သျှမ်းပြည်တောင်ပိုင်း၊ တောင်ကြီးမြို့တွင် အမှတ်စဉ် (၁) အဖြစ် စစ်ကောင်စီ၏ တပ်သားသစ်စုဆောင်းခြင်းခံရပြီး သေဆုံးသွားကာ ခြောက်လကြာမှ မိသားစုထံ အသိပေးခဲ့ကြောင်း သတင်းရရှိသည်။
ထိုသတင်းပေးမှုကြောင့် ယမန့်နေ့ (သြဂုတ် ၁၂)ရက်တွင် နာရေးပြုလုပ်ပေးခဲ့ကြောင်း သိရသည်။
တောင်ကြီးမြို့၊ လမ်းမတော်ရပ်ကွက်မှ အသက် (၃၁)နှစ်အရွယ် မောင်ချမ်းမြေ့အောင်သည် စစ်ကောင်စီ၏ အမှတ်စဉ်(၁) သင်တန်းကို ပြီးခဲ့သည့် ၂၀၂၄ခုနစ် ဧပြီ ၂၈ရက်တွင် ဟိုပုံးမြို့ စစ်သင်တန်းကျောင်းတွင် တက်ရောက်ခဲ့သည်။
ထို့နောက် လားရှိုးရှေ့တန်းစစ်မြေပြင်သို့ ပို့ခံရပြီး လွန်ခဲ့သည့် (၆)လတွင် ရှေ့တန်းတိုက်ပွဲတစ်နေရာတွင် သေဆုံးခဲ့ကြောင်း ရပ်ကွက်အုပ်ချုပ်ရေးမှူး ဦးအောင်အောင်နှင့် စာရေးမ ဒေါ်အိအိခင်တို့က ပြီးခဲ့သည့် ရက်ပိုင်းတွင် ၎င်း၏ မိသားစုဝင်များထံ အကြောင်းကြားခဲ့ကြောင်း TGI Support Revolution ၏ လူမှုကွန်ရက်တွင် ဖော်ပြခဲ့သည်။
ထို ၂၀၂၄ခုနစ် ဧပြီလနှောင်းပိုင်းတွင် အုပ်ချုပ်ရေးမှူးနှင့် စာရေးမတို့က မောင်ချမ်းမြေ့အောင်ကို ဆေးစစ်မည်ဟုဆိုပြီး ခေါ်ဆောင်သွားရာမှ တပ်သားအသစ်အနေဖြင့် အတင်းအဓမ္မ စုဆောင်းခံခဲ့ရခြင်းဖြစ်ကြောင်း ၎င်းလူမှုကွန်ရက်တွင် ရေးသားထားသည်။
“နောက်ဆုံးအဆက်သွယ်ရခဲ့တုန်းက လားရှိုးနားက စစ်မြေပြင်တစ်ခုမှာ ရောက်နေတာတဲ့။ အမေရေ သားတော့ ပြေးနေရတယ်။ အပေါ်ကနေ ဒရုန်းတွေ ဝဲနေလို့ဆိုပြီး ပြောတာ။ အဲနောက်ပိုင်း အဆက်သွယ်မရတော့ဘူး။”ဟု မိသားစုဝင်နှင့် နီးစပ်သူ တစ်ဦးထံက ပြောသည်။
ထို့အပြင် စစ်မှုထမ်းကြေး ရသည့် ကျပ်သိန်း (၅၀)ကိုလည်း စစ်သားစုဆောင်းခံရသူ မောင်ချမ်းမြေ့အောင် မိသားစုကို ငွေကျပ်(၈)သိန်းသာ လာရောက်ပေးကာ အတင်းလက်မှတ်ထိုးခိုင်းခဲ့ကြောင်း ၎င်းက ဆက်ပြောသည်။
တောင်ကြီးမြို့တွင် စစ်ကောင်စီ၏ စစ်သားသစ်စုဆောင်းခံရသူ အများအပြားရှိပြီး ထိုသူများသည် ရှေ့တန်းသို့ပို့ဆောင်ခဲ့ရကာ သတင်းအစအန မရရှိသေးသူများလည်းရှိကြောင်း တောင်ကြီးမြို့ခံ အမျိုးသားတစ်ဉီးက သျှမ်းသံတော်ဆင့်ကိုပြောသည်။
“တောင်ကြီးမှာ စစ်သားစုဆောင်းခံရပြီး ပြန်ရောက်လာတဲ့ သူဆိုတာ မရှိဘူး။ ရှေ့တန်းမှာ သေဆုံးသွားခဲ့တဲ့ သူတွေများတယ်။ပြီးရင် နောက်ကျပြီးမှ သေတဲ့ အကြောင်း မိသားစုကို အကြောင်းကြားတာ။ ဒီလိုသာ ဆက်လုပ်နေရင် လူသားအရင်းမြစ်လည်း ဆုံးရှုံးသလို လူငယ်တွေ ဘဝလည်း ရှင်ရက်နဲ့ သေနေသလို ဖြစ်နေမှာ။”ဟု အဆိုပါ ဒေသခံ အမျိုးသားက ပြောသည်။
တောင်ကြီးမြို့ အတွင်းရှိ ကျောင်းကြီးစုရပ်ကွက်၊ ရတနာသီရိ ရပ်ကွက်၊ ကံသာရပ်ကွက်၊ စိန်ပန်းရပ်ကွက်၊ ညောင်ဖြူစခန်း ရပ်ကွက်၊ ချမ်းမြသာစည် ရပ်ကွက် စသည့် ရပ်ကွက်များတွင် နည်းမျိုးစုံဖြင့် စစ်မှုထမ်းခေါ်ခံရပြီး လူငယ်များ ရှေ့တန်းတွင် သေဆုံးသူများ ရှိကြောင်း ၎င်းက ဆက်ပြောသည်။
ပြီးခဲ့သည့် ဇူလိုင်လတွင် ညအချိန်၌ ရဲနှင့် စစ်သားများက တောင်ကြီးမြို့ ရပ်ကွက်များတွင် ညအချိန် အလုပ်မှပြန်လာသူ လူငယ်များကို ဖမ်းဆီးကာ လူစားထိုးကာ ရှေ့တန်းပို့နေကြောင်း သိရသည်။
ယခုလက်ရှိတောင်ကြီးမြို့တွင် စစ်ကောင်စီရွေးကောက်ပွဲ ကျင်းပနိုင်ရေးအတွက် စစ်ဆေးမှုများတင်းကြပ်လာနေကြောင်း သိရသည်။
Leave a Comments