သျှမ်းပြည် ကျောက်မဲမြို့နယ် နောင်ပိန်ကျေးရွာအနီးသို့ စစ်ကော်မရှင်တပ်မှ လေယာဉ်နှစ်စီးဖြင့် စစ်ကော်မရှင်တပ်က ဗုံးကြဲတိုက်ခိုက်ခဲ့ပြင်း TNLA ပူးပေါင်းတပ်နှင့်လည်း ကူမင်းဆွေးနွေးပွဲမတိုင်မီ မြေပြင်ထိတွေ့တိုက်ပွဲ ပြင်းထန်နေကြောင်း စုံစမ်းသိရသည်။

ယနေ့ (ဩဂုတ်လ ၁၉ ရက်) ည ၇ နာရီခန့်တွင် ကျောက်မဲမြို့နယ် နောင်ပိန်လမ်းခွဲအနီးသို့ စစ်ကော်မရှင်တပ်မှ လေယာဉ်နှစ်စီးဖြင့် ဗုံး ၂ လုံး ကြဲချတိုက်ခိုက်ခဲ့ပြီး နောင်ချိုဘက်မှ ဂုတ်တွင်းချောင်းဖြတ်ကူး၍ မြေပြင်စစ်ကြောင်းထိုးလာသည့် စစ်ကောင်စီတပ်သားများနှင့် TNLA ပူးပေါင်းတပ်တို့ ထန်းတပင်ကျေးရွာဘက်တွင် ထိတွေ့တိုက်ပွဲ ဖြစ်ပွားနေကြောင်း ဒေသခံများက ပြောသည်။

“ပင်တိန်လမ်းခွဲနားကို လေယာဉ်နဲ့ဗုံးတစ်လုံး ကြဲချသွားပြီး မြောက်ဘက် ဆက်တက်သွားတယ်။ ခနလေးပဲ လေယာဉ်နောက်တစ်စီး ထပ်လာပြီး သိမ်ကန်နား ဗုံးထပ်တစ်လုံး ကြဲတယ်။ ရပ်ကွက်(၁) ထဲတော့ နေ့လယ်က လက်နက်ကြီးမှန်တဲ့အိမ် (၅) လုံးကျော် ရှိပြီ။ လက်ဖက်ရည်ဆိုင်က အန်တီတစ်ယောက် ဗိုက်ထိတယ်၊ သူ့တူလေးက ပေါင်ကျိုးသွားတယ်”ဟု နောင်ပိန်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

စစ်ကော်မရှင်တပ်မှ ကျောက်မဲမြို့နယ် နောင်ပိန်ကျေးရွာအနီးသို့ လေယာဉ်နှစ်စီးဖြင့် ဗုံးကြဲတိုက်ခိုက်ခြင်းကြောင့် ထိခိုက်ပျက်စီးမှုကို သျှမ်းသံတော်ဆင့်မှ ဆက်လက်စုံစမ်းနေသည်။
စစ်ကောင်မရှင်တပ်သည် ယမန်နေ့ (ဩဂုတ်လ ၁၈ ရက်) ညပိုင်းမှ စတင်ပြီး နောင်ပိန်ရွာနှင့် ၂ မိုင်ခန့်သာ ကွာဝေးသည့် ထန်းတပင်ကျေးရွာဘက်သို့ စစ်အင်အား (၇၀၀) ကျော် မြေပြင်စစ်ကြောင်းထိုးလာပြီးနောက် ယနေ့နံနက်ပိုင်းမှ စတင်ကာ TNLA ပူးပေါင်းတပ်များနှင့် ထိတွေ့တိုက်ပွဲ ပြင်းထန်နေကြောင်း ဒေသခံများထံမှ သိရသည်။

“နောင်ပိန်နဲ့ ထန်းတပင်ကြားမှာ စစ်တပ်နဲ့ ပလောင် ဒီညပိုင်း ပစ်နေကြတယ်။ နက်ဖန် တရုတ်မှာ ဆွေးနွေးပွဲလုပ်မယ်ပြောပြီး အခု မြေပြင်မှာက ထိုးစစ်ဆင်လာတယ်။ စစ်တပ်က ဂုတ်တွင်းတဖက်ကမ်း ကူးလာပြီဆိုတော့ ရက်ပိုင်းနဲ့ ကျောက်မဲမြို့ပေါ်ထိ တက်သွားနိုင်မယ်”ဟု နောင်ပိန်ဒေသခံ ၎င်းအမျိုးသားက ဆက်ပြောသည်။

အလားတူ TNLA ထိန်းချုပ်ထားသည့် ကျောက်မဲမြို့ပေါ်သို့ စစ်ကောင်စီတပ်က ယနေ့ နံနက် ၁၀ နာရီကျော်တွင် အသေခံဒရုန်း တစ်စင်းဖြင့် စတင်တိုက်ခိုက်ခဲ့ပြီး ၎င်းဒရုန်းမှာ မြို့တွင်း၌ ပျက်ကျခဲ့ခြင်းကြောင့် လူထိခိုက်မှု မရှိကြောင်း ကျောက်မဲဒေသခံများထံမှ သိရသည်။

လက်ရှိတွင် ကျောက်မဲမြို့နယ်အတွင်း ပြည်ထောင်စုလမ်းမကြီးဘေးရှိ ကျေးရွာများနှင့် နောင်ပိန်တိုက်နယ် ဒေသခံများ၊ စစ်ဘေးရှောင်များမှာ ပုံဝိုး၊ ဟဲကွီဘက်သို့ ထပ်မံထွက်ပြေး တိမ်းရှောင်နေရကြောင်း သိရပြီး အရေးပေါ် ကူညီထောက်ပံ့မှုများ လိုအပ်နေကြောင်း စစ်ရှောင်ကူညီသူများထံမှ သိရသည်။