သျှမ်းပြည်တောင်ပိုင်း၊ ဆီဆိုင်မြို့တွင် ခိုးဆိုးလုယက်သူ များပြားလာခြင်းကြောင့် ဆေးရုံလူနာလာရောက်စောင့်သူများသည် ဆိုင်ကယ်များကို အဆောက်အအုံထဲထားပြီး အိပ်နေရသည့်အဆင့်ရောက်နေကြောင်း သတင်းရရှိသည်။

ပြီးခဲ့သည့် စက်တင်ဘာလ ပထမပတ်မှ စပြီး ဆီဆိုင်မြို့ ၊ဆီဆိုင်ဈေး ၊ ဆေးရုံ နှင့် ဈေးဆိုင်များတွင် ဆိုင်ကယ်ပျောက်ဆုံးမှု ပိုများပြားလာ၍ ဆေးရုံတွင်လည်း လုံခြုံရေးအစောင့်မရှိသောကြောင့် ဆိုင်ကယ်များကို လူနာကုတင်နားအထိ ထားကာ စောင့်အိပ်နေရကြောင်း ဒေသခံ အမျိုးသမီးတစ်ဉီးက သျှမ်းသံတော်ဆင့်ကိုပြောသည်။

“ခုက ခေတ်ကလည်း မကောင်းတော့ ခိုးဆိုးလုယက်တဲ့သူ များလာတာပေါ့။ ဆေးရုံမှာလည်း ဆိုင်ကယ် ခဏခဏပျောက်လို့ အခန်းထဲ ကုတင်ခြေရင်းမှာ ဆိုင်ကယ်ထားအိပ်ရတာ။ လူနာရော ဆိုင်ကယ်ရော ရောပြီးစောင့်ရတာပေါ့။ ဒီတစ်လအတွင်းမှာတင် ဆိုင်ကယ်ပျောက်တာ ကြားရတာ ၉ စီးကျော်ပြီထင်တယ်။”ဟု ၎င်းအမျိုးသမီးက ဆိုသည်။

ဆီဆိုင်မြို့မ ဈေးထဲတွင်လည်း စက်တင်ဘာလ အတွင်း ဆိုင်ကယ် ၃စီးထက်မနည်း ပျောက်ဆုံးခဲ့ပြီး တခြားသော လမ်းဘေးဈေးဆိုင်များတွင် ဆိုင်ကယ်ရပ်ထားစဉ် ပျောက်ဆုံးသွားသည်မှာ ၄စီး ကျော်ရှိနေပြီ ဖြစ်ကြောင်း သိရသည်။

ထိုကဲ့သို့ ဆိုင်ကယ် ပျောက်ဆုံးမှုများ မကြာခဏဖြစ်လာသောကြောင့် ပြည်သူများကို လမ်းသွားလမ်းလာ တစ်ယောက်တည်း ဆိုင်ကယ် မစီးသင့်ကြောင်းနှင့် ဆိုင်ကယ်ကို မိမိမြင်နိုင်သည့် အနီးဆုံးနေရာတွင်သာ ထားကြရန် ၎င်းအမျိုးသမီးက ထပ်လောင်း ပြောသည်။

အလားတူ တောင်ကြီး အဝေးသင်တက္ကသိုလ်နားရှိ အရှေ့ဖက်လမ်းတွင် ယမန်နေ့ (စက်တင်ဘာလ ၂၁) ရက်နေ့ ညနေ ၄ နာရီခွဲတွင် တက္ကသိုလ်လာတက်သည့် ကျောင်းသားနှစ်ဦးဆီမှ ဖုန်းအလုခံရကြောင်း ဒေသခံများထံမှ သိရသည်။

“အဲတက္ကသိုလ်နားမှာ လုယက်တာတို့က မကြာခဏ ဖြစ်နေတယ်။ ဖုန်းအလုခံခဲ့ရတဲ့ လူငယ်တွေက ဒီနှစ်မှ အဝေးသင် လာတက်တဲ့ ကလေးတွေ လုတဲ့သူကလည်း သေချာစောင့်ကြည့်ပြီး လိုက်လုတာ။ လူငယ်နှစ်ယောက်က ဆိုင်ကယ်စီးရင်း ဖုန်းပြောနေတာကို နောက်ကနေ ဆိုင်ကယ် တစ်စီးက လိုက်လာပြီး လုပြီး ထွက်ပြေးသွားတာ။”ဟု တောင်ကြီး ဒေသခံ အသက် ၄၀ ဝန်းကျင်ရှိ အမျိုးသားတစ်ဦးက သျှမ်းသံတော်ဆင့်ကို ပြောသည်။

ထို့အပြင် တောင်ကြီးတန်ဆောင်တိုင် ပွဲရက်နီးလာသည်နှင့် ခိုးဆိုးလုယက်မှုများလည်း မကြာခဏ ကြားသိလာရကြောင်းနှင့် တောင်ကြီးတန်ဆောင်တိုင် ပွဲတော်တွင်လည်း ဆိုင်ကယ်ခိုးမည့်သူများ ပိုများလာနိုင်သောကြောင့် ဂရုစိုက်စေလိုကြောင်း အဆိုပါ အမျိုးသားက ဆက်ပြောသည်။

ပြီးခဲ့သည့် စက်တင်ဘာလ (၁၉)ရက်တွင်လည်း တောင်ကြီးမြို့ ကံကြီးဘက်တွင် ဆိုက်ကယ်စီးနေသည့် အမျိုးသမီးနှစ်ယောက်နောက်မှ အမျိုးသားနှစ်ဦး ထပ်ကြပ်မခွာ လိုက်နေပြီး လုယက်မှုများကြုံတွေ့ခဲ့ရကြောင်း သိရသည်။

တောင်ကြီးမြို့သည် စစ်တပ်အာဏာမသိမ်းခင်က လွတ်လပ်စွာ လှုပ်ရှားသွားလာလို့ ရသော်လည်း စစ်အာဏာသိမ်းပြီးနောက်ပိုင်းတွင် နိုင်ငံရေးအခြေနေ မတည်ငြိမ်မှုများကို အခွင့်ကောင်းယူ၍ ခိုးဆိုးလုယက်သူ များပြားလာကြောင်း သိရသည်။