မြန်မာ-တရုတ်နယ်စပ်ရှိ နမ့်ခမ်းမြို့နှင့် မန့်ဝိန်းကြီးမြို့ကြားသို့ စစ်ကောင်စီတပ်မှ လေကြောင်းဖြင့် ဗုံး (၄) လုံး ကြဲချတိုက်ခိုက်ခဲ့ခြင်းကြောင့် တရုတ်နိုင်ငံဘက်မှ ပစ်ခတ်သတိပေးမှုများ ရှိခဲ့ကြောင်း စုံစမ်းသိရသည်။

ယနေ့ (ဩဂုတ်လ ၁၅ ရက်) နံနက်အစောပိုင်း ၁၂ နာရီကျော်အချိန်တွင် မြန်မာ-တရုတ်နယ်စပ်ရှိ တအာင်း (ပလောင်)အမျိုးသားလွတ်မြောက်ရေးတပ်မတော် (TNLA) ထိန်းချုပ်သည့် နမ့်ခမ်းမြို့နှင့် ကချင်လွတ်လပ်ရေးတပ်မတော် (KIA) ထိန်းချုပ်သည့် မန့်ဝိန်းကြီးမြို့ကြား တောတွင်းတစ်နေရာသို့ စစ်ကောင်စီတပ်မှ လေကြောင်းဖြင့် ဗုံး (၄) လုံး ကြဲချတိုက်ခိုက်ခဲ့သည်။

သို့သော် TNLA ထိန်းချုပ်ထားသည့် နမ့်ခမ်းမြို့ပြည်သူများသည် ပေါက်ကွဲသည့်အသံကျယ်လောင်စွာကြားရသဖြင့် စိုးရိမ်ထိတ်လန့်ပြီး လေကြောင်းဗုံး ပေါက်ကွဲပြီးနောက် တရုတ်နိုင်ငံဘက်မှ ပစ်ခတ်သတိပေးသံများ ကြားရကြောင်း ဒေသခံများက ပြောသည်။

နမ့်ခမ်းမြို့နှင့် မန့်ဝိန်းကြီးသည် ၁၃မိုင်ခန့်သာကွာဝေးသည်။

“နမ့်ခမ်းနဲ့ အရမ်းနီးလို့ မနေ့ညက ပြည်သူတွေ လန့်နိုးပြီး အထိတ်တလန့် ဖြစ်ကြတာ၊ မြို့ထဲထိ ကြားရတယ်။ မံစီမြို့နယ်ထဲက မန့်ဝိန်းကြီးဘက် ကျတယ်ဆိုပေမယ့် နမ့်ခမ်းနဲ့ အရမ်းနီးတယ်။ နယ်စပ်နဲ့လည်း အရမ်းနီးတော့ တရုတ်ဘက်က မိုးပေါ်ကို မီးစိမ်းနဲ့ထိုးပြီး ကင်းလှည့်နေတာ၊ တရုတ်ဘက် သေနတ်ပစ်ပြီး သတိပေးတဲ့ အသံလည်း ကြားတယ်”ဟု နမ့်ခမ်းဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

တရုတ်-မြန်မာ နယ်စပ်အနီး စစ်ကောင်စီတပ်က ညသန်းခေါင်ယံ လူအိပ်မောကျချိန်တွင် လေကြောင်းဖြင့် ဗုံးကြဲတိုက်ခိုက်ခဲ့သည့် နေရာသည် TNLA ထိန်းချုပ်ထားသည့် နမ့်ခမ်းမြို့နှင့် ကချင်ပြည်နယ် မံစီမြို့နယ်ထဲ ပါဝင်သည့် မန့်ဝိန်းကြီးမြို့အကြားရှိ ကချင်လွတ်လပ်ရေးတပ် KIA ၏ တပ်ရင်း (၂၇) အနီး ကျရောက်ပေါက်ကွဲခဲ့ကြောင်း ဒေသခံများက ပြောဆိုသော်လည်း သျှမ်းသံတော်ဆင့်အနေဖြင့် သီးခြားအတည်ပြုနိုင်ခြင်း မရှိသေးပါ။

