သျှမ်းပြည် လားရှိုးမြို့ ပြည်သူ့ဆေးရုံကြီးတွင် ဆေးကုသမှု ခံယူနေသည့် ဗုံးမှန်ဒဏ်ရာရ နောင်ပိန်စစ်ရှောင်တစ်ဦး ရောဂါအခံဖြင့် သေဆုံးသွားကြောင်း စုံစမ်းသိရသည်။
ယနေ့ (စက်တင်ဘာလ ၄ ရက်) နံနက် ၁၀ နာရီခွဲကျော်တွင် လားရှိုးမြို့ရှိ ပြည်သူ့ဆေးရုံကြီး၌ ဆေးကုသမှု ခံယူနေသည့် ကျောက်မဲမြို့နယ် နောင်ပိန်တိုက်နယ် ပင်တိန်ရွာနေ အသက် (၆၀) ကျော်အရွယ်ရှိ ဦးမာလာ သည် နာတာရှည်ရောဂါအပြင် ဗုံးဆံထိမှန်ထားသည့် ဒဏ်ရာများကြောင့် သေဆုံးသွားခဲ့ကြောင်း စစ်ရှောင်ကူညီသူများက ပြောသည်။
“ဦးမာလာက အသက် ၆၀ ကျော် ရှိပြီ၊ ပင်တိန်ရွာက။ သူက နောင်ပိန် အလယ်ကျောင်းမှာ ဗုံးကြဲခံရပြီး ဒဏ်ရာရတဲ့ထဲက တစ်ယောက်၊ နဂိုထဲက နာတာရှည် ရောဂါအခံ ရှိထားပြီး သမားတော်နဲ့ အမြဲတမ်း ပြနေရတဲ့လူတစ်ယောက်။ ဗုံးဆံမှန်တော့ ခံနိုင်ရည် မရှိတော့တာ”ဟု လားရှိုးမြို့တွင် စစ်ဘေးရှောင်ကူညီနေသည့် လူငယ်အမျိုးသားတစ်ဦးက သျှမ်းသံတော်ဆင့်ကို ပြောသည်။
လားရှိုးမြို့ ပြည်သူ့ဆေးရုံတွင် တက်ရောက် ဆေးကုသသည့် ဒဏ်ရာရ နောင်ပိန်စစ်ဘေးရှောင် (၄၂) ဦးထဲတွင် ယခုစစ်ရှောင်အမျိုးသားသည် ပထမဆုံး သေဆုံးခြင်းဖြစ်ပြီး လက်ရှိတွင် ဆေးရုံ၌ ဆေးကုသမှု ဆက်လက်ခံယူနေသူ နောင်ပိန်စစ်ရှောင် (၁၀) ဦးကျော် ကျန်ရှိနေသေးကြောင်း သိရသည်။
ပြီးခဲ့သည့် ဩဂုတ်လ ၂၀ ရက်တွင် TNLA ပူးပေါင်းတပ်နှင့် စစ်ကော်မရှင်တပ်တို့ မြေပြင်ထိတွေ့တိုက်ပွဲ ပြင်းထန်နေသည့် ကျောက်မဲမြို့နယ် နောင်ပိန်တိုက်နယ်အတွင်း ပင်တီးကျေးရွာ မဇ္ဈိမာရာမ အလယ်ကျောင်း လေကြောင်းဖြင့် ပေါင် ၅၀၀ ဗုံးတစ်လုံး တိုက်ခိုက်ခံရခြင်းသည်။
အဆိုပါ လေကြောင်းဗုံးကြဲမှုအတွင်း နောင်ချိုစစ်ဘေးရှောင် ကလေး (၂) ဦး အပါအဝင် (၁၇) ဦး သေဆုံးပြီး (၄၀) ကျော် ထိခိုက်ဒဏ်ရာရခဲ့ကြောင်း ဒေသတွင်း လူမှုကူညီရေးအသင်းများထံမှ သိရပြီး ဒဏ်ရာရသူ အများစုမှာ လားရှိုးမြို့ ပြည်သူ့ဆေးရုံကြီးတွင် ဆေးကုသမှု ခံယူလျက်ရှိသည်။
လက်ရှိတွင် စစ်ကော်မရှင်တက်မှ ကျောက်မဲမြို့ဘက် မြေပြင်စစ်ကြောင်းထိုး ချီတက်နိုင်ရန် လေကြောင်းပစ်ကူဖြင့် ဗုံးကြဲတိုက်ခိုက်နေခြင်းကြောင့် ကျောက်မဲ၊ သီပေါမြို့ပေါ် ရပ်ကွက်များနှင့် ပြည်ထောင်စုလမ်းမကြီးတလျှောက် ကျေးရွာများမှ စစ်ဘေးရှောင် တစ်သောင်းကျော်မှာ ဘေးလွတ်ရာ ကျေးရွာများနှင့် လားရှိုးမြို့ဘက်သို့ ထပ်မံတိမ်းရှောင်လျက်ရှိပြီး အရေးပေါ် အကူအညီများ လိုအပ်နေကြောင်း စစ်ရှောင်ကူညီသူများထံမှ သိရသည်။
Leave a Comments