သျှမ်းပြည်တောင်ပိုင်း ဆီဆိုင်မြို့နယ် လွယ်ပွတ်ကျေးရွာအနီး ဆိုင်ခေါင်-မောင်မယ်သွားလမ်းတွင် ဆိုင်ကယ်တစ်စီးကို ရပ်တန့်စစ်ဆေးရာ စိတ်ကြွဆေးပြား ၅,၀၀၀ (ငါးထောင်) ပြား သိမ်းဆည်းရမိကြောင်း စစ်ကော်မရှင် လက်အောက်ခံ မူးယစ်/ ရဲတပ်ဖွဲ့က ယမန်နေ့( စက်တင်ဘာ ၁၀)ရက်တွင် သတင်းထုတ်ပြန်သည်။
ပြီးခဲ့သည့် စက်တင်ဘာ ၉ ရက်တွင် ဆီဆိုင်မြို့နယ် ဆိုင်ခေါင်-မောင်မယ်သွားလမ်းတွင် အသက် (၂၉) နှစ်အရွယ် ခွန်မောင်ကံ (ခ) သိန်းဇော် မောင်းနှင်ပြီး အသက် (၄၄) နှစ်အရွယ် မနန်းဗွာလိုက်ပါလာသည့် ဆိုင်ကယ်အား ရပ်တန့်စစ်ဆေးရှာဖွေရာ စိတ်ကြွဆေးပြား ငါးထောင်ကို သိမ်းဆည်းရမိခြင်း ဖြစ်ကြောင်း ရေးသားဖော်ပြထားသည်။
ခွန်မောင်ကံ (ခ) သိန်းဇော်နှင့် မနန်းဗွာတို့ကို ဘန်းယဉ်နယ်မြေရဲစခန်းတွင် မူးယစ်ဆေးဝါးနှင့် စိတ်ကိုပြောင်းလဲ စေသော ဆေးဝါးများဆိုင်ရာ ဥပဒေအရ အမူဖွင့်အရေးယူထားကြောင်း သိရသည်။
အလားတူ စက်တင်ဘာလ ၃ ရက်တွင် တာချီလိတ်မြို့ ရန်အောင်မြေရပ်ကွက်တွင် ဇင်မင်းထွန်း (ခ) ကိုဇင် မောင်းနှင်ပြီး မညွန့်ညွန့်တင် လိုက်ပါလာသည့် ဆိုင်ကယ်တစ်စီးကို ရပ်တန့်စစ်ဆေးရာ စိတ်ကြွရူးသွပ်ဆေးပြား ၄၀,၀၀၀ (လေးသောင်း) ပြား သိမ်းဆည်းရမိကြောင်း သိရသည်။
ပြီးခဲ့သည့် သြဂုတ်လ ၃၀ ရက်နေ့တွင်လည်း သျှမ်းပြည်အရှေ့ပိုင်း မိုင်းပျဉ်းမြို့နယ် ဟောင်ကန်ကျေးရွာအုပ်စု နားယုန်ကျေးရွာအနီးတွင် မက်မန်းမြို့ဘက်မှ မိုင်းပျဉ်းမြို့ဘက်သို့ မောင်းနှင်လာသည့် ကားတစ်စီးကို ရပ်တန့်စစ်ဆေးခဲ့ရာ အိုက်စ် ၄၂၀ ကီလို (ဒေသတန်ဖိုးငွေ ကျပ် ၃ ဒသမ ၃၆ ဘီလီယံ) အားဖမ်းဆီးရမိခဲ့ကြောင်း စစ်ကော်မရှင် လက်အောက်ခံ မူးယစ်/ ရဲတပ်ဖွဲ့၏ ထုတ်ပြန်ချက်အရ သိရသည်။
Leave a Comments