သျှမ်းပြည်တောင်ပိုင်း၊ ပင်လောင်းမြို့နယ်နှင့် ညောင်ရွှေမြို့နယ်တွင် ယမန်နေ့ (သြဂုတ် ၂၆)ရက် မွန်းလွှဲပိုင်းတွင် လေပြင်းတိုက်ခတ်မှုကြောင့် နေအိမ်နှင့် စာသင်ကျောင်းအများအပြားပျက်စီးခဲ့ပြီး အရေးပေါ်ပြင်ဆင်ရန်အတွက် အကူအညီလိုအပ်နေကြောင်း သတင်းရရှိသည်။​

ပင်လောင်းမြို့နယ် နမ်းတုတ်-လုံးပဲဉ် ကျေးရွာအုပ်စု၊ ဗန်းမောက်ကျေးရွာအတွင်းရှိ အလယ်တန်းကျောင်းသည် ယမန်နေ့ ( ဩဂုတ်လ ၂၆) ရက် မွန်းလွှဲ ၁ နာရီတွင် လေပြင်းတိုက်ခတ်မှုကြောင့် စာသင်ကျောင်း နှစ်ဆောင် နှင့် လူနေအိမ်များ ခေါင်မိုးလန် ပျက်စီးသွားကြောင်း ဒေသခံများ ပြောပြချက်အရသိရသည်။​

“မနေ့က လေတော်တော်ပြင်းတယ်။ ကျောင်းက သုံးဆောင်ရှိတာ နှစ်ဆောင်က ပျက်သွားတယ်။ ကျောင်းဖွင့်ထားတာ မကြာသေးဘူး။ အခုကျောင်းသား ၁၅၀ ကျော်က ကျောင်းမတက်ရတော့ဘူး။ အမြန်ပြင်ဖို့ အကူညီတွေ လိုအပ်နေတယ်။ အိမ်တွေလည်း အမိုးလန်ကုန်တယ်။အရေးကြီးတဲ့ဟာ ဦးစားပေးပြင်ရမှာပေါ့။”ဟု ဒေသခံ အသက် ၃၀ ကျော်အရွယ် အမျိုးသားတစ်ဦးက ပြောသည်။

အဆိုပါ ဗန်းမောက်ကျောင်းကို နိုင်ငံရေးအခြေနေများကြောင့် ပြီးခဲ့သည့် ဩဂုတ်လ ၁၂ ရက်နေ့မှ စတင် ဖွင့်လှစ်နိုင်ခဲ့ပြီး ဆယ်ရက်သာ ကျောင်းတက်ရပြီး ယခုကဲ့သို့ သဘာဝဘေး ထပ်မံကြံုလာသောကြောင့် ကျောင်းပိတ်ထားရသည်ဟု ၎င်းက ဆက်ပြောသည်။

“လောလောဆယ်တော့ မြို့နယ် ပညာရေးဌာနတွေကို အကြောင်းကြားထားတယ်။ လူနေအိမ်တွေက ကိုယ့်ကို ပြင်လို့ရတယ်။ စာသင်ကျောင်းက အရေးကြီးနေတော့ ကျောင်းကို ဦးစားပေးအနေနဲ့ ကူညီဖို့ လိုအပ်နေတယ်။”ဟု အဆိုပါ အမျိုးသားက ဆက်ပြောသည်။

ဗန်းမောက်ရွာသည် သျှမ်း-ကယားနယ်စပ်တွင် တည်ရှိပြီး ပြီးခဲ့သည့် ၂၀၂၄ ခုနှစ် နိုဝင်ဘာလမှစ၍ စစ်ကော်မရှင်တပ်၊ PNO/PNA ပြည်သူ့စစ်တပ်တို့နှင့် ကရင်နီတော်လှန်ရေးတပ်ပေါင်းစု PDF များနှင့် တိုက်ပွဲဖြစ်ပွားခဲ့ပြီး တစ်နှစ်ကျော်နီးပါး စစ်ဘေးရှောင်ခဲ့ရသည်။

အလားတူ ညောင်ရွှေမြို့နယ် အင်းလေး အနောက်ဘက်ကမ်းရှိ ကန်ခေါင်းရွာနှင့် ဟတ်ပုံးရွာတွင် ယမန်နေ့ (ဩဂုတ်လ ၂၆) ရက်လေပြင်းတိုက်ခတ်မှုကြောင့် နေအိမ် ၂၀၀ နီးပါး ပျက်စီးသွားခဲ့ကြောင်း သိရသည်။

အင်းလေးဒေသ ပတ်ပုံးရွာတွင် အိမ်ခြေ ၁၁၃ အိမ်ရှိပြီး လေပြင်းတိုကခတ်ခြင်းကြောင့် တစ်ရွာလုံးနီးပါး နေအိမ်များ ခေါင်မိုးလန်ပျက်စီးခဲ့ကာ ကန်ခေါင်းကျေးရွာတွင်လည်း နေအိမ် ၆၅ အိမ် ပျက်စီးသွားကြောင်း အင်းလေး လူထု လှုပ်ရှားမှု မှတစ်ဆင့် သိရသည်။

“မနေ့က လေအရမ်းပြင်းတော့ အိမ်တွေဆို အမိုးလန်တဲ့ အိမ်က လန်နဲ့။ ဝါးအိမ်ဆိုရင် တစ်ချို့ဆို အမိုးလည်းမရှိတော့ဘူး။ နေလို့မရအောင် ယိုင်ကျသွားတာ။ ခုခေတ် ကုန်ဈေးနူန်းနဲ့ ဝါးအိမ်တစ်လုံး ပြန်ဆောက်မယ်ဆိုရင်တောင် သိန်း၁၀၀လောက်ရှိမှ တော်ကာကျတာ။ လောလောဆယ်တော့ မပျက်သွားတဲ့ အိမ်တွေမှာ လိုက်နေကြတယ်။”ဟု အင်းလေး ဒေသခံ အသက် ၃၀ ကျော်အရွယ် အမျိုးသားတစ်ဦးက ပြောသည်။

အင်းလေး ဒေသတွင် ငလျင်ဘေး၊ ရေဘေး အပြင် လေဘေး စသည့် သဘာဝဘေးအန္တရာယ်များကို ဆက်တိုက်ကြုံတွေ့နေရပြီး နလန်ထူနိုင်ဖို့ ခက်ခဲနေသည်။

ယခုလက်ရှိ အင်းလေးတွင် မိုးအဆက်မပြတ်ရွာသွန်းနေပြီး ရေထပ်မံ တက်လာမည်ကို စိုးရိမ်ကြောင်းနှင့် နေအိမ်များ ပြန်လည်ပြုပြင်ရန် အကူညီများလိုအပ်နေကြောင်း ဒေသခံများက ပြောသည်။

ပြီးခဲ့သည့် ဩဂုတ်လ ၂၅ ရက်နေ့တွင် ဗီယက်နမ်နိုင်ငံနှင့် လာအိုနိုင်ငံ အထက်ပိုင်းတို့ကို ဖြတ်ကျော်ဝင်ရောက်လာသည့် ကာဂျီကီမုန်တိုင်း အရှိန်ကြောင့် မြန်မာနိုင်ငံ သျှမ်းပြည်နယ် အပါဝင် မြန်မာနိုင်ငံအနှံ့အပြားတွင် မိုးသည်းထန်စွာ ရွာသွန်းပြီး လေပြင်းများတိုက်ခတ်ခဲ့သည်။