ်စုရှိ နောင်လင်ကျေးရွာတွင် ဒေသခံ အမျိုးသား ၄ ဦး မြေမြှုပ်မိုင်းနင်းမိပြီး ဒဏ်ရာပြင်းထန်သောကြောင့် ဆေးကုသနိုင်ရန် အခက်အခဲ ဖြစ်နေကြောင်း တအာင်းအမျိုးသမီးအဖွဲ့အစည်း TWO မှ ယမန်နေ့ (စက်တင်ဘာ ၂၈ ရက်) တွင် သတင်းထုတ်ပြန်ထားသည်။
ထို့အပြင် နောင်ချိုမြို့နယ်အတွင်းရှိ တောင်ရှည်ကျေးရွာအုပ်စု နားရှိးရွာဒေသခံ ကလေးငယ်တစ်ဦးနှင့် ကျောက်ကြမ်းရွာခံ အမျိုးသားတစ်ဦးတို့လည်း မြေမြှုပ်မိုင်းနင်းမိ၍ ထိခိုက်ဒဏ်ရာ ပြင်းထန်ခြင်းကြောင့် ပြင်ဦးလွင်ဆေးရုံတွင် ဆေးကုသမှု ခံယူနေကြောင်း TWO ထုတ်ပြန်ချက်အရ သိရသည်။
Leave a Comments