သျှမ်းပြည် နောင်ချိုမြို့နယ် တောင်ခမ်းကျေးရွာအခြေစိုက် အမြောက်စခန်းကွပ်ကဲမှု ဌာနချုပ် (မစခ-၉၀၂)နှင့် အမတ-(၃၅၄) တို့ကို TNLA ၊ DPLA နှင့် PDF ပူးပေါင်းတပ်ဖွဲ့များက အပြီးသတ် တိုက်ခိုက်သိမ်းပိုက်နိုင်ခဲ့ကြောင်း စုံစမ်းသိရသည်။
ယနေ့ (စက်တင်ဘာလ ၁၃ ရက်) တွင် နောင်ချိုမြို့နယ် တောင်ခမ်းရွာရှိ စစ်ကောင်စီတပ် လက်ကျန် အမြောက်စခန်း ကွပ်ကဲမှုဌာနချုပ် (မစခ-၉၀၂) နှင့် အမြောက်တပ် (၃၅၄) တပ်ရင်းတို့ကို တအာင်း(ပလောင်) အမျိုးသားလွတ်မြောက်ရေးတပ်မတော် TNLA ၊ ဓနုပြည်သူ့လွတ်မြောက်ရေးတပ် DPLA နှင့် PDF ပူးပေါင်းတပ်ဖွဲ့တို့က အပြီးသတ် သိမ်းပိုက်နိုင်ခဲ့ကြောင်း ဒေသခံများက ပြောသည်။
“တောင်ခမ်းကို ဒီနေ့အပြီးသတ် သိမ်းနိုင်ခဲ့တယ်၊ အမြောက်တပ် ၄ ခု လုံးကို သိမ်းနိုင်ပြီ။ ဒီလ ၉ ရက်နေ့ကတည်းက သိမ်းတာ နယ်မြေရှင်းလင်းရေး လုပ်တာနဲ့ အခုမှရောက်တယ်”ဟု ရှေ့တန်း စစ်ရေးသတင်းရင်းမြစ်တစ်ဦးက သျှမ်းသံတော်ဆင့်ကို အတည်ပြုသည်။
စစ်ကောင်စီတပ်၏ အမှတ် (၉၀၂) အမြောက်စခန်း ကွပ်ကဲမှုဌာနချုပ်၊ အမြောက်တပ်ရင်း (၃၅၄)၊ (၂၀၆) နှင့် (၄၀၆) တို့ တည်ရှိရာ တောင်ခမ်းဒေသတွင် တိုက်ပွဲများ ပြင်းထန်နေသည်မှာ တစ်လနီးပါး ကြာမြင့်နေပြီဖြစ်သည်။
အမြောက်တပ် အမတ-(၂၀၆) နှင့် (၄၀၆) တို့ကို သိမ်းပိုက်ထားသည်ဟု ဩဂုတ်လ ၂၆ ရက်နေ့တွင် TNLA က ထုတ်ပြန်ထားပြီး အမြောက်စခန်းကွပ်ကဲမှုဌာနချုပ် (မစခ-၉၀၂) နှင့် အမြောက်တပ်ရင်း (၃၅၄) တို့တွင် တိုက်ပွဲဆက်လက် ပြင်းထန်နေခဲ့သည်။
စစ်ကောင်စီဘက်က လေကြောင်းနှင့် တာဝေးပစ် အမြောက်ပစ်ကူများ အသုံးပြု ခုခံခဲ့သော်လည်း လက်ကျန် အမြောက်တပ်နှစ်ခုဖြစ်သည့် (မစခ-၉၀၂) နှင့် (အမတ-၃၅၄) တို့ကို ထပ်မံလက်လွှတ် လိုက်ရခြင်းဖြစ်ကြောင်း စစ်ရေးသတင်းရင်းမြစ်က ပြောသည်။
လက်ရှိတွင် နောင်ချိုမြို့နယ်နှင့် ရပ်စောက်မြို့နယ် အကြားရှိ တောင်ခမ်းကျေးရွာနှင့် ဒုဋ္ဌဝတီတံတား အထိ TNLA ၊ DPLA နှင့် PDF ပူးပေါင်းတပ်ဖွဲ့များက တိုက်ခိုက်ထိန်းချုပ်ထားနိုင်ကြောင်း သိရသည်။
ပြီးခဲ့သည့် စက်တင်ဘာလ (၇) ရက် နံနက်ပိုင်းတွင် သျှမ်းပြည်တောင်ပိုင်း ရပ်စောက်မြို့နယ် ကျောက်ဂူဘက်မှ နောင်ချိုမြို့နယ် တောင်ခမ်း တိုက်ပွဲသို့ စစ်ကူပို့သည့် ယာဉ်တန်းကို တော်လှန်ရေးပူးပေါင်းတပ်က ကျောက်ဂူ-တောင်ခမ်းလမ်းတွင် ကြားဖြတ်တိုက်ခိုက်ခဲ့ရာ စစ်ကားပျက်စီးပြီး တပ်သားအများအပြား သေဆုံးကြောင်း စစ်ရေးသတင်းရင်းမြစ်ထံမှ သိရသည်။
ထို့အတူ ရပ်စောက်မြို့နယ် ကျောက်ဂူကျေးရွာအုပ်စုတွင်လည်း စက်တင်ဘာလ (၇) ရက်မှ စတင်ပြီး စစ်ကောင်စီတပ်နှင့် ဓနုပြည်သူ့လွတ်မြောက်ရေးတပ်တော် DPLA က ထုတ်ပြန်ထားသည်။
Leave a Comments