သျှမ်းပြည်တောင်ပိုင်း ရွာငံမြို့နယ် ကျောက်ငှက်ကျေးရွာအုပ်စုနှင့် အလယ်ချောင်ကျေးရွာအုပ်စုအတွင်း စစ်ကော်မရှင်တပ်က အင်အား (၁၀၀) ဝန်းကျင်ဖြင့် ယခုရက်ပိုင်း၌ စစ်ကြောင်းထိုးလာနေပြီး ကျေးရွာအတွင်း ရွာသားများကို ရိုက်နှက်စစ်ဆေးမှုများပြုလုပ်နေကြောင်း ဒေသခံများက ပြောသည်။
ပြီးခဲ့သည့် စက်တင်ဘာလ ၁၂ ရက်မှစ၍ ရွာငံမြို့နယ် ကျောက်ငှက်ကျေးရွာအုပ်စုထဲကို စစ်ကော်မရှင်တပ်သည် မြေပြင် အင်အား (၁၀၀) ဝန်းကျင့်ဖြင့် စစ်ကြောင်းထိုးလာနေပြီး ခြံသွားလာနေသည့် ဒေသခံများအား စစ်ဆေးမေးမြန်းခြင်း၊ ရိုက်နှက်ခြင်းနှင့် တောတောင်အတွင်း လက်နက်ကြီးပစ်ခတ်ခြင်း ပြုလုပ်နေကြောင်း ကျောက်ငှက်ကျေးရွာအုပ်စုမှ အမျိုးသားတစ်ဦးက သျှမ်းသံတော်ဆင့်ကို ပြောသည်။
“ရွာမှာ တပ်စွဲထားတာတော့ တစ်ပတ်လောက်ကြာပြီ၊ အခုထိ မပြန်ကြသေးဘူး။ ရွာသားတွေက သူတို့စစ်ကြောင်းရှိတော့ ခြံမသွားရဲဘူး။ ခြံသွားလို့ သူတို့နဲ့တွေ့ရင် ရိုက်နှက်ခံရသေးတာ။ သုံး၊ လေး ယောက်လောက် အရိုက်ခံရတယ်။ တချို့ဆိုရင် ကျောကုန်းတွေ ညိုကုန်တာ၊ ရွာမှာဆိုလည်း သူတို့က ရွာသားတွေကြက်တွေလဲ ပစ်စားတာ။ ဒီကောင်တွေရွာမှာရှိတော့ ရွာသားတွေ ကြောက်နေရတာပေါ့”ဟု ၎င်းက ဆိုသည်။
ထို့အပြင် စစ်ကော်မရှင်တပ်သည် အနီးတဝိုက် ကျေးရွာရှိ ပျူစောထီးများပါ ခေါ်ဆောင်လာပြီး တောတောင်ဘက်တွင် နေ့စဉ်အလှည့်ကျ စစ်ကြောင်းလှည့်ခိုင်းနေကြောင်း ၎င်းက ပြောသည်။
ပြီးခဲ့သည့် စက်တင်ဘာလ ပထမအပတ်တွင်လည်း ရွာငံမြို့နယ် မင်းပလောင်ကျေးရွာထဲကို စစ်ကော်မရှင်တပ် စစ်ကြောင်းထိုးလာသဖြင့် အဆိုပါကျေးရွာအနီးတဝိုက်ရှိ စစ်ဘေးရှောင်းများလည်း လုံခြုံရေး စိုးရိမ်နေရကြောင်း စစ်ဘေးရှောင်ကူညီသူ အသက် (၃၀) နှစ်ခန့် အမျိုးသမီးတစ်ဦးက ပြောသည်။
“ခုတလော စစ်ကော်မရှင်က မကြာခဏ ဆိုသလို စစ်ကြောင်းလာတယ်။ စစ်ရှောင်တွေအတွက်လည်း လုံခြုံမှု ခက်ခဲတာပေါ့။ သူတို့မှာ စားစရာလည်း လုံလောက်မှု မရှိဘူး။ စစ်ရှောင်တွေထဲမှာ သက်ကြီးရွယ်အိုတွေ ပါတယ်။ ကလေးတွေရော ကျန်းမာရေးစောင့်ရှောက်မှု အားနည်းနေတယ်။ ဆေးက မလုံလောက်တာနဲ့ ဆေးကုပေးတဲ့သူ အလောက်ငှ မရှိတာနဲ့ အရမ်းခက်ခဲနေတယ်”ဟု ၎င်းက ပြောသည်။
ယင်းကဲ့သို့ ဆေးဝါးမလုံလောက်မှုကြောင့် ပြီးခဲ့သော မတ်လတွင် ကလေးငယ်တစ်ဦး ဝမ်းပျက်ဝမ်းလျှောခြင်း ကြောင့် အသက်ဆုံးရှုံးခဲ့ရသည့်အပြင် စစ်ဘေးရှောင် ဦးရေ (၂၀၀) လည်း အရေပြားရောဂါ ခံစားနေရကြောင်း သိရသည်။
စစ်ကော်မရှင်သည် လာမည့် ဒီဇင်ဘာလ (၂၈) ရက်တွင် ကျင်းပမည့် အပိုင်း (၁) ရွေးကောက်ပွဲအတွက် ရွာငံမြို့နယ် မပါဝင်သေးသော်လည်း စစ်ကော်မရှင်တပ်က နေ့စဉ်နီးပါး စစ်ကြောင်းထိုးကာ နယ်မြေရှင်းလင်းရေး လုပ်ဆောင်နေခြင်း ဖြစ်ကြောင်း သိရသည်။
၂၀၂၄ ခုနှစ် ဒီဇင်ဘာလ ၂၁ ရက်တွင်လည်း ရွာငံမြို့နယ် ရေလှကျေးရွာမှ စစ်ကော်မရှင်တပ်သည် အင်အား (၁၀၀) ခန့်ဖြင့် မင်းပလောင်ကျေးရွာသို့ စစ်ကြောင်းလာစဉ် ဓနုပြည်နယ်အမျိုးသား ကာကွယ်ရေးတပ်တော် (DSNDA) နှင့် ထိတွေ့တိုက်ပွဲဖြစ်ပွားခဲ့ရာ မင်းပလောင်ရွာမှ စစ်ဘေးရှောင် (၇၀၀) ကျော်လည်း ဘေးလွတ်ရာသို့ ထွက်ပြေးတိမ်းရှောင်ခဲ့ရသည်။
Leave a Comments