သျှမ်း-မန္တလေးနယ်စပ် TNLA ထိန်းချုပ်ထားသည့် မိုးကုတ်မြို့ပေါ်သို့ စစ်ကောင်စီတပ် လေကြောင်းဗုံးကြဲ တိုက်ခိုက်ခဲ့ခြင်းကြောင့် အရပ်သား (၁၂) ဦး သေဆုံးပြီး ၂၀ နီးပါး ထိခိုက်ဒဏ်ရာ ရရှိခဲ့ကြောင်း စုံစမ်းသိရသည်။
ယနေ့ (ဩဂုတ်လ ၂ ရက်) နံနက် ၈ နာရီခွဲတွင် တအာင်း(ပလောင်) အမျိုးသားလွတ်မြောက်ရေးတပ်မတော် TNLA ထိန်းချုပ်ထားသည့် မိုးကုတ်မြို့အနောက်ပိုင်း ဂေါင်းဦးဘာရပ်ကွက်နှင့် အောင်သုခရပ်ကွက်သို့ စစ်ကောင်စီတပ်မှ ပေါင် (၂၅၀) ဗုံးနှစ်လုံး ကြဲချတိုက်ခိုက်ခဲ့ခြင်းကြောင့် အရပ်သား (၁၂) ဦး သေဆုံးခဲ့ကြောင်း ဒေသခံများက ပြောသည်။
အဆိုပါ လေကြောင်းဗုံးကြဲမှုသည် လူစည်ကားသည့် လက်ဖက်ရည်ဆိုင်၊ ကွမ်းယာဆိုင်နှင့် အရက်ဆိုင်အနီး ကျရောက်ပေါက်ကွဲခဲ့ခြင်းကြောင့် သေဆုံးသူ (၁၂) ဦးအထိ မြင့်တက်လာခဲ့ပြီး ထိုထဲတွင် ဆွမ်းခံကြွလာသည့် သံဃာတော် တစ်ပါးနှင့် ကလေးတစ်ဦးလည်း ပါဝင်ကာ ဒဏ်ရာရသူ (၂၀) ခန့်ရှိကြောင်း မိုးကုတ်ဒေသခံ အမျိုးသားတစ်ဦးက ပြောသည်။
“မင်းကြိုက်လက်ဖက်ရည်ဆိုင် နေရာနားကို ကြဲသွားတာ၊ မနက် ၈ ခွဲဆို အဲ့နားမှာ လူတွေလည်း လှုပ်လှုပ်ရှားရှား ရှိတဲ့အချိန်ဆိုတော့ အများကြီး သေကြတယ်။ ဆွမ်းခံကြွလာတဲ့ ဘုန်းကြီးတစ်ပါးတောင် ပါတယ်၊ အားလုံးပေါင်း ၁၀ ယောက်ကျော်လောက် ရှိမယ် သေတာက” ဟု မိုးကုတ်ဒေသခံ ၎င်းအမျိုးသားက သျှမ်းသံတော်ဆင့်ကို ပြောသည်။
အလားတူ ဇူလိုင်လ ၂၉ ရက်တွင် TNLA ထိန်းချုပ်ထားသည့် မိုးကုတ်မြို့ အရှေ့ပိုင်းသို့ စစ်ကောင်စီတပ်မှ မိုးရွာထဲ ဂျက်ဖိုက်တာဖြင့် သုံးကြိမ်ထက်မနည်း ဆက်တိုက်ဗုံးကြဲ တိုက်ခိုက်ခဲ့ခြင်းကြောင့် အမျိုးသမီးတစ်ဦး အပါအဝင် အရပ်သား (၃) ဦး သေဆုံး၍ (၁၈) ဦး ထိခိုက်ဒဏ်ရာရခဲ့ကြောင်း ဒေသခံများထံမှ သိရသည်။
ပြီးခဲ့သည့် ဇူလိုင်လထဲတွင် စစ်ကောင်စီတပ်သည် မိုးကုတ်မြို့ပေါ်သို့ လေကြောင်းဖြင့် (၅) ကြိမ် ဗုံးကြဲတိုက်ခိုက်ခဲ့ခြင်းကြောင့် အမျိုးသမီးတစ်ဦးနှင့် ကလေး (၂) ဦး အပါအဝင် အရပ်သားစုစုပေါင်း (၉) ဦး သေဆုံးခဲ့ပြီး (၅၀) ကျော် ထိခိုက်ဒဏ်ရာရရှိကာ နေအိမ် (၄၀) ခန့် ပျက်စီးခဲ့ကြောင်း TNLA ဘက်မှ ထုတ်ပြန်သည်။
ဇူလိုင်လ (၃၁) ရက်တွင် စစ်ကောင်စီသည် စစ်ကော်မရှင်အဖြစ် ပြောင်းလဲဖွဲ့စည်းခဲ့ပြီးနောက် တိုင်းရင်းသားလက်နက်ကိုင်တပ်ဖွဲ့များနှင့် PDF တပ်များ ထိန်းချုပ်ထားသည့် (၆၃) မြို့နယ်ကို စစ်အုပ်ချုပ်ရေး မာရှယ်လော ကြေညာပြီး လေကြောင်းဖြင့် ဖိအားပေး တိုက်ခိုက်လာနိုင်ချေရှိကြောင်း စစ်ရေးလေ့လာသုံးသပ်သူများက ပြောဆိုသည်။
ထို့ကြောင့် သျှမ်းပြည်မြောက်ပိုင်းတွင် ညီနောင်မဟာမိတ်တပ်များ ထိန်းချုပ်ထားပြီး စစ်ကောင်စီ၏ စစ်အုပ်ချုပ်ရေး မာရှယ်လော ကြေညာခံထားရသည့် (၁၅) မြို့နယ်မှ ပြည်သူလူထုလည်း လေကြောင်းအန္တရာယ် အထူးသတိထား ရှောင်ရှားနိုင်ရန် လိုအပ်သည်။
Leave a Comments