သျှမ်းပြည်တောင်ပိုင်း၊ ရွာငံမြို့နယ်တွင် စစ်ကော်မရှင်က စစ်ကြောင်းထိုးပြီး အမျိုးသမီး နှစ်ဦးအပါဝင် ဒေသခံ ၁၀ဦး ဖမ်းဆီးသွားကြောင်း စုံစမ်းသိရှိရသည်။

ပြီးခဲ့သည့် စက်တင်ဘာလ ၁၄ ရက်တွင် စစ်ကော်မရှင်က အင်အား ၂၀၀ ကျော်သည် ရွာငံမြို့နယ် အလယ်ချောင်ကျေးရွာကို စစ်ကြောင်းထိုး ဝင်ရောက်ပြီး အသက် ၃၀ ကျော်အမျိုးသမီး နှစ်ဉီးနှင့် အမျိုးသား ရှစ်ဦးကို ဖမ်းဆီးသွားပြီး နှစ်ရက်အကြာ စက်တင်ဘာ ၁၆ရက်တွင် အမျိုးသမီးနှစ်ဉီးကို ပြန်လည်လွှတ် ပေးခဲ့ကြောင်း ထိုကိစ္စရပ်ကိုသိသည့် အမျိုးသားတစ်ဉီးက သျှမ်းသံတော်ဆင့်ကို ပြောသည်။

“စစ်ကော်မရှင်ကတော့ ရွာကို စစ်ကြောင်း သုံးကြောင်းနဲ့ လာတယ်။ ဒီနားက တောထဲလည်း လက်နက်ကြီးနဲ့ ပစ်တယ်။ ဒရုန်းနဲ့လည်း အရင်ရှာဖွေပြီး ဝင်တာ။ ရွာက ဒေသခံ ၁၀ ဦးကိုလည်း ဖမ်းသွားတာ။ တချို့ဒေသခံက ဘာမသိဘူး ဒီတိုင်း စစ်ကြောင်းနဲ့ တွေ့လို့ အဖမ်းခံရတာ။ တချို့ကြတော့ တော်လှန်ရေးတပ်ဖွဲ့ဝင်တွေရဲ့ မိသားစု တွေပါတယ်။” ဟု ၎င်းအမျိုးသားတစ်ဦးက ပြောသည်။

စစ်ကော်မရှင်တပ်သည် တော်လှန်ရေးတပ်ဖွဲ့ဝင်များကို မတွေ့လျှင် ၎င်း၏ မိသားစုများကို ဖမ်းဆီး ခေါ်ဆောင်ခြင်း ခြိမ်းခြောက်ခြင်းများ ပြုလုပ်ကာ ဒေသခံပိုင်သည့် ကားများကိုလည်း ချောဆွဲ ယူဆောင်သွားကြောင်း အထက်ပါ အမျိုးသားက ပြောသည်။

“အနီးနားက တော်လှန်ရေးတပ်ဖွဲ့တွေကို သူတို့ အင်အားအလုံးရင်းနဲ့ ရှာဖွေနေတာ။ စက်တင်ဘာလ ၁၃ ရက်နေ့ကတောင် ထိတွေ့တိုက်ပွဲ ဖြစ်သေးတယ်။ နှစ်ဖက်လုံး ထိခိုက်မှုရှိတယ်။ စစ်ကော်မရှင်ဘက်က ပိုကျဆုံးတာပေါ့”ဟု တော်လှန်ရေးတပ်ဖွဲ့ဝင် အမျိုးသားတစ်ဦးက သျှမ်းသံတော်ဆင့်ကို ပြောသည်။

ဆက်လက်ပြီး ရွာငံမြို့နယ် ညောင်ပင်သာကျေးရွာနှင့် ကျောက်တောကျေးရွာကို ပြီးခဲ့သည့် ဩဂုတ်လ အစတွင် လေယာဉ်ဖြင့် ဗုံးကြဲတိုက်ခိုက်ခဲ့ခြင်းကြောင့် နေအိမ်များ မီးလောင်ပျက်စီးသွားပြီး ဒေသခံ ၈၀၀‌ကျော် စစ်ဘေးတိမ်းရှောင် နေရကြောင်း တော်လှန်ရေးတပ်ဖွဲ့ဝင် ရဲဘော်တစ်ဦးက ပြောသည်။

“အဲဒီရွာနှစ်ရွာက နဲနဲတောကျတဲ့ထဲ ပါတယ်။ ဘေးပတ်ပတ်လည်က တောတွေပဲ။ မြို့နဲ့လည်း အလှမ်းဝေးတော့ ဗုံးကြဲခံလိုက်ရတာ လူတွေ သိပ်မသိဘူး။ အဲတုန်းက ဒေသခံတွေ ရှောင်တိမ်းရတာ မြန်လို့ လူတွေမထိတာ။ အခုတော့ သူတို့ အကုန်ရှောင်တိမ်းနေရတယ်။ စစ်တပ်ကလဲ အဲဖက်ကို မကြာခဏ စစ်ကြောင်းထိုးနေတာ။”ဟု ၎င်း ရဲဘော်တစ်ဦးက ပြောသည်။

ပြီးခဲ့သည့် စက်တင်ဘာလ ၁၂ ရက်တွင် ရွာငံမြို့နယ် ကျောက်ငှက်ကျေးရွာအုပ်စုနှင့် အလယ်ချောင်ကျေးရွာ အုပ်စုတို့တွင် စစ်ကော်မရှင်က အင်အား (၁၀၀)ဝန်းကျင်ဖြင့် စစ်ကြောင်းထိုး၍ ရွာသားများကိုလည်း ရိုက်နှက်စစ်ဆေးမှုများ ပြုလုပ်ခဲ့သည်။

ယခုလက်ရှိ စစ်ကော်မရှင် တပ်သည် ကျောက်ငှက်ကျေးရွာ အုပ်စုတွင် တပ်စွဲထားပြီး ရွာသားများကိုလည်း ထမင်းထုတ်များပို့ခိုင်းကာ ရွာသားများပိုင် ပစ္စည်းများကို အတင်းအဓမ္မယူဆောင်နေကြောင်း ဒေသခံများ ကပြောသည်။

စစ်ကော်မရှင်သည် လာမည့် ဒီဇင်ဘာလ (၂၈) ရက်တွင် ကျင်းပမည့် အပိုင်း (၁) ရွေးကောက်ပွဲအတွက် ရွာငံမြို့နယ် မပါဝင်သေးသော်လည်း စစ်ကော်မရှင်တပ်က နေ့စဉ်နီးပါး စစ်ကြောင်းထိုးကာ နယ်မြေရှင်းလင်းရေး လုပ်ဆောင်နေခြင်း ဖြစ်ကြောင်း သိရသည်။