ညောင်ရွှေမြို့နယ် အင်းလေးဒေသအတွင်း ယခုရက်ပိုင်း ရေထပ်မံမြင့်တက်လာပြီး ဒေသခံများ ပြောင်းရွှေ့ နေထိုင်ရကြောင်း သတင်းရရှိသည်။
ယမန်နေ့ (သြဂုတ် ၁၃ရက်) ညပိုင်း မိုးသည်းထန်စွာသွန်းမှုကြောင့် ညောင်ရွှေမြို့ပေါ်နှင့် အင်းလေးဒေသအတွင်းရှိ ကျေးရွာများရေကြီးမှု ထပ်မံဖြစ်ပွားခဲ့ပြီး ရေလွှတ်ရာသို့ ပြောင်းရွှေ့နေထိုင်ရကြောင်း ညောင်ရွှေမြို့ဒေသခံ အမျိုးသားတစ်ဉီးက သျှမ်းသံတော်ဆင့်ကိုပြောသည်။
“ရေတွေကမကျသေးဘူး။ တချို့ရပ်ကွက်က လူတွေကတော့ အရင်တခါရေကြီးကတည်းက မြစေတီဘုရားမှာ သွားနေနေကြတာ။ ရပ်ကွက်တွေ ထဲမှာ ရေက ဒူးလောက်ရှိမယ်။ တချို့နေရာလည်း ခြေသလုံးလောက်ရှိမယ်။”ဟု ၎င်းအမျိုးသားကဆိုသည်။
အလားတူ အင်းလေးဒေသတွင်လည်း ယမန်နေ့တွင် မိုးသည်းထန်စွာရွာသွန်းမှုကြောင့် ရေများ ဆက်လက်မြင့်တက်နေကြောင်း၊ နေအိမ်များရေမြှုပ်မှုကြုံတွေ့နေရကြောင်း အင်းလေးဒေသခံအမျိုးသမီးတစ်ဦးက သျှမ်းသံတော်ဆင့်ကိုပြောသည်။
“မနေ့ညကမိုးအရမ်းကြီးတယ်။ည ၉ နာရီလောက်မှာ တချို့လူတွေက ထပ်ပြီး ပြောင်းရွှေ့ကြတယ်။ ရေအရမ်းတက်မှာဆိုးလို့။ အင်လေးထဲမှာ ရေတွေတက်နေတုန်းပဲ။ တချို့အိမ်က အိမ်အောက်ထပ်မှာ ရေတွေဝင်ကုန်တယ်။”ဟု ၎င်းက ပြောသည်။
အင်းလေးကန် ရေကြီးမှုသည် အနီရောင်အဆင့် မှ ခရမ်းရောင်အဆင့်အထိမြင့်မား နိုင်သဖြင့် ဒေသခံများ သတိပြုကာ အန္တရာယ်မှ ရှောင်ရှားရန် ကြိုတင် သတိပေးမှုများရှိနေကြောင်းသိရသည်။
ညောင်ရွှေမြို့ နှင့် အင်းလေးဒေသတို့တွင် ရေကြီးရေလျှံမှုများ ထပ်မံကြုံတွေ့နေရသည့်အတွက် ဒေသခံများသည် နီးစပ်ရာဆွေမျိုးအိမ် ၊ ဘုန်းကြီးကျောင်းတို့တွင် သွားရောက်ခိုလှုံနေကြကြောင်း ဒေသခံများကပြောသည်။
အင်းလေးဒေသသည် ယမန်နှစ်တွင်လည်း ရေကြီးမှုကြုံတွေ့ရသကဲ့သို့ ယခုနှစ် (၂၀၂၅)ခုနစ် မတ် ၂၈ရက်တွင်လည်း ငလျင်ဘေးဒဏ်အကြီးအကဲခံရသည့် ဒေသတစ်ခုဖြစ်သည်။
Leave a Comments