သျှမ်းပြည် တောင်ကြီးမြို့ရှိ နေအိမ်တစ်လုံးတွင် လျှပ်စစ်ဝါယာရှော့ခ်ကြောင့် မီးလောင်မှုဖြစ်ပွားခဲ့ကြောင်း သတင်းရရှိသည်။
ယမန်နေ့ (စက်တင်ဘာလ ၁၀ ရက်) နေ့လယ် ၁၂ နာရီခွဲဝန်းကျင်တွင် တောင်ကြီးမြို့၊ ညောင်ရွှေ ဟော်ကုန်းရပ်ကွက် နယ်မြေ (၃) ရှိ နေအိမ်တစ်လုံးတွင် လူမရှိချိန် လျှပ်စစ်ဝါယာရှော့ခ် ဖြစ်ပွားမှုမှတဆင့် နေအိမ်မီးလောင်မှု ဖြစ်ပွားခဲ့ကြောင်း တောင်ကြီးမြို့ ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
“သူတို့က မနက်ဆို ဈေးသွားကြတာ အိမ်မှာ ခွေးနှစ်ကောင်ပဲ ကျန်ခဲ့တယ်။ မီးက ဝါယာရှော့ခ်ကြောင့် လောင်တယ် ပြောကြတယ်။ အိမ်ကလည်း အလုံပိတ်၊ သူတို့က လျှပ်စစ်နဲ့ ပတ်သက်တဲ့ ပစ္စည်းတွေလည်း ပြင်တယ်။ အိမ်ထဲမှာလည်း ပလစ်စတစ်တွေ အလှကုန်တွေ အစုံပါပဲ ပြည့်နေတာ”ဟု ဖြစ်စဉ်သိရှိသူ တောင်ကြီးမြို့ ဒေသခံ အမျိုးသမီးတစ်ဦးက ပြောသည်။
အဆိုပါ မီးလောင်မှုကြောင့် ပျက်စီးဆုံးရှုံးမှု အသေးစိတ်ကို မသိရဘဲ ဘေးပတ်ဝန်းကျင် နေအိမ်များလည်း ထိတ်လန့်မှု ဖြစ်ခဲ့ရကြောင်း ၎င်းက ဆက်ပြောသည်။
အလားတူ ယမန်နေ့ (စက်တင်ဘာလ ၁၀ ရက်) နံနက်ပိုင်းတွင် တန့်ယန်းမြို့ ရပ်ကွက် (၂) ရှိ နေအိမ်တစ်လုံး၌ ဆိုလာပြားဘတ်ထရီမှ လျှပ်စစ်ဝါယာရှော့ခ်ဖြစ်ပြီး မီးလောင်မှု ဖြစ်ပွားခဲ့ခြင်းကြောင့် နေအိမ်ထဲ သိုလှောင်ထားသည့် ရေတိုင်ကီ၊ ဆောက်လုပ်ရေးနှင့် အိမ်သုံးပစ္စည်းများ ပျက်စီးဆုံးရှုံးခဲ့ကြောင်း အရန်မီးသတ်တပ်ဖွဲ့ တာဝန်ရှိသူတစ်ဦးက သျှမ်းသံတော်ဆင့်ကို ပြောသည်။
စစ်ကော်မရှင်တပ်က အာဏာသိမ်းပြီးနောက်ပိုင်း လျှပ်စစ်မီး မှန်ကန်စွာ မရရှိခြင်း၊ မီးအားမနိုင်ခြင်းတို့ကြောင့် ဝါယာရှော့ခ်ဖြစ်ကာ မီးဘေးအန္တရာယ်များ ဖြစ်ပွားနိုင်သဖြင့် ပြည်သူများအထူးဂရုစိုက်သင့် သည်။
လျှပ်စစ်မီးများ ပုံမှန်မရရှိတော့သည့်အတွက် လက်ရှိတွင် ပြည်သူများက ဖယောင်းတိုင်မီး၊ နေရောင်ခြည်စွမ်းအင်သုံး ဆိုလာနှင့် ဘတ်ထရီတို့ကို အားကိုး၍ အသုံးပြုနေရပြီး သျှမ်းပြည်အတွင်း ဆိုလာပြားဘက်ထရီမှတဆင့် မကြာခဏ မီးလောင်ကျွမ်းမှု ဖြစ်ပွားလေ့ရှိသည်။
Leave a Comments