သျှမ်းပြည်မြောက်ပိုင်း၊ မိုင်းရယ်မြို့တွင် LGBT တစ်ဉီး ဓားခုတ်ဒဏ်ရာဖြင့် အသတ်ခံရကြောင်း သတင်းရရှိသည်။

ဖြစ်စဉ်မှာ မိုင်းရယ်မြို့ အမှတ် ၁ ရပ်ကွက်၌ နေထိုင်သည့် အသက် ၂၄ နှစ်အရွယ် အောင်ခေး (ခေါ်) အေးတိုင်း သည် ပြီးခဲ့သည့် ဩဂုတ်လ ၁၇ ရက်နေ့တွင် ဝမ်မော်ကျေးရွာဘက်သို့ ဆိုင်ကယ်တစ်စီးဖြင့် ဟင်းသီး ဟင်းရွက်များ သွားရောက် ပို့ဆောင်စဉ် ဟိုနားလမ်းခွဲတွင် လုယက်ခံရကာ အသတ်ခံထားရကြောင်း ၎င်းနီးစပ်သူတစ်ဉီးက သျှမ်းသံတော်ဆင့်ကို ပြောသည်။

အောင်ခေး၏ ရုပ် အလောင်းကိုဩဂုတ်လ ၁၈ ရက်နေ့မှ တွေ့ရှိကြောင်း သိရသည်။

“သူပျောက်လို့ဆိုပြီး ရှာကြတာ။ ဟိုနားလမ်းခွဲနားက ကြံခင်းထဲမှာ အသတ်ခံထားရတာတွေ့တယ်။ ကျောမှာက ဓားခုတ်ခံထားရတာ၊ လက်မှာက တစ်ချက်၊ ခေါင်းမှာကော အခုတ်ခံထားရတာ။ သူ့မှာပါသွားတဲ့ ဆိုင်ကယ်ရော ဖုန်းရော ပိုက်ဆံရော မတွေ့တော့ဘူး။ သူ့ဟင်းသီး ဟင်းရွက်တွေလည်း ပေပွ ပြန့်ကြဲနေတာပဲ။”ဟု ဖြစ်စဉ် သိရှိသူ အမျိုးသားတစ်ဦးက ပြောသည်။

အောင်ခေးသည် အသက် ၂၀အရွယ်ရှိပြီး ဝမ်မော်ကျေးရွာမှ မိုင်းရယ်မြို့ သို့ ပြောင်းရွှေ့နေထိုင်သူဖြစ်ပြီး၊ ၎င်းမောင်းသွားသည့် ဆိုင်ကယ်၊ ဖုန်းနှင့် ငွေသားကျပ် (၃)သိန်း ပါသွားကြောင်း သိရသည်။

အောင်ခေး သတ်ခံရသည့် နေရာသည် ကြံခင်းအနီး တွင်ဖြစ်ပြီး ၎င်းကြံခင်းတွင် အညာဘက်မှ လာရောက်လုပ်ကိုင်သည့် မိသားစုနေထိုင်သည်။
ထိုအေးတိုင်း သတ်ခံရပြီးနောက်ပိုင်း ၎င်းမိသားစုကိုလည်း မတွေ့ရှိရတော့ပေ။

“အောင်ခေး အသတ်ခံထားရတဲ့ ကြံခင်းနားမှာ အညာကမိသားစု နေတဲ့ တဲလေးရှိတယ်။ အဲဒီမိသားစုက ကြံခင်းရဲ့ အလုပ်သမားတွေ။ မောင်းထုတ်တာလဲ မပြန်ဘူး။ အောင်ခေး အသတ်ခံရပြီး သူတို့လည်း မတွေ့တော့ဘူး။ သူ့သမီးလည်း ကျောင်းမတက်တာ နှစ်ရက်ရှိပြီ။ သူတို့နေတဲ့ တဲနားမှာ ဟင်းရွက်တွေ ပြန့်ကြဲနေတာ။ မြင်တဲ့သူတွေတော့ သူတို့မိသားစု ငါးယောက် ဆိုင်ကယ်တစ်စီးထဲ အတူစီးပြီး သွားတာ မြင်တယ်။” ဟု ဒေသခံအမျိုးသားတစ်ဉီး ကပြောသည်။

အဆိုပါ အသတ်ခံရသည့် ဖြစ်စဉ်ကို မိုင်းရယ် ရဲစခန်းသို့ သွားရောက်အကြောင်းကြားရာတွင် လူကြီးခရီးစဉ်ရှိသောကြောင့် နောက်နေ့မှ လာခဲ့ရန် ပြောသဖြင့် ဒေသခံများက SSPP ကိုသွားရောက်အကြောင်းကြားခဲ့ပြီး SSPP မှ ကူညီဆောင်ရွက်ပေးခဲ့သည်။

မိုင်းရယ်တွင် ခိုးဆိုးလုယက်မှုများ ပေါများလာပြီး ယခုကဲ့သို့ ဖြစ်စဉ်မျိုး မကြာခဏ ဖြစ်နေကြောင်းသိရသည်။