ကိုးကန့်တပ် MNDAA အခိုင်အမာ ပြင်ဆင်တည်ဆောက်ထားသည့် သိန္နီမြို့ကို ပြန်ပေးရန် စစ်ကော်မရှင်ဘက် တောင်းဆိုနေလျက်ရှိရာ ယခုလမှစ၍ သိန္နီမြို့ထဲ စစ်ကော်မရှင်လက်အောက်ခံ ဌာနဆိုင်ရာ ဝန်ထမ်းများ ပြန်ဝင်လာတော့မည်ဟု ဒေသခံများက ပြောသည်။

သိန္နီမြို့ကို တစ်နှစ်ခွဲကျော် ထိန်းချုပ်ထားသည့် ကိုးကန့်တပ်ဖွဲ့ MNDAA သည် စက်တင်ဘာလအတွင်း ထပ်မံတပ်ဆုတ်ရမည်ဟု ပြီးခဲ့သော ဇွန်လကတည်းက သတင်းများ ကျယ်ကျယ်ပြန်ပြန့် ထွက်ပေါ်နေခြင်း ဖြစ်သည်။

“ပြီးခဲ့တဲ့ အပတ်တုန်းက လားရှိုးမှာ မှတ်ပုံတင်သွားလုပ်တုန်းက သူတို့ ပြောတယ်။ လားရှိုးကို မလာတော့နဲ့၊ ဒီလကုန်ရင် သိန္နီမှာ ပြန်လာလုပ်ပေးမယ်တဲ့။ မှတ်ပုံတင်နဲ့ စမတ်ကတ် လုပ်ချင်တဲ့သူတွေ စက်တင်ဘာလကျရင် သိန္နီမှာ ပြန်လာလုပ်ပေးမယ် ပြောတယ်” ဟု လားရှိုးမြို့တွင် မှတ်ပုံတင်သွားလုပ်ခဲ့သည့် သိန္နီမြို့ခံ အမျိုးသမီးတစ်ဦးက ပြောသည်။

သိန္နီမြို့ကို စက်တင်ဘာလ ၁၉ ရက်နေ့မှစ၍ စစ်ကော်မရှင် လက်အောက်ခံ ဌာနဆိုင်ရာ ဝန်ထမ်းများ ပြန်ဝင်လာမည်ဟု ဒေသခံများက ပြောသော်လည်း သျှမ်းသံတော်ဆင့်မှ သီခြားအတည်ပြုနိုင်ခြင်း မရှိပေ။

သို့သော် သိန္နီမြို့ထဲ စစ်ကော်မရှင်လက်အောက်ခံ ဌာနဆိုင်ရာဝန်ထမ်းများ ပြန်ဝင်လာမည့်သတင်း သေချာသည်ဟုလည်း သိန္နီမြို့ခံတစ်ဦးက အတည်ပြုသည်။

“အခု (ဒီဇင်ဘာလ)ထဲ ဝင်လာဖို့ သေချာပြီ၊ ဒါပေမယ့် ဘယ်ဌာနတွေ အရင်ဝင်မှာလဲတော့ မသိသေးဘူး။ တကယ်ဆုတ်မလား၊ ပူးတွဲအုပ်ချုပ်မလားတော့ မသိဘူး။ စစ်ကော်မရှင်ဘက်က ဌာနဆိုင်တွေကတော့ သူတို့ဆီ စာဝင်ပြီလို့ ပြောလာတယ်” ဟု ၎င်းက ပြောသည်။

ပြီးခဲ့သည့် သြဂုတ် ၁၄ ရက်နေ့တွင်လည်း လားရှိုးမြို့ရှိ ဆင်နှစ်ကောင်ဟိုတယ်၌ ကိုးကန့်တပ် MNDAA နှင့် စစ်ကော်မရှင်၏ ကိုယ်စားလှယ်တို့ ဆွေ့ဆုံဆွေးနွေးခဲ့ရာ သိန္နီမြို့အား ပြန်ပေးရန် စစ်ကော်မရှင်ဘက်က တောင်းဆိုခဲ့သည်။

သို့သော် စစ်ကော်မရှင်၏ တောင်းဆိုမှုများကို ကိုးကန့်တပ် MNDAA ဘက်က လက်မခံသဖြင့် အဖြေမထွက်ဘဲ ပြီးဆုံးသွားခဲ့သည်။

