သျှမ်းပြည်မြောက်ပိုင်း TNLA ထိန်းချုပ်ထားသော နမ့်ခမ်းမြို့နယ်တွင် လျှပ်စစ်မီတာယူနစ်နှုန်းကို အမှန်တကယ် ကုန်ကျသည်ထက် ပိုရေးပြီး ငွေအဆမတန် ကောက်ယူနေသဖြင့် ဒေသခံများ အခက်အခဲ ကြုံတွေ့နေကြောင်း သတင်းရရှိသည်။

ပြီးခဲ့သည့် ဇူလိုင်လ နောက်ဆုံးပတ်တွင် နမ့်ခမ်းမြို့ပေါ် ရပ်ကွက်များရှိ နေအိမ်များကို TNLA လက်အောက်ခံ ဝန်ထမ်းများမှ လျှပ်စစ်မီတာ ယူနစ်များကို အမှန်တကယ် ကုန်ကျသည်ထက် တိုးရေးခဲ့ပြီး ငွေကြေးပိုမိုကောက်ခံနေသဖြင့် ပြည်သူများ အခက်အခဲ ကြုံတွေ့နေရကြောင်း နမ့်ခမ်းမြို့ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

“ကျနော်တို့အိမ်မှာ ပုံမှန် ၁၀၀ ယူနစ်လောက်ပဲ ကျတာ၊ သူတို့တွေက ယူနစ် ၄၀၀ လောက်ကို တမင်တွက်သွားတာ။ ဒီလ အိမ်တိုင်းလိုလို စာရင်းမှားပြီး မှတ်ပေးနေတာ၊ သူတို့ဘက်က ပြန်လည်း မပြင်ပေးဘူး။ ၁ ယူနစ် ၁၀၀ ကျပ် ပေးရမှာကို၊ ၁ ယူနစ် ၃၀၀ ကျပ်လောက် ပေးရတဲ့ လူတွေအတွက် နစ်နာကြတယ်။ ပြည်သူတွေက သွားပြောတယ်၊ သူတို့က ဘာမှ တာဝန်မယူဘူး”ဟု နမ့်ခမ်းမြို့ခံ အမျိုးသားတစ်ဦးက ပြောသည်။

TNLA မှ ကောက်ခံသည့် လျှပ်စစ်မီတာခ နှုန်းထားများသည် လျှပ်စစ်မီတာ ၁ ယူနစ်မှ ၅၀ ယူနစ်လျှင် ၅၀ ကျပ်၊ ၅၁ ယူနစ်မှ ၁၀၀ ယူနစ်လျှင် ၁၀၀ ကျပ်၊ ၁၀၁ ယူနစ်မှ ၂၀၀ ယူနစ်လျှင် ၂၀၀ ကျပ် ကျသင့်သော်လည်း လက်ရှိတွင် လျှပ်စစ်မီတာ ယူနစ်များကို ၂၀၁ ယူနစ် အထက်ဖြစ်အောင် တိုးရေးပြီး ၁ ယူနစ်ကို ၃၀၀ ကျပ် ပေးဆောင်နေရသူ များပြားကြောင်း သိရသည်။

ထို့အပြင် နမ့်ခမ်းမြို့ပေါ်ရှိ မော်တော်ယာဉ် ကားသေး မော်ဒယ်လ် အလိုက် ၂ သိန်း မှ ၃ သိန်းအထိ၊ ကားလတ် ၃ သိန်း မှ ၄ သိန်းအထိ၊ ကားကြီးများကို ၄ သိန်းမှ ၅ သိန်းထိ ကောက်ခံရန် သတ်မှတ်ထားသော်လည်း လက်ရှိတွင် TNLA မှ အဆိုပါ ကားအခွန်များကိုပါ တိုးမြှင့်ကောက်ခံနေကြောင်း နမ့်ခမ်းမြို့ ဒေသခံအမျိုးသားတစ်ဦးက ပြောသည်။

“သူတို့ကလည်း ကားကြီး၊ ကားငယ်၊ ကားလတ် အကုန်ပဲ အရင်တုန်းက ပေးရတဲ့ အခွန်ထက် ၅ သောင်းကနေ ၁ သိန်းလောက်ထိ ပိုပေးရတယ်။ သူတို့ထွက်ထားတဲ့ စာတွေအတိုင်း မလုပ်ဘူး၊ ဈေးတွေလည်း ၁ သိန်း ပိုယူတယ်။ သူတို့ရဲ့ အခွန်ကို မလွတ်ဘူး၊ ပြည်သူတွေအတွက် အခွန်တွေက တော်တော် များတယ်” နမ့်ခမ်းမြို့ ဒေသခံအမျိုးသားတစ်ဦးက သျှမ်းသံတော်ဆင့်ကို ဆက်ပြောသည်။

အလားတူ ပြီးခဲ့သည့် မေလဆန်းပိုင်းတွင်လည်း နမ့်ခမ်းမြို့အတွင်း TNLA တိုးမြှင့်ကောက်ခံခဲ့သော အခွန်နှုန်းထားများမှာ အိမ်သုံး လျှပ်စစ်မီတာ တစ်ယူနစ် ၃၅ ကျပ်မှ ကျပ်ငွေ ၅၀ အဖြစ်လည်းကောင်း၊ ယခင်က ဒေသခံအနေဖြင့် တံတားဖြတ်သန်းခ/လမ်းကြေး ကောက်ခံမှု မရှိခဲ့သော်လည်း ယခုအခါ ကားသေးတစ်စီးလျှင် တစ်ထောင်ကျပ် ပေးဆောင် နေရသည့်အပြင် ယာဉ်မှတ်ပုံတင်ခလည်း ပေး‌ဆောင်နေရကြောင်း သိရသည်။

“၁၀၂၇ စစ်ဆင်ရေး”နောက်ပိုင်း နမ့်ခမ်းမြို့နယ်တွင် TNLA မှ ကုန်သည်များထံ အခွန်ကောက်ခံမှုကြောင့် စားသောက်ကုန်၊ ဆေးဝါးနှင့် အခြားကုန်ပစ္စည်းများ စျေးနှုန်းမြင့်တက်လာသည်ဟု နမ့်ခမ်းမြို့ခံများက ပြောသည်။