သျှမ်းပြည် တောင်ပိုင်း ရပ်စောက်မြို့ရှိ လျှပ်စစ်ရုံ EPC ဓာတ်အားခွဲရုံ ရှော့ခ်ဖြစ်ပြီး ပေါက်ကွဲမှုဖြစ်ပွားခဲ့ကြောင်း သတင်းရရှိသည်။
ယမန်နေ့ ( သြဂုတ်လ ၂၆ရက်) ည ၈ နာရီခွဲကျော်တွင် ရပ်စောက်မြို့ ဥတ္တာရပ်ကွက်ရှိ EPC ဓာတ်အားခွဲရုံပေါက်ကွဲမှု ဖြစ်ပွားခဲ့ကြောင်း ရပ်စောက်မြို့ဒေသခံအမျိုးသမီးတစ်ဦးက သျှမ်းသံတော်ဆင့်ကို ပြောသည်။
“မိုးကြိုးထိမယ်ထင်တယ် လျှပ်စီးဝင်ပြီး ပေါက်ကွဲမှုဖြစ်တာ။ ဓာတ်အားခွဲရုံကနေ တစ်မြို့လုံးကို ပြာခနဲ ဖြစ်သွားပြီး မီးပျက်သွားတာ။ ကျမ နေရာက တစ်မြို့လုံးကိုလှမ်းမြင်နေရတယ်လေ။ လေယာဉ်ပျံ အသံလိုလိုနဲ့ အသံကျယ်က ကြောက်စရာကြီး။”ဟု ရပ်စောက်မြို့ဒေသခံ အမျိုးသမီးတစ်ဦးက ပြောသည်။
ထို ဓာတ်အားခွဲရုံး ပေါက်ကွဲမှုဖြစ်ပွားပြီးနောက် ယနေ့ အချိန်ထိ မီးပျက်နေဆဲဖြစ်ပြီး၊ မြို့အတွင်း လျှပ်စစ်မီး ပြန်ရနိုင်ရန် တစ်လ ခန့်ကြားနိုင်ကြောင်း ဒေသခံများက ပြောဆိုနေကြသည်။
Leave a Comments