သျှမ်းပြည် ကျောက်မဲမြို့ပေါ်သို့ စစ်ကော်မရှင်တပ်မှ လေကြောင်းဖြင့် ပေါင် ၂၅၀ ဗုံးနှစ်လုံး ကြဲချတိုက်ခိုက်ခဲ့ခြင်းကြောင့် ဘုန်းကြီးကျောင်းပေါ် ကျရောက်ပေါက်ကွဲခဲ့ပြီး ကိုရင်(၃) ပါး ထိခိုက်ဒဏ်ရာရရှိကာ နေအိမ် (၂၀) ကျော် ထိခိုက်ပျက်စီးခဲ့ကြောင်း စုံစမ်းသိရသည်။
ယနေ့ (ဩဂုတ်လ ၂၅ ရက်) နံနက်ပိုင်း ၁၁ နာရီကျော်တွင် တအာင်း(ပလောင်) အမျိုးသားလွတ်မြောက်ရေးတပ်မတော် TNLA ထိန်းချုပ်ထားသည့် ကျောက်မဲမြို့ပေါ်သို့ စစ်ကော်မရှင်တပ်မှ လေကြောင်းဖြင့် ပေါင် ၂၅၀ ဗုံးနှစ်လုံး ကြဲချတိုက်ခိုက်ခဲ့ခြင်းကြောင့် ရပ်ကွက်(၇) ရှိ ဝါဆိုဘုန်းကြီးကျောင်းအနီး ကျရောက်ပေါက်ကွဲခဲ့ပြီး ကိုရင်(၃) ပါး ထိခိုက်ဒဏ်ရာရရှိကာ နေအိမ် (၂၀) ကျော် ထိခိုက်ပျက်စီးခဲ့ကြောင်း ဒေသခံများက ပြောသည်။
“ပိန္နဲကုန်းအတက်မှာ အခုက အရှေ့ဘက်အရပ် ကျောင်းဝင်းအတွင်းကျတယ်၊ အဲ့နား နှစ်ခါရှိပြီ။ လူတွေတော့ ရှောင်ကုန်ကြလို့ သိပ်မထိဘူး၊ အိမ်ကတော့ အလုံး ၂၀ ကျော် အမိုးလှန်ကုန်တယ်”ဟု ကျောက်မဲဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
ကျောက်မဲမြို့နယ်တွင် ယနေ့နံနက်ပိုင်း၌ တိုက်ပွဲဖြစ်ပွားခြင်းမရှိဘဲ စစ်ကော်မရှင်တပ်မှ လေကြောင်းဖြင့် ပေါင် ၂၅၀ ဗုံးနှစ်လုံး လာရောက်ကြဲချမှုကြောင့် ဝါဆိုကျောင်းမှ သာမဏေ (၃) ပါးနှင့် အမျိုးသား (၁) ဦး ထိခိုက်ဒဏ်ရာ ရရှိခဲ့ပြီး နေအိမ် (၂၂) အိမ်၊ ကျောင်းဆောင် (၄) ဆောင်၊ ကား (၂) စီး ထိခိုက်ပျက်စီးသွားခဲ့ကြောင်း TNLA သတင်းနှင့် ပြန်ကြားရေးဌာနမှ ထုတ်ပြန်သည်။
အလားတူ ဩဂုတ်လ ၂၃ ရက် ညနေပိုင်းကလည်း ကျောက်မဲမြို့နယ်ရှိ ကွန်စလမ်းကျေးရွာ ဘုန်းကြီးကျောင်းကို ဦးတည်၍ ဂျက်ဖိုက်တာဖြင့် ပေါင် (၂၅၀) ဗုံးနှစ်လုံး ကြဲချတိုက်ခိုက်ခဲ့ခြင်းကြောင့် ကလေးငယ် (၁) ဦး သေဆုံးခဲ့ပြီး သံဃာတော် (၂) ပါး၊ သာမဏေ (၁)ပါး၊ အမျိုးသမီး(၂) ဦးနှင့် အမျိုးသား (၂) ဦး အပါအဝင် ဘုရားခန်း၊ ဆွမ်းစားဆောင်၊ ဇရပ်၊ ကျေးရွာဆေးပေးခန်းနှင့် နေအိမ် (၁၂) အိမ် ဗုံးစထိမှန် ပျက်စီးသွားကြောင်း TNLA ထုတ်ပြန်ချက်အရ သိရသည်။
လက်ရှိတွင် ကျောက်မဲမြို့နယ် နောင်ပိန်ဂုတ်တွင်းလမ်းပိုင်း၌ TNLA ပူးပေါင်းတပ်နှင့် စစ်ကော်မရှင်တပ်တို့ မြေပြင်ထိတွေ့တိုက်ပွဲ ဆက်လက်ပြင်းထန်နေပြီး နောင်ချိုဘက်ရှိ စစ်ကော်မရှင်တပ်မှ လက်နက်ကြီးနှင့် ဒရုန်းအပြင် လေကြောင်းဖြင့်လည်း ဗုံးကြဲတိုက်ခိုက်နေခြင်းကြောင့် နှစ်ဘက်ထိခိုက်ကျဆုံးမှုများကြောင်း သိရသည်။
Leave a Comments