ချင်းမိုင်ခရိုင်သည် ထိုင်းနိုင်ငံ မြောက်ပိုင်းတွင် မြန်မာရွှေ့ပြောင်းအလုပ်သမား အများဆုံးရှိသော ခရိုင်တစ်ခု ဖြစ်လာကြောင်း Chiang Mai News သတင်းဌာနက ဖော်ပြသည်။

လက်ရှိ ချင်းမိုင်ခရိုင်တွင် တရားဝင် အလုပ်လုပ်ကိုင်ခွင့် လက်မှတ်ရရှိထားသူ ၄၃,၅၇၄ ဦးရှိပြီး ထိုထဲတွင် မြန်မာနိုင်ငံသား ၄၃,၀၁၁ ဦးရှိကြောင်း ယမန်နေ့ သြဂုတ် ၆ ရက်နေ့တွင် ပြုလုပ်ခဲ့သည့် အစည်းအဝေးတွင် ချင်းမိုင်ခရိုင် အလုပ်အကိုင်ရှာဖွေရေးရုံးမှ တာဝန်ရှိသူတစ်ဦးက ပြောကြားခဲ့သည်ဟု Chiang Mai News က ဖော်ပြသည်။

ထို့ပြင် အလုပ်လုပ်ကိုင်ခွင့် လက်မှတ်လျှောက်ထားဆဲဖြစ်သော မြန်မာရွှေ့ပြောင်း အလုပ်သမားများ ၉၃,၃၀၅ ဦးရှိနေပြီး ၎င်းတို့ကို ဇူလိုင် ၈ ရက်နေ့က ထိုင်းအစိုးရအဖွဲ့၏ ဆုံးဖြတ်ချက်အရ ယာယီဆက်လက် နေထိုင်ခွင့်ပြုထားကြောင်း ဆိုသည်။

ထိုသူများအားလုံးသည် တရားဝင် အလုပ်လုပ်ကိုင်ခွင့် လက်မှတ်ရရှိပါက ချင်းမိုင်ခရိုင်တွင် မြန်မာရွှေ့ပြောင်းအလုပ်သမား စုစုပေါင်း ၁၃၆,၃၁၆ ဦးအထိ မြင့်တက်လာမည် ဖြစ်သည်။

အခြားတစ်ဘက်တွင်လည်း ထိုင်းအာဏာပိုင်များသည် တရားမဝင် အလုပ်လုပ်ကိုင်နေသော ရွှေ့ပြောင်းအလုပ်သမားများ၊ လုပ်ထုံးလုပ်နည်းနှင့် မကိုက်ညီသည့် အလုပ်ရှင်များကို စစ်ဆေးအရေးယူမှုများ ဆက်တိုက်ပြုလုပ်လျက် ရှိနေသည်။

ထိုကြောင့် ရွှေ့ပြောင်းအလုပ်သမားများ အနေဖြင့်လည်း သတိထား နေထိုင်ကြရန်၊ အထူးသဖြင့် မိမိနေထိုင်သော တိုက်ခန်း၊ အိမ်ခန်းများတွင် ဆူဆူညံညံ မလုပ်ကြရန်နှင့် လက်ရှိ အလုပ်လုပ်နေသော နေရာတွင် သူဌေး နာမည်မတူပါက သူဌေးနာမည် ပြောင်းထားကြရန် အလုပ်သမားအရေး ဆောင်ရွက်သူတစ်ဦးက တိုက်တွန်းသည်။

“အဓိက ကိုယ်ငှားနေတဲ့ တိုက်ခန်း၊ အိမ်ခန်းတွေမှာ အသံဆူဆူညံညံ မလုပ်ဖို့လိုတယ်၊ မဟုတ်ရင် အိမ်ရှင်က ရဲကို အကြောင်းကြားနိုင်တယ်။ ပြီးတော့ လက်မှတ်ရှိတဲ့ သူတွေလည်း အလုပ်လုပ်တဲ့ နေရာမှာ သူဌေးနာမည်မတူရင် ပြောင်းထားဖို့ လိုပါတယ်။ ပြီးတော့ ကိုယ်နေတဲ့နေရာမှာ ဧည့်စာရင်းတိုင်ဖို့ လိုတယ်” ဟု ရွှေ့ပြောင်းအလုပ်သမားအရေး ကူညီဆောင်ရွက်သူ ၎င်းအမျိုးသားက သျှမ်းသံတော်ဆင့်ကို ပြောသည်။

ထိုင်းနိုင်ငံတွင် ၂၀၂၄ ခုနှစ် နှစ်ကုန်ပိုင်းမှ စတင်ပြီး ကျားဖြန့်တိုက်ဖျက်ရေး စီမံချက်အရ တရားမဝင် နိုင်ငံခြားသားများကို ဖမ်းဆီးစစ်ဆေး အရေးယူမှုများနှင့် ထိုင်းနိုင်ငံရေး အကြပ်အတည်းများကြောင့် ရွှေ့ပြောင်းအလုပ်သမားများ ဖမ်းဆီးခံရမှု များနေကြောင်း ၎င်းက ဆက်ပြောသည်။

လက်ရှိ ထိုင်းနိုင်ငံတဝှမ်း မြန်မာရွှေ့ပြောင်းအလုပ်သမားများအတွက် မည်သူမည်ဝါ ဖြစ်ကြောင်း သက်သေခံ လက်မှတ် (Certificate of Identity – CI ) စာအုပ်ကို စမွတ်ဆာခွန်း၊ စမွတ်ပရာကန်၊ ဆူရတ်ဌာနီနှင့် ချင်းမိုင်ခရိုင်တို့တွင် စခန်း ၄ ခုဖွင့်လှစ်ကာ ဆောင်ရွက်ပေးသွားမည်ဖြစ်ကြောင်း သိရသည်။

သြဂုတ် ၆ ရက်နေ့မှစ၍ CI စာအုပ်သက်တမ်း ခြောက်လအောက် ကျန်နေသူများ၊ သက်တမ်း ကုန်ဆုံးနေသူများကို အသစ်လှဲလှယ်ပေးခြင်း၊ ထိုင်းနိုင်ငံ၏ (TR-38) လုပ်ငန်းစဉ်နှင့်အတူ CI စာအုပ်အသစ်များ ထုတ်ပေးခြင်းတို့ကို လုပ်ဆောင်ပေးမည်ဟု သိရသည်။

ထိုင်းနိုင်ငံတွင် ၂၀၂၄ ခုနှစ် ဇန်နဝါရီလအထိ တရားဝင် မှတ်ပုံတင်ထားသည့် မြန်မာအလုပ်သမား စုစုပေါင်း ၂ သန်း ၃ သိန်း ကျော်ရှိကြောင်း သိရသည်။