“နမ့်ခမ်းနဲ့ သိပ်မဝေးဘူး၊ မံစီမြို့နယ်ထဲ ပါတဲ့ မန့်ဝိန်းကြီးဘက် တောထဲမှာ ကချင်တပ်ရဲ့ တပ်ရင်း ၂၇ ဘက်ကို ကြဲသွားတာ။ ပြည်သူလည်း သွားမကြည့်ရဲဘူး၊ ဟိုတုန်နဲ့ ကောင်းခန်ဘက်မှာ ကြဲခံရတယ်ဆိုတာလည်း အတည်ပြုလို့ မရသေးဘူး၊ မနေ့က ညသန်းခေါင် လေယာဉ်လာလို့ လန့်နေတာ”ဟု နမ့်ခမ်းမြို့နယ် ဒေသခံ အမျိုးသားတစ်ဦးက ထပ်လောင်းပြောသည်။

အလားတူ ယမန်နေ့ (ဩဂုတ်လ ၁၄ ရက်) ည ၈ နာရီခွဲတွင် TNLA ထိန်းချုပ်ထားသည့် မိုးကုတ်မြို့အရှေ့ပိုင်းကို စစ်ကောင်စီတပ်မှ လေကြောင်းဖြင့် ပေါင် (၅၀၀) ဗုံးတစ်လုံး ကြဲချတိုက်ခိုက်ခဲ့ခြင်းကြောင့် ရွှေကူရပ်ကွက်ရှိ လင်းရောင်ခြည်ဘုန်းကြီးကျောင်းပေါ် ကျရောက်ပေါက်ကွဲခဲ့ပြီး ပြည်သူ (၈) ဦး သေဆုံးကာ (၇) ဦး ထိမှန်ဒဏ်ရာ ရရှိခဲ့ကြောင်း TNLA ဘက်မှ ယနေ့နံနက်ပိုင်းတွင် သတင်းထုတ်ပြန်ထားသည်။

ပြီးခဲ့သည့် ဩဂုတ်လ (၉) ရက်နေ့ကလည်း မိုးကုတ်မြို့ အရှေ့ပိုင်းကို စစ်ကောင်စီတပ်မှ ဂျက်ဖိုက်တာဖြင့် ဗုံးကြဲတိုက်ခိုက်ခဲ့ခြင်းကြောင့် ကိုရင်တစ်ပါးနှင့် အရပ်သား (၄) ဦး သေဆုံးခဲ့ပြီး နှစ်ဦး ထိခိုက်ဒဏ်ရာရရှိခဲ့သည်။

စစ်ကောင်စီတပ်သည် TNLA ထိန်းချုပ်ထားသည့် မြို့နယ်များ ပြန်လည်ရရှိရေးနှင့် ရွေးကောက်ပွဲကျင်းပနိုင်ရေးအတွက် လူနေထူထပ်သည့် မြို့တွင်းနှင့်ကျေးရွာများကို ရည်ရွယ်ချက်ရှိရှိ လေကြောင်းတိုက်ခိုက်မှု ပြုလုပ်နေခြင်းကြောင့် (၂)လကျော်အတွင်း စစ်ဘေးရှောင်နှင့် ကလေးငယ် ၁၃ ဦး အပါအဝင် အရပ်သား ၅၆ ဦး သေဆုံးခဲ့ရပြီး ကလေးငယ် ၈ ဦး အပါအဝင် ၁၃၆ ဦး အပြင်းအထန် ထိခိုက်ဒဏ်ရာ ရရှိခဲ့ကြောင်း တအာင်း(ပလောင်) အရပ်ဖက်အဖွဲ့အစည်းများကွန်ယက်မှ ဩဂုတ်လ ၁၃ ရက်တွင် ပူးတွဲကြေညာချက် ထုတ်ပြန်ခဲ့သည်။

အခြားတစ်ဖက်တွင် တရုတ်အစိုးရသည် စစ်ကောင်စီနှင့် ပူးပေါင်းကာ TNLA ထိန်းချုပ်ထားသော ဒေသများကို ပြန်လည်ပေးအပ်ရေးအတွက် နိုင်ငံရေးနှင့် စစ်ရေးဖိအားပေးမှုအပြင် နယ်စပ်ကုန်သွယ်ရေးနှင့် ဆက်သွယ်ရေးဖြတ်တောက်မှု နည်းလမ်းများဖြင့် ဆက်တိုက်ဖိအားပေးနေပြီး စစ်ကောင်စီအား ခေတ်မီ စစ်လက်နက်ပစ္စည်းများ၊ နည်းပညာများ ထောက်ပံ့ပေးနေကြောင်း တအာင်း(ပလောင်) အရပ်ဖက်အဖွဲ့အစည်းများကွန်ယက်၏ ပူးတွဲကြေညာချက်တွင် ရေးသားထားသည်။