သျှမ်းပြည် ကျောက်မဲမြို့နယ် နောင်ပိန်ကျေးရွာထဲ စစ်ကော်မရှင်တပ်မှ Y-12 လေယာဉ်ဖြင့် ဗုံးအလုံး(၃၀)ကျော် ကြဲချတိုက်ခိုက်ခဲ့ပြီး ဂုတ်တွင်းထဲတွင် TNLA ပူးပေါင်းတပ်ဖွဲ့နှင့် တိုက်ပွဲပြင်းထန်နေကြောင်း စုံစမ်းသိရသည်။

ယနေ့ (ဩဂုတ်လ ၂၁ ရက်) တွင် ကျောက်မဲမြို့နယ် နောင်ပိန်ရွာအနီး တစ်ရက်တည်း Y-12 လေယာဉ်ဖြင့် နေ့လယ်ပိုင်း နှစ်ကြိမ်၊ ဂျက်ဖိုက်တာဖြင့် ည ၆ နာရီခွဲတွင် တစ်ကြိမ် ဆက်တိုက် ဗုံးကြဲခံရပြီး ဂုတ်တွင်းထဲတွင် TNLA ပူးပေါင်းတပ်နှင့် စစ်ကော်မရှင်တပ်တို့ မြေပြင်ထိတွေ့တိုက်ပွဲ ပြင်းထန်နေကြောင်း ဒေသခံများက ပြောသည်။

“မနက်နဲ့ နေ့လယ်တုန်းက Y-12 နဲ့ လာပစ်သွားတယ်။ ဒီညနေကျတော့ ရွာထဲကို ဂျက်ဖိုက်တာနဲ့ လာကြဲသွားတာ အလုံး ၃၀ ကျော်ရှိပြီ၊ နာမ်မိန်းကျောင်းထဲလည်း ဗုံးကြဲခံရတယ်။ အခု ရပ်ကွက် (၆) ဘက်နဲ့ ပင်ပေါဘက် ဂုတ်တွင်းထဲမှာ ပစ်နေကြတုန်း။ တိုက်ပွဲလည်း အရမ်းပြင်းထန်နေတဲ့ကြားက ရွာထဲ အပျက်အစီး များနေပြီ” ဟု နောင်ပိန်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

အလားတူ ပြင်ဦးလွင်မြို့ဘက်မှ သံချပ်ကာကား တင်ဆောင်လာသည့် စစ်ကော်မရှင်တပ် ယာဉ်တန်းလည်း နောင်ချိုမြို့အနီး ရောက်ရှိလာပြီး ဂုတ်တွင်းထဲဖြတ်၍ ကျောက်မဲမြို့ဘက် မြေပြင်ထိုးစစ် ချီတက်နိုင်ရန် ဟောင်ဝစ်ဇာပစ်ကူဖြင့် ဆက်တိုက်ပစ်ခတ်နေကြောင်း ဒေသခံများက ပြောသည်။

လက်ရှိတွင် နောင်ပိန်ဒေသခံများနှင့် နောင်ချိုစစ်ဘေးရှောင်များမှာ ဘေးလွတ်ကင်းရာသို့ ထွက်ပြေးတိမ်းရှောင်နေရပြီး စစ်ဘေးရှောင် (၃၀၀၀) ကျော်အတွက် အရေးပေါ် စားနပ်ရိက္ခာ အကူအညီများ လိုအပ်လျက်ရှိကြောင်း၊ ယမန်နေ့ လေကြောင်းပစ်ခတ်မှုကြောင့် လားရှိုးမြို့တွင် ဆေးကုသနေသည့် စစ်ရှောင်လူနာများအတွက်လည်း ဆေးကုသစရိတ် လိုအပ်နေကြောင်း စစ်ရှောင်ကူညီသူများထံမှ သိရသည်။

ပုံစာ – လားရှိုးဆေးရုံရောက် နောင်ပိန်တိုက်နယ် အလယ်ကျောင်းမှ ဒဏ်ရာရစစ်ရှောင်များ (ဓာတ်ပုံ-ဒေသခံ)