သျှမ်းပြည် မြောက်ပိုင်း တအာင်း(ပလောင်) အမျိုးသား လွတ်မြောက်ရေးတပ်မတော် TNLA ထိန်းချုပ်ထားသည့် နမ့်ခမ်းမြို့ ဈေးပတ်ရောင်းချသူများကို လုပ်ကိုင်ခွင့် လိုင်စင် လုပ်ခိုင်းနေကြောင်း သတင်းရရှိသည်။

ပြီးခဲ့သည့် စက်တင်ဘာလ ၁၉ ရက်မှ စတင်ပြီး နမ့်ခမ်းမြို့ ဈေးပတ်ရောင်ချသူများကို မြို့နယ်စည်ပင်ယာရေးအဖွဲ့ရုံးထံ လုပ်ငန်းလုပ်ကိုင်ခွင့် လိုင်စင် သွားရောက် လျှောက်ထားရန် TNLA က ထုတ်ပြန်ထားကြောင်း နမ့်ခမ်းမြို့ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

“လုပ်ငန်းလိုင်စင်လုပ်တာက စည်ပင်ရုံးမှာ လုပ်ရတယ်။ တယောက်ကို ၁ သောင်းခွဲလောက်ပေးရတယ်။အခုထိတော့ လုပ်ငန်းလိုင်စင်မရှိရင် ဘာပြစ်ဒဏ်ရှိလဲမသိပေမဲ့ လိုင်စင်မရှိရင် မြို့ပြင်ပေးမထွက်ဘူးလို့ပြောတယ်။လိုင်စင်မရှိရင်တော့ ဂိတ်တွေကျော်လို့ မရဘူးလို့တော့ပြောတယ်။

ဆက်လက်ပြီး ယနေ့ (စက်တင်ဘာလ ၂၂ ရက်) မနက်ပိုင်းတွင် နမ့်ခမ်းမြို့တွင် လိုင်စင်မဲ့ယာဉ်များကို TNLA မှ စစ်ဆေးနေပြီး လိုင်စင်မရှိသည့် ယာဉ်များကို လိုင်စင်လုပ်ရန် တိုက်တွန်းမှုများ ပြုလုပ်နေ ကြောင်း နမ့်ခမ်းမြို့ ဒေသခံ အမျိုးသားတစ်ဦးက ဆက်ပြောသည်။

“မနက်တုန်းက စစ်နေတာ မဖွင့်ဘူး ဒဏ်ငွေလည်းမရိုက်သေးဘူး။ဒါမဲ့ ပရဟိတကားနဲ့ ဘုန်းကြီးကားတွေလည်း လိုင်စင်လုပ်ရမယ်လိုတော့ ပြောတယ်။နမ့်ခမ်းထဲမှာ ရှိတဲ့ ယာဉ်တွေ လိုင်စင် လုပ်ရမယ်ပြောတယ်။”ဟု နမ့်ခမ်းမြို့ ဒေသခံ အမျိုးသားတစ်ဦးက ဆက်ပြောသည်။

လိုင်စင်မဲ့ယာဉ်များကို မော်ဒယ်လ်အလိုက်သုံးပြီး ကျပ်ငွေ ၂ သိန်းမှ ကျပ်ငွေ ၃ သိန်းကျပ်အထိ၊ ကားအလတ်တစ်စီးလျှင် ကျပ်ငွေ ၃ သိန်းမှ ကျပ်ငွေ ၄ သိန်းကျပ်အထိ၊ ကားကြီးတစ်စီးလျှင် ကျပ်ငွေ ၄ သိန်းမှ ကျပ်ငွေ ၅ သိန်းကျပ် ပေးရမည်ဖြစ်ပြီး TNLA ထံ မှတ်ပုံတင် ထားသည့် ကားလိုင်စင်များသည် သက်တမ်း ၂ နှစ် ရှိမည်ဖြစ်ပြီး TNLA ထိန်းချုပ်ဒေသအတွင်း အသုံးပြုနိုင်ကြောင်း သိရသည်။

နမ့်ခမ်းမြို့အတွင်းရှိ လိုင်စင်များယာဉ်များကို TNLA မှ ယခုတွင် ဒုတိယအကြိမ်ဖြစ် လိုင်စင်များကို ထပ်မံလုပ်ဆောင်ခိုင်းနေပြီး အိမ်စီးကား၊ လုပ်ငန်းသုံးကား၊ ခရီးသည်တင်ကား၊ ကုန်တင်ကားများ အပြင် ဘုန်းကြီးကျောင်းကား နှင့် ပရဟိတကားများကိုပါ လိုင်စင်လုပ်ခိုင်းကြောင်း သိရသည်။

ပြီးခဲ့သည့် မေလတွင်လည်း TNLA ထိန်းချုပ်ထားသည့် နမ့်ခမ်းမြို့နှင့် နမ့်ဆန်မြို့တို့တွင် TNLA ၏ မော်တော်ယာဉ် မှတ်ပုံတင်ကြီးကြပ်ရေးဌာနမှ အိမ်စီးကား၊ လုပ်ငန်းသုံးကား၊ ခရီးသည်တင်ကားနှင့် ကုန်တင်ကားများကို ယာဉ်လိုင်စင် ပြုလုပ်ပေးသွားမည်ဖြစ်ပြီး ကားအမျိုးအစားအလိုက် အခွန်နှင့်ဝန်ဆောင်ခ ကျပ်ငွေ ၂ သိန်းကျပ်မှ ကျပ်ငွေ ၅ သိန်းကျပ်အထိ ပေးဆောင်ရမည်ဖြစ်ကြောင်း ထုတ်ပြန်ခဲ့သည်။