သျှမ်းပြည်တောင်ပိုင်း၊ တောင်ကြီးမြို့နှင့် ရပ်စောက်မြို့ ဘက်တွင် လိုင်စင်မဲ့ ကားများကို နေအိမ်အထိဝင်ဖမ်းရန် ခရိုင်စီမံအုပ်ချုပ်ရေးအဖွဲ့မှ လျှိုဝှက်ညွှန်ကြားလာကြောင်း စုံစမ်းသိရှိရပါသည်။

အဆိုပါ ညွှန်ကြားချက်ထဲတွင်  PDF အဖွဲ့နှင့် ဒုစရိုက်သမားများ အပါအဝင် ဥပဒေနှင့် မလွတ်ကင်းသည့် လုပ်ငန်း လုပ်ကိုင်သူများသည် လိုင်စင်မဲ့ ကားများကို အသုံးပြု၍ ခရီးသွားလာခြင်း၊ ကူးသန်းရောင်းဝယ်ခြင်း အပါဝင် လက်နက်ခဲယမ်းသယ်ဆောင် ရာတွင် အသုံးပြုနေကြသောကြောင့် ထိုကဲ့သို့ ဝင်ဖမ်းရန် အမိန့်ပေးထားကြောင်း ဖော်ပြထားသည်။

ထိုကဲ့သို့ လိုင်စင်မဲ့ မော်တော်ယာဉ်များ ဖမ်းဆီးရမိရေးအတွက် သျှမ်းပြည်နယ် ရဲတပ်ဖွဲ့မှူးရုံးမှ ဦးဆောင်၍ ဖမ်းဆီးရေးအဖွဲ့ (၁၀) ဖွဲ့ ဖြင့် ဖွဲ့စည်းထားပြီး ရပ်ကွက်/ ကျေးရွာများရှိ လိုင်စင်မဲ့ ယာဉ်သယ်ဆောင်သူ၊ ရောင်းဝယ်သူများ၏ နေအိမ်၊ ယာဉ်ပြုပြင်ရုံများ၊ ရေဆေး ဆီလိုက်ဆိုင်များအား ရှောင်တစ်ခင် ဝင်ရောက်စစ်ဆေးဖမ်းဆီးခွင့်ရှိကြောင်း ခွင့်ပြုမိန့်ထုတ်လာသည်။

ယခုကဲ့သို့ လိုင်စင်မဲ့ ကားများကို ဖမ်းဆီးရန် ညွှန်ကြားချက်တွင် ပြည်သူများအတွက်သာဖြစ်ပြီး NON CDM များမောင်းနှင့်သည့် ကားများကိုမူ စစ်ဆေးမှု မပြုလုပ်ကြောင်း ပြည်သူများထံမှ သိရသည်။

“သျှမ်းပြည်နယ် အစိုးရလက်အောက်ခံ ဌာနအလိုက် NOM CDM တွေ မောင်းတဲ့ ကားကို မစစ်ဆေးဖို့လည်း ညွှန်ကြားထားတယ်ကြားတယ်။ သူတို့က အစိုးရ ဝန်ထမ်းတွေဆိုတော့ လွတ်လပ်သွားလာခွင့်ရတယ် ပြောတယ်။ အဓိကတော့ ပြည်သူတွေပဲ နစ်နာရတော့ပေါ့ဟု မြို့ခံ အမျိုးသားတစ်ဦးက ပြောသည်။

ထို့ကြောင့် လိုင်စင်မဲ့ ကားအရောင်းဝယ်လုပ်နေသည့် ပြည်သူ့များကို အရောင်းဝယ်များခေတ္တ ရပ်နားထားရန်နှင့် Facebook နှင့်Tiktokတွင် ရောင်းဝယ်နေမှုများကိုလည်း ရပ်နားထားရန် လိုအပ်ကြောင်း ၎င်းက အကြံပြု ပြောဆိုထားသည်။

ဆက်လက်ပြီး တောင်ကြီးတွင် လိုင်စင်မဲ့ကားများကို ဖမ်းထားပြီး ပြန်လည်ရွေးထုတ်ခွင့် မရှိဘဲ အပြီးသိမ်းသွားကြောင်းနှင့် ယနေ့ထိ ကားများကို နေရာအနှံ့ ရှောင်တခင် ဖမ်းဆီးနေသည်ဟု တောင်ကြီးမြိုခံ အမျိုးသားတစ်ဦးက ပြောသည်။

“ကားတွေ ဆိုင်ကယ်တွေကို ဖမ်းထားတာ အစီး(၅၀၀) ကျော်ပြီ၊ ဖမ်းထားတာတွေ သူတို့ NON CDM ဝန်ထမ်းတွေကို ပြန်ထုတ်ပေးဖို့ စီစဉ်နေတယ်ကြားတယ်။ အဖမ်းခံရတဲ့ ကားတွေကတော့ ပြန်ရဖို့ မမျှော်နဲ့တော့ သူတို့က ပြန်ကို မပေးတော့တာ။ လူကို ပါ မဖမ်းထားတာ တစ်ခုပဲ။ “ ဟု အဆိုပါ  အမျိုးသားတစ်ဦးက သျှမ်းသံတော်ဆင့်ကို ပြောသည်။

ပြီးခဲ့သည့် မတ်လ (၁၆) ရက်တွင်လည်း ရဲနှင့် စစ်ကောင်စီ တပ်သားများအပါဝင် မော်တော်ယာဉ်ထိန်းရဲများ ပေါင်းပြီး တောင်ကြီးမြို့အတွင်း အရပ်ဝတ်ဖြင့် သွားလာနေပြီး နေအိမ်၊ ရပ်ကွက်အထိ လာရောက် ဖမ်းဆီး စစ်ဆေးမှုများ လုပ်ဆောင်နေကြောင်း သိရသည်။

ထို့အပြင် PNOပြည်သူ့စစ်အဖွဲ့များမှလည်း ၎င်းတို့ ထိန်းချုပ်ဒေသဖြစ်သည့် ပင်လောင်း၊ဆီဆိုင်နှင့် ဟိုပုံးမြို့နယ် ဘက်တွင် လိုင်စင်မဲ့ ကားများ၊ဆိုင်ကယ်များကို မောင်းနှင်ခြင်းမပြုရန် ထုတ်ပြန်ထားပြီး အကယ်၍ မောင်းနှင်ပါက ဖမ်းဆီးခံရသည့်အခါ PNOအဖွဲ့မှ တာဝန်ယူဖြေရှင်းပေးမှာ မဟုတ်ကြောင်း ပြီးခဲ့သည့် မတ်လ (၄) ရက်နေ့တွင် ထုတ်ပြန်ထားသည်။