သျှမ်းပြည် သီပေါမြို့ထဲသို့ စစ်ကောင်စီတပ်မှ နှစ်လအတွင်း (၉) ကြိမ်မြောက် ထပ်မံဗုံးကြဲ တိုက်ခိုက်ခဲ့ကြောင်း စုံစမ်းသိရသည်။
ယနေ့ (ဩဂုတ်လ ၉ ရက်) ညနေ ၄ နာရီခွဲခန့်တွင် တအာင်း(ပလောင်) အမျိုးသားလွတ်မြောက်ရေးတပ်မတော် TNLA ထိန်းချုပ်ထားသည့် သီပေါမြို့ထဲ မြန်မာရပ်နှင့် ပန်းတိမ်တောင်ရပ်ကွက်သို့ စစ်ကောင်စီတပ်က ဂျက်ဖိုက်တာဖြင့် ထပ်မံဗုံးကြဲ တိုက်ခိုက်ခဲ့ကြောင်း ဒေသခံများက ပြောသည်။
“မြန်မာရပ် ဆောက်လုပ်ရေး ဗိုလ်တဲဝင်း အနီးနားကို ဂျက်လေယာဉ်နဲ့ လာကြဲသွားတယ်။ ပန်းတိမ်တောင်က ရေဟော်ကျောင်းနဲ့ စမ်းမာလာဥယျာဉ်နားလေးမှာပဲ၊ တစ်နေရာတည်း ၄ လုံး ကြဲသွားတာ။ လောလောဆယ် ထိခိုက်တာ မကြားသေးဘူး” ဟု သီပေါဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
သီပေါမြို့ပေါ် နှစ်လအတွင်း (၉) ကြိမ်မြောက် ဂျက်ဖိုက်တာဖြင့် လေကြောင်းဗုံးကြဲခံရခြင်းကြောင့် လူထိခိုက်ဒဏ်ရာရရှိမှုနှင့် နေအိမ်ပျက်စီးဆုံးရှုံးမှုကို သျှမ်းသံတော်ဆင့်မှ ဆက်လက်စုံစမ်းနေသည်။
အလားတူ ဩဂုတ်လ ၃ ရက် နေ့လယ်ပိုင်းတွင်လည်း TNLA ထိန်းချုပ်ထားသည့် သီပေါမြို့အနီးရှိ စစ်ကောင်စီတပ်စခန်းနေရာဟောင်း ခလရ-(၂၃) ထဲသို့ စစ်ကောင်စီတပ်မှ ဂျက်ဖိုက်တာဖြင့် ပေါင် (၅၀၀) ဗုံး ၄ လုံး ကြဲချတိုက်ခိုက်ခဲ့သော်လည်း ပြည်သူထိခိုက်မှု မရှိကြောင်း ဒေသခံများထံမှ သိရသည်။
လက်ရှိတွင် သီပေါမြို့ပေါ် ရပ်ကွက်ရှိ ဒေသခံများမှာ လေကြောင်းအန္တရာယ် စိုးရိမ်မှုကြောင့် ဘေးလွတ်ရာသို့ ထွက်ပြေးတိမ်းရှောင်လျက်ရှိပြီး အနီးဆုံးရှိ နမ့်လန်မြို့သို့လည်းကောင်း၊ သီပေါတံတားကြီး တစ်ဘက်ကမ်းရှိ ကိုးကန့်တပ်ဖွဲ့ MNDAA ထိန်းချုပ်ထားသည့် ဆွတ်လန်း၊ ကုန်းသာ စသည့် ကျေးရွာများဘက်သို့လည်းကောင်း သွားရောက်ခိုလှုံနေရပြီး အကူအညီများ လိုအပ်ကြသည်ဟု ဒေသခံများက ပြောသည်။
Leave a Comments