သျှမ်း-မန္တလေးနယ်စပ်ရှိ ပြင်ဦးလွင်-နောင်ချို-မိုးကုတ်လမ်းမကြီးတလျှောက်သို့ စစ်ကောင်စီတပ်မှ မြေပြင်ထိုးစစ် လာမှုကြောင့် TNLA၊ PDF ပူးပေါင်းတပ်များနှင့် တိုက်ပွဲပြင်းထန်နေကြောင်း စုံစမ်းသိရသည်။

ဇူလိုင်လလယ်တွင် စစ်ကောင်စီတပ်သည် နောင်ချိုမြို့ကို TNLA လက်ထဲမှ ပြန်လည်ထိန်းချုပ်နိုင်ခဲ့ပြီးနောက် အုမ္မသီးလမ်းခွဲမှတဆင့် နောင်ချို-မိုးကုတ်လမ်းမကြီးတလျှောက် မြေပြင်ထိုးစစ် လာသဖြင့် နောင်ချိုမြို့နယ် ဟိုခိုကျေးရွာ နှင့် ဒိုးပင်ကျေးရွာဘက်တွင် TNLA၊ PDF ပူးပေါင်းတပ်ဖွဲ့များနှင့် တိုက်ပွဲပြင်းထန်နေကြောင်း စစ်ရေးသတင်းရင်းမြစ်က ပြောသည်။

“အခုက အုမ္မသီးလမ်းခွဲကနေ တက်လာတဲ့ စကစတပ်နဲ့ PDF တွေ တိုက်ပွဲဖြစ်နေတာ။ သုံးဆယ်နဲ့ ရွှေကြာအင်းကို စကစဘက်က သိမ်းပြီးတော့ ဟိုခိုလမ်းခွဲဘက် ကျော်လာပြီ။ ပြင်ဦးလွင်ဘက်က တက်လာတဲ့ စစ်ကြောင်းနဲ့လည်း ကျောက်မဲလေးနဲ့ သံဘိုဘက်မှာ တိုက်နေတယ်”ဟု အဆိုပါ စစ်ရေးသတင်းရင်းမြစ်က သျှမ်းသံတော်ဆင့်ကို ပြောသည်။

ပြီးခဲ့သည့် ဇူလိုင်လ နောက်ဆုံးပတ်အတွင်း နောင်ချိုမြို့နယ် အုမ္မသီးလမ်းခွဲဘက်မှ တက်သွားသည့် စစ်ကောင်စီစစ်ကြောင်းသည် နောင်ချို-မိုးကုတ်လမ်းမကြီးပေါ်ရှိ ဆမ္မဆယ်ကျေးရွာနှင့် သုံးဆယ်ကျေးရွာတို့ကို ထပ်မံထိန်းချုပ်နိုင်ခဲ့ပြီး လက်နက်ကြီးပစ်ခတ်မှုအပြင် ဒရုန်းဖြင့် ဗုံးကြဲတိုက်ခိုက်နေကြောင်း ဒေသခံများက ပြောသည်။

အလားတူ ပြင်ဦးလွင်ဘက်မှ မိုးကုတ်လမ်းမကြီးအတိုင်း ချီတက်သွားသည့် စစ်ကောင်စီတပ် စစ်ကြောင်းကို ကျောက်မဲလေးကျေးရွာ၊ သံဘိုကျေးရွာ၊ အင်းမကျေးရွာတို့တွင် TNLA၊ PDF ပူးပေါင်းတပ်ဖွဲ့တို့က ခုခံတိုက်ခိုက်နေရပြီး ပြင်ဦးလွင်-နောင်ချို-မိုးကုတ် လမ်းဆုံဖြစ်သည့် ဟိုခိုကျေးရွာတွင် စစ်ကောင်စီစစ်ကြောင်းများ ပြန်လည်ပူးပေါင်းသွားကြောင်း ၎င်းစစ်ရေးသတင်းရင်းမြစ်က ဆက်ပြောသည်။

