သျှမ်းပြည်တောင်ပိုင်း ပင်လောင်းမြို့နယ်ရှိ စစ်ကော်မရှင် လက်လွှတ်ဆုံးရှုံးခဲ့သည် ကျေးရွာအချို့ကို ရွေးကောက်ပွဲမတိုင်မီ စစ်ကော်မရှင်လက်အောက်ခံ ပအိုဝ်းပြည်သူ့စစ် (PNO/PNA) က ပြန်လည်ထိန်းချုပ်ခဲ့ကြောင်း သတင်းရရှိသည်။

ပြီးခဲ့သည့် ၂၀၂၃ ခုနှစ် မတ်လတွင် ပင်လောင်းမြို့နယ် တောင်မဲသင်းကျေးရွာ၊ နန်းနိမ့်ကျေးရွာ၊ ပင်ပွဲကျေးရွာနှင့် လုံးပျဉ်ကျေးရွာတို့တွင် စစ်ကော်မရှင်တပ်၊ PNA ပူးပေါင်းတပ်တို့နှင့် ကရင်နီအမျိုးသားကာကွယ်ရေးတပ် KNDF တို့ တိုက်ပွဲဖြစ်ပွားခဲ့ပြီး စစ်ကော်မရှင်နှင့် PNA ပူးပေါင်းတပ်တို့က ၎င်းနယ်မြေကို လက်လွှတ်ဆုံးရှုံးခဲ့ရသည်။

ယခုနှစ် ၂၀၂၅ ခုနှစ် သြဂုတ်လနှောင်းပိုင်းတွင် စစ်ကော်မရှင်ဘက်က လာမည့် ဒီဇင်ဘာလ (၂၈) ရက်တွင် စတင်ကျင်းပမည့် ရွေးကောက်ပွဲ အပိုင်း(၁) ထဲ (၁၀၂)မြို့နယ် ကျင်းပသွားမည်ဟု တိုင်းနှင့်ပြည်နယ်အလိုက် စာရင်းထုတ်ပြန်ခဲ့ရာ ထိုထဲတွင် သျှမ်းပြည်မှ (၁၂)မြို့နယ် ပါဝင်ခဲ့သည်။

ထိုသို့ စာရင်းထုတ်ပြန်လာပြီးနောက် စစ်ကော်မရှင်သည် ၎င်းလက်လွှတ်ဆုံးရှုံးခဲ့ရသည့် နယ်မြေများကို ပြန်လည်ရယူရန်အတွက် လေကြောင်းဗုံးကြဲတိုက်ခိုက်မှုကို ဆက်တိုက်လုပ်ခဲ့သည်။

အလားတူပင် စစ်ကော်မရှင်၏ လက်အောက်ခံ PNA လည်း ၎င်းလက်လွှတ်ဆုံးရှုံးခဲ့သည့် နယ်မြေများကို မြေပြင်ထိုးစစ်ဆင်မှု အပြင်းအထန် ပြုလုပ်လာသည်။

“အခုတော့ နန်းနိမ့်ဘက်ကတော့ တိုက်ပွဲငြိမ်သွားပြီ။ ပြည်သူတွေတော့ မပြန်ရသေးဘူး၊ နေအိမ်ထဲမှာ မိုင်းတွေရှိနိုင်လို့ မိုင်းတွေ ရှင်းလင်းပေးနေတာ။ ရွေးကောက်ပွဲ မတိုင်ခင် ထိန်းချုပ်နိုင်ခဲ့တာပေါ့လေ။ ရွေးကောက်ပွဲပြီးရင်တော့ အားလုံးက ငြိမ်းချမ်းပြီး လွတ်လပ်သွားမယ်”ဟု PNA သတင်းနှင့် ပြန်ကြားရေး တာဝန်ခံ ခွန်စံအောင်က သျှမ်းသံတော်ဆင့်ကို ပြောသည်။

ထို့အပြင် စစ်ကော်မရှင်၏ ရွေးကောက်ပွဲကို လာမည့်ဒီဇင်ဘာလတွင် ပထမပိုင်းအနေဖြင့် ကျင်းပမည်ဖြစ်ပြီး PNO ဘက်မှလည်း ပြည်ပရောက် ပအိုဝ်းပြည်သူများ မဲပေးရန် ဖိအားပေးမှုများလည်း ရှိနေကြောင်း သိရသည်။

“အခုလောလောဆယ် တိုက်ပွဲဖြစ်တာ မကြားရတော့ဘူး။ PNA/PNO ဘက်က ပြန်ရသွားတာလားတော့ မသိဘူး။ စစ်ရှောင်တွေကတော့ မပြန်သေးဘူး” ဟု ပင်လောင်းဒေသခံ အသက် ၄၀ ဝန်းကျင် အမျိုးသားတစ်ဦးက ပြောသည်။

ပြီးခဲ့သည့် ၂၀၂၃ ခုနှစ် မတ်လအတွင်း ဖြစ်ပွားသည့် တိုက်ပွဲကြောင့် ဒေသခံ ၃ ထောင်ကျော်သည် ပင်လောင်းမြို့နှင့် ဆောင်းပြောင်းကျေးရွာဘက်သို့ ထွက်ပြေးတိမ်းရှောင်ခဲ့ပြီး ယနေ့အချိန်ထိ နေရပ်မပြန်နိုင်သေးဘဲ လက်ရှိတွင် စစ်ဘေးရှောင်များ အတွက် အလှူရှင်များ မရှိတော့သဖြင့် စားဝတ်နေရေး ခက်ခဲလာကြောင်း သိရသည်။