သျှမ်းပြည်တောင်ပိုင်း၊ ညောင်ရွှေမြို့နယ်တွင် ငလျင်ဘေးဒဏ် ခံစားခဲ့ရသည့် အင်းလေးပြည်သူများကို ၅ လကျော်အကြာ ရွေးကောက်ပွဲနီးမှ စစ်ကော်မရှင်က ငွေကြေး လာရောက် ထောက်ပံ့သွားကြောင်း သတင်းရရှိသည်။
ယမန်နေ့ (စက်တင်ဘာလ ၈ ရက်) တွင် အင်းလေးဒေသသို့ စစ်ကော်မရှင် လက်အောက်ခံ သျှမ်းပြည်နယ်အစိုးရအဖွဲ့မှ ငလျင်ဘေးဒဏ်ခံရသည့် နေအိမ်များအတွက် ငွေကျပ် သန်းပေါင်း ငါးထောင်ကျော် လာရောက်ထောက်ပံ့ခဲ့ကြောင်း သိရသည်။
ထိုသို့ စစ်ကော်မရှင် လက်အောက်ခံ သျှမ်းပြည်နယ်အစိုးရအဖွဲ့က ၅ လကျော်အကြာ ငလျင်ဘေးဒဏ်သင့်သူများကို ရွေးကောက်ပွဲရက်နီးမှ ထောက်ပံ့ငွေ ပေးနေသည်မှာ ရွေးကောက်ပွဲနှင့် ဆက်စပ်မှု ရှိနိုင်ကြောင်း အသက် ၃၀ ဝန်းကျင် အင်းလေးဒေသခံ အမျိုးသားတစ်ဦးက ပြောသည်။
“သူတို့ ခုလိုမျိုး လာပြီး ငွေအင်အား ကူညီပေးတာတော့ ကောင်းပါတယ်၊ ငလျင်က ဖြစ်ပြီး လပိုင်းတောင် ကြာနေပြီ။ ဒီကြားထဲမှာ အင်းလေးက ရေဘေး၊ လေဘေးပါ ထပ်ခံထားရတာ။ သူတို့ လာထောက်ပံ့တဲ့ ငွေတွေက နိုင်ငံတော်ရဲ့ ငွေလား ဒါမှမဟုတ် နိုင်ငံတကာက ကူညီထားတဲ့ ငွေလားတော့ မသိဘူး။ ရွေးကောက်ပွဲနီးမှ လာထောက်ပံ့တာက သူတို့ရဲ့ လှည့်ကွက်လည်း ဖြစ်နိုင်သလို မဲဆွယ်တာလည်း ဖြစ်နိုင်တယ်”ဟု အဆိုပါ အမျိုးသားက သျှမ်းသံတော်ဆင့်ကို ပြောသည်။
ငလျင်ဘေးဒဏ်ခံရသူများသည် ပြန်လည်ထူထောင်ရန် ခက်ခဲလာသောကြောင့် ယာယီတဲဖြင့်သာ ဖြစ်သလို နေထိုင်နေကြရပြီး တချို့သော အိမ်များမှာ လုံးဝ ပျက်စီးသွားခြင်းကြောင့် နေစရာမရှိသူများလည်း အများအပြား ရှိနေကြောင်း အဆိုပါ အမျိုးသားက ဆက်ပြောသည်။
အဆိုပါ ငွေကြေးထောက်ပံ့ရာတွင် ကေလာရွာ၊ ပုလဲဦးရွာ၊ ဟဲယာရွာမ၊ မြောင်းဝကြီး ရွာနှင့် ညောင်ဝန်းကျေးရွာ အတွက်သာ ထောက်ပံ့ငွေစာရင်း ပါကြောင်းနှင့် အခြားသော ငလျင်ဘေးဒဏ်ခံရသည့် ကျေးရွာများ မပါသောကြောင့် စိတ်မကောင်းဖြစ်မိကြောင်း အင်လေးဒေသခံ လူငယ်တက်ကြွလှုပ်ရှားသူ အမျိုးသားတစ်ဦးက ပြောသည်။
“မနေ့က ထောက်ပံ့ကြေး ပေးတဲ့အထဲမှာ ရွာငါးရွာအတွက်ပဲ ပါတယ်။ တခြားရွာတွေလည်း ခံရတာကို သူတို့လည်း ရသင့်တာပေါ့။ တစ်အိမ်ကို ဘယ်လောက်နှုန်းနဲ့ ထောက်ပံ့ကြေး ပေးအပ်မလဲတော့ မသိဘူး၊ ကျနော်တို့လည်း စောင့်ကြည့်နေတုန်းပဲ။ များများပျက်စီးတဲ့သူကို များများထောက်ပံ့မှာလား ဘယ်လိုလဲတော့ မသိရသေးပါဘူး”ဟု အဆိုပါ လူငယ်အမျိုးသား တစ်ဦးက ပြောသည်။
စစ်ကော်မရှင်လက်အောက်ခံ သျှမ်းပြည်အစိုးရအဖွဲ့မှ ထောက်ပံ့သည့် ဟဲယာရွာမအတွက် ငွေကျပ် သန်းတစ်ထောင်ရရှိပြီး ငလျင်ကြောင့် ပျက်စီးခဲ့သည့် အိမ်ခြေ ၁၀၀ ရှိပါ တစ်အိမ်လျှင် ငွေကျပ် သိန်း(၁၀၀) စီ အချိုးကျ ရရှိမည်ဖြစ်ကြောင်း ၎င်းက ထပ်လောင်းပြောသည်။
ပြီးခဲ့သည့် မတ်လ ၂၈ ရက်တွင် လှုပ်ခတ်ခဲ့သော အင်အားပြင်း စစ်ကိုင်းငလျင်ကြောင့် အင်းလေးဒေသတွင် နေအိမ် ၄၀၀၀ နီးပါး ပျက်စီးသွားပြီး လူဦးရေ ၄၀ ထက်မနည်း သေဆုံးခဲ့ရသည်။
လာမည့် စက်တင်ဘာလ ၂၂ ရက်နေ့မှ အောက်တိုဘာလ ၉ ရက်နေ့အထိ အင်းလေးဖောင်တော်ဦး ဘုရားပွဲကို စည်ကားသိုက်မြိုက်စွာ ကျင်းပသွားမည်ဖြစ်ပြီး ထိုဘုရားပွဲကို စစ်ကော်မရှင်နှင့် ပအိုဝ်းပြည်သူ့စစ် PNO တို့က လုံခြုံရေးယူ ဆောင်ရွက်ပေးသွားမည် ဖြစ်ကြောင်း သိရသည်။
Leave a Comments