သျှမ်းပြည် တောင်ကြီးမြို့တွင် အဝေးသင်တက္ကသိုလ် လာတက်နေသူများကို ဦးတည်ပြီး ဆိုင်ကယ်လုယက်မှုများ ခပ်စိပ်စိပ် ဖြစ်ပွားနေကြောင်း သတင်းရရှိသည်။

ယမန်နေ့ (စက်တင်ဘာလ ၂၃ ရက်) ညနေပိုင်းတွင် တောင်ကြီးမြို့ မီးသတ်လမ်းကြားထဲ အမျိုးသားနှစ်ဉီးမှ လူပြတ်ချိန်၌ ဆိုင်ကယ်ဆီပြတ် ဟန်ဆောင်ပြီး၊ ဆိုင်ကယ်မောင်းလာသူများကို တားကာ ဖုန်းနှင့် လက်ဝတ်ရတနာများ လုယက်နေကြောင်း ဖြစ်စဉ်သိရှိသူ အဝေးသင်တက္ကသိုလ် ကျောင်းသားတစ်ဉီးက သျှမ်းသံတော်ဆင့်ကို ပြောသည်။

“အခုတလောက လုယက်တာတွေ တော်တော်ဆိုးလာတယ်။ နယ်က ကျောင်းလာတက်တဲ့ သူတို့ကို ပစ်မှတ်ထား လုယက်နေတာ။ လူပြတ်ပြီဆိုရင် သူတို့က အုပ်စုလိုက် အနောက်က လိုက်ပြီး လုတာ။ ဘယ်ကိုမှ တစ်ယောက်တည်း မသွားတာ အကောင်းဆုံးပဲ။ ဒီလ တစ်လတည်းကို ဆိုင်ကယ်လုခံရတာ ကြားရတာ အနည်းဆုံး ၅ ခါလောက်ရှိပြီ”ဟု ၎င်းတက္ကသိုလ်ကျောင်းသားက ပြောသည်။

ထိုသို့ တောင်ကြီးတွင် လုယက်မှုများ မကြာခဏ ဖြစ်နေသည်ကို စစ်ကော်မရှင် လက်အောက်ခံ ရဲတပ်ဖွဲ့က တာဝန်ယူ ဖြေရှင်းပေးမှု မရှိဘဲ သွားရောက်တိုင်တန်းလျှင် စုံစမ်းပေးမည်ဟုဆိုကာ ငွေများ ကောက်ခံသောကြောင့် မတိုင်ကြားရဲကြောင်း ဒေသခံများထံမှ သိရသည်။

ပြီးခဲ့သည့် စက်တင်ဘာလ ၂၂ ရက် ည ၉ နာရီခွဲ အချိန်တွင် မြကန်သာ အဝိုင်းပတ်အနီး၌ အမျိုးသားနှစ်ဦးမှ ကားရှေ့တွင် ပိတ်ရပ်ကာ အကူအညီတောင်း ဟန်ဆောင်၍ လုယက်ရန် ကြိုးစားသောကြောင့် မောင်းထွက်ခဲ့ရကြောင်း မြို့ခံတစ်ဦးက ပြောသည်။

ယမန်နေ့ (စက်တင်ဘာလ ၂၃ ရက်) တွင် တောင်ကြီးမြို့ ရေအေးကွင်းရပ်ကွက်မှ တက္ကသိုလ်ကျောင်းသူ တစ်ဦးသည် စာရွက်ထုတ်ယူရန် ဆိုင်ကယ်တစ်စီးဖြင့် ထွက်ခွာခဲ့ရာ ပျောက်ဆုံးသွားခဲ့ပြီး လက်ရှိအချိန်ထိ အဆက်အသွယ် မရသေးကြောင်း နီးစပ်သူများက ပြောသည်။

“ညနေ ၄ နာရီနောက်ပိုင်း ဖုန်းဆက်လို့ မရတော့ဘူး၊ ပြန်လာတော့မယ် ဆိုပြီး ပျောက်သွားတာ။ သူ့ဖုန်းကိုတော့ ဆက်လို့ရတယ်၊ ဖုန်းဝင်တယ် မကိုင်တော့ဘူး။ ဆိုင်ကယ်လည်း ပါသွားတော့ ဆိုင်ကယ်လုပြီး အသတ်ခံရမှာ စိတ်ပူတယ်။ တောင်ကြီး အမှတ် (၂) ရဲစခန်းမှာတော့ အမှုဖွင့်ထားတယ်”ဟု မိသားစုနှင့် နီးစပ်သူ အမျိုးသမီးတစ်ဦးက ပြောသည်။

အလားတူ ပြီးခဲ့သည့် စက်တင်ဘာလ (၂၁) ရက် ညနေ ၄ နာရီအချိန်တွင်လည်း အဝေးသင်တက္ကသိုလ် လာတက်သည့် ကျောင်းသားနှစ်ဦးသည် ဆိုင်ကယ်စီးရင်း ဖုန်းပြောနေစဉ် အမျိုးသားအုပ်စုလိုက် နောက်ယောင်ခံလိုက်လာပြီး ဖုန်းနှင့် ဆိုင်ကယ်လုယက်သွားကြောင်း သိရသည်။

“တောင်ကြီး တန်ဆောင်တိုင်ကလည်း နီးလာပြီဆိုတော့ လုယက်မှုတွေက ပိုဆိုးလာတယ်။ ပွဲတော်ရက်တွေမှာဆို ဘယ်လောက်များ သောင်းကျန်း လုယက်ဦးမလဲ မသိဘူး။ တောင်ကြီးမှာက လူပေါင်းစုံဆိုတော့ လုယက် ရမ်းကားသူတွေ ပေါင်းမိသွားတော့ ပိုဆိုးလာတာပေါ့”ဟု တောင်ကြီး ဒေသခံ အသက် ၄၀ ဝန်းကျင် အမျိုးသားတစ်ဦးက ပြောသည်။

ပြီးခဲ့သည့် စက်တင်ဘာလ (၁၉)ရက်တွင်လည်း တောင်ကြီးမြို့ ကံကြီးဘက်တွင် ဆိုင်ကယ်မောင်းနှင်နေသည့် အမျိုးသမီးနှစ်ယောက်နောက်သို့ အမျိုးသားနှစ်ဦး ထပ်ကြပ်မခွာ လိုက်၍ လုယက်မှုများ ကြုံတွေ့ခဲ့ရကြောင်း ဒေသခံများက ပြောသည်။

သျှမ်းပြည်မြို့တော် တောင်ကြီးမြို့သည် စစ်တပ်အာဏာမသိမ်းခင်က လွတ်လပ်စွာ လှုပ်ရှားသွားလာ၍ ရသော်လည်း စစ်အာဏာသိမ်းပြီး နောက်ပိုင်းတွင် နိုင်ငံရေးအခြေအနေ မတည်ငြိမ်မှုများကို အခွင့်ကောင်းယူ၍ ခိုးဆိုးလုယက်မှု များပြားလာကြောင်း သိရသည်။