စစ်ကော်မရှင်က ပြန်တောင်းနေသည့် သိန္နီမြို့သည် တရုတ်-မြန်မာနယ်စပ် ကုန်သွယ်ရေးအတွက် အလွန်အရေးပါသလို သိန္နီမြို့နယ်တွင် မူဆယ်နှင့် ချင်းရွှေဟော် နယ်စပ်ကုန်သွယ်ရေးအတွက် ကိုးကန့်တပ် MNDAA ၏ အခွန်ဌာန စစ်ဆေးရေးဂိတ် ၆ ခု ဖွင့်လှစ်ထားကြောင်း သိရသည်။

“စစ်တပ် (စစ်ကော်မရှင်တပ်) ကို အားမပေးသလို ကွန်မြူနစ်ဆန်တဲ့ ကိုးကန့်တပ်ကိုလည်း မနှစ်သက်ဘူး။ အခု သိန္နီမှာ လုပ်စားရတာ အရမ်းခက်လာပြီ၊ လူတွေငတ်ကုန်တော့မယ်။ စစ်တပ် လာအုပ်ချုပ်လည်း ဘာထူးလဲ၊ ဘာမှ တိုးတက်လာမှာ မဟုတ်ဘူး” ဟု သိန္နီမြို့ခံ အမျိုးသမီးတစ်ဦးက ပြောသည်။

လက်ရှိ သိန္နီမြို့တွင် ကိုးကန့်တပ် MNDAA များ စက်တင်ဘာလအတွင်း ထပ်မံတပ်ဆုတ်ရမည်ဟု သတင်းများ ကျယ်ကျယ်ပြန့်ပြန့် ထွက်ပေါ်နေသော်လည်း သိန္နီမြို့ပေါ်တွင် ပညာရေး၊ ကျန်းမာရေးနှင့် လမ်းပန်းဆက်သွယ် ရေးကဲ့သို့ ပြန်လည်ထူထောင်ရေး လုပ်ငန်းများ အရှိန်မပျက် ဆက်လက် လုပ်ဆောင်နေကြောင်း ဒေသခံများက ပြောသည်။

ပြီးခဲ့သည့် ၂၀၂၄ ခုနှစ် သြဂုတ်လတွင် လားရှိုးမြို့ကို ကိုးကန့်တပ် MNDAA ပါဝင်သော မြောက်ပိုင်းညီနောင် မဟာမိတ်အဖွဲ့က သိမ်းပိုက်ထိန်းချုပ်နိုင်ခဲ့ပြီး အုပ်ချုပ်ရေးယန္တရား လည်ပတ်နေချိန် တရုတ်နိုင်ငံ၏ ကြားဝင်ပေးမှုဖြင့် ယခုနှစ် ၂၀၂၅ ဧပြီလ ၂၁ ရက်နေ့တွင် လားရှိုးမြို့ကို စစ်ကော်မရှင်ထံသို့ ပြန်လည်လွှဲပြောင်း ပေးခဲ့ရသည်။

စစ်ကော်မရှင်သည် လားရှိုးမြို့အား တရုတ်အားကိုးမှုဖြင့် တောင်းယူခဲ့ပြီးနောက် သိန္နီမြို့ကိုပါ ပြန်လည် တောင်းယူရန် ကြိုးပမ်းနေခြင်း ဖြစ်သည်။

စစ်ကော်မရှင်သည် လာမည့် ဒီဇင်ဘာလ ၂၈ ရက်နေ့တွင် ကျင်းပမည့် ရွေးကောက်ပွဲအတွက် ဇူလိုင် ၃၁ ရက်နေ့တွင် သိန္နီမြို့အပါအဝင် မြို့နယ် ၆၃ ခု စစ်အုပ်ချုပ်ရေး ကြေညာထားသည်။

ထို့အပြင် ရွေးကောက်ပွဲမတိုင်မီ တိုင်းရင်းသားတော်လှန်ရေး လက်နက်ကိုင်အဖွဲ့များ (ERO)နှင့် အမျိုးသားညီညွတ်ရေး အစိုးရ (NUG) လက်အောက်ခံ ပြည်သူ့ကာကွယ်ရေးတပ်ဖွဲ့များ ထိန်းချုပ်စိုးမိုးထားသော မြို့နယ်များတွင် မြို့ပေါ်နေရာ အနည်းငယ်ကို သိမ်းပိုက်ရရှိသည်ဖြစ်စေ ရွေးကောက်ပွဲ ကျင်းပနိုင်မည့် မြို့နယ်အရေးအတွက် ကိန်းဂဏန်းတိုးမြှင့်နိုင်သမျှ တိုးမြှင့်နိုင်ရေး ကြိုးပမ်းကြရန် စစ်ကော်မရှင်ဥက္ကဋ္ဌ မင်းအောင်လှိုင်က ညွှန်ကြားထားသည်။