ထို့အပြင် စစ်ကောင်စီတပ်သည် ဇူလိုင်လ (၃၁) ရက်တွင် နောင်ချိုမြို့နယ် ဒိုးပင်ကျေးရွာသို့ လေကြောင်းဖြင့် ပစ်ခတ်တိုက်ခိုက်မှုကြောင့် အသက် (၃၂) နှစ်အရွယ် အမျိုးသမီးတစ်ဦး သေဆုံးခဲ့ပြီး ၂ ဦး ထိခိုက်ဒဏ်ရာရရှိကာ နေအိမ် (၈) လုံး ဗုံးစထိမှန် ပျက်စီးခဲ့ကြောင်း TNLA ဘက်မှ ထုတ်ပြန်ထားသည်။

အခြားတစ်ဘက်တွင်လည်း မိုးကုတ်မြို့သို့ ဝင်ရောက်နိုင်သည့် လမ်းကြောင်းများကို TNLA ဘက်မှ ပျက်စီးနေသည့် လမ်းတံတားများကို ပြုပြင်ရန်ဟုဆိုကာ ဇူလိုင်လ (၂၉) ရက်မှ ဩဂုတ်လ (၅) ရက်နေ့အထိ တစ်ပတ်တိတိ ပိတ်ထားသည်။

မိုးကုတ်-ကျောက်မဲလမ်းပိုင်း၊ မိုးကုတ်-မိုးမိတ်လမ်းပိုင်း၊ မိုးကုတ်-စဉ့်ကူးလမ်းပိုင်း၊ မိုးကုတ်-သပိတ်ကျင်းလမ်းပိုင်း၊ ပြင်ဦးလွင်-နောင်ချို-မိုးကုတ်လမ်းပိုင်းနှင့် တကောင်း-တွင်းငယ်-မိုးမိတ်လမ်းပိုင်းတို့ကို TNLA ဘက်မှ ဩဂုတ်လ (၆) ရက်တွင် ပြန်လည်ဖြတ်သန်းခွင့်ပြုမည်ဟု ဆိုသော်လည်း ကုန်တင်ကားများကို နောက်ထပ်ကြေညာချက် မထုတ်ပြန်ခင်အထိ ပိတ်ထားမည်ဟု TNLA ကြေညာချက်ထဲတွင် ရေးသားထားသည်။

ထိုသို့ မိုးကုတ်မြို့ထဲ ဝင်ရောက်နိုင်သည့် လမ်းကြောင်းများကို TNLA ပိတ်ထားစဉ် တစ်ပတ်အတွင်း စစ်ကောင်စီတပ်မှ မိုးကုတ်မြို့ပေါ် လေကြောင်းဖြင့် ၄ ကြိမ်ထက်မနည်း ဗုံးကြဲတိုက်ခိုက်ခဲ့ရာ အမျိုးသမီးနှင့် ကလေး အပါအဝင် အရပ်သား (၁၅) ဦး သေဆုံးခဲ့ပြီး (၄၀) ခန့် ထိခိုက်ဒဏ်ရာ ရရှိခဲ့ကြောင်း ဒေသခံများက ပြောသည်။

ဇူလိုင်လအတွင်းက TNLA နှင့် PDF တပ်ဖွဲ့များ ထိန်းချုပ်ထားသည့် နောင်ချိုမြို့နှင့် သပိတ်ကျင်းမြို့တို့ကို စစ်ကောင်စီတပ် ပြန်လည်ထိန်းချုပ်ခဲ့ပြီးနောက် မိုးကုတ်မြို့ကို ဦးတည်၍ ပြင်ဦးလွင်-နောင်ချို-မိုးကုတ်လမ်းမကြီးအတိုင်း မြေပြင်ထိုးစစ် ဆက်လက်ချီတက်နေကြောင်း ဒေသခံများက ပြောဆိုနေသည်။