ရွေးကောက်ပွဲကြိုတင်ပြင်ဆင်မှုအဖြစ် စစ်ခေါင်းဆောင် မင်းအောင်လှိုင်သည် စစ်ကောင်စီကို သက်တမ်းမတိုးတော့ဘဲ တပ်မတော်ကာကွယ်ရေးဦးစီးချုပ်ထံ အာဏာလွှဲအပ်ထားသည့် အမိန့်ကို ပယ်ဖျက်ပြီး နိုင်ငံတော်လုံခြုံရေးနှင့် အေးချမ်းသာယာရေးကော်မရှင်ကို ပြောင်းလဲဖွဲ့စည်းလိုက်သည်။

ယနေ့ (ဇူလိုင်လ ၃၁ ရက်) တွင် သက်တမ်းကုန်ဆုံးသည့် အရေးပေါ်ကာလကို စစ်ခေါင်းဆောင် မင်းအောင်လှိုင်က သက်တမ်းမတိုးတော့ဘဲ တပ်မတော်ကာကွယ်ရေးဦးစီးချုပ်ထံ အာဏာလွှဲအပ်ထားသည့် အမိန့်ကို အမျိုးသားကာကွယ်ရေးနှင့် လုံခြုံရေးကောင်စီတွင် ယာယီသမ္မတ ရာထူး ရယူထားသည့် ၎င်းကိုယ်တိုင်က ပယ်ဖျက်ပေးလိုက်သည်။

ယနေ့နံနက်ပိုင်းတွင် နေပြည်တော်၌ ပြုလုပ်ခဲ့သည့် စစ်ကောင်စီအစည်းအဝေးတွင် နိုင်ငံတော်စီမံအုပ်ချုပ်ရေးကောင်စီကို ဖျက်သိမ်းကာ နိုင်ငံတော်လုံခြုံရေးနှင့် အေးချမ်းသာယာရေးကော်မရှင် အဖြစ် ပြောင်းလဲဖွဲ့စည်းလိုက်ပြီး ပြည်ထောင်စုအစိုးရအဖွဲ့ကိုလည်း ပြင်ဆင်ဖွဲ့စည်းခဲ့သည်။

အသစ်ပြင်ဆင်ဖွဲ့စည်းလိုက်သည့် အစိုးရအဖွဲ့တွင် စစ်ခေါင်းဆောင် မင်းအောင်လှိုင်က ယာယီသမ္မတနှင့် တပ်ချုပ်ရာထူးတို့ကို ပူးတွဲဆက်လက်တာဝန်ယူထားပြီး နိုင်ငံတော်ဝန်ကြီးချုပ်အဖြစ် ဗိုလ်ချုပ်ကြီးညိုစောကို ခန့်အပ်လိုက်သည်။

အလားတူ အမျိုးသားကာကွယ်ရေးနှင့် လုံခြုံရေးကောင်စီရုံးအတွက် အမှုဆောင်ချုပ်နှင့် တွဲဖက်အမှုဆောင်ချုပ် ရာထူးသစ်များ ဖန်တီးကာ ဗိုလ်ချုပ်ကြီး အောင်လင်းဒွေးနှင့် ဗိုလ်ချုပ်ကြီး ရဲဝင်းဦးတို့ကို စစ်ခေါင်းဆောင်က အသီးသီး ခန့်အပ်တာဝန်ပေးထားသည်။

ထို့အပြင် စစ်ဘက်မှ အရပ်ဘက်သို့ ပြောင်းရွှေ့လိုက်သည့် ဗိုလ်ချုပ်ကြီးများထဲတွင် ဗိုလ်ချုပ်ကြီး မြထွန်းဦးကို ပြည်ထောင်စုအစိုးရအဖွဲ့၌ ပို့ဆောင်ရေးနှင့် ဆက်သွယ်ရေးဝန်ကြီးအဖြစ် ဆက်လက်တာဝန်ပေးထားသည်။

စစ်ကောင်စီပြုလုပ်မည့် ရွေးကောက်ပွဲအတွက် အမျိုးသားကာကွယ်ရေးနှင့် လုံခြုံရေးကောင်စီ၏ အဆုံးအဖြတ်ဖြင့် ဆောင်ရွက်နိုင်ကြောင်း စစ်ခေါင်းဆောင် မင်းအောင်လှိုင်က မေလအတွင်း ပြောကြားထားပြီး ကာလုံ ဦးတည်ချက် (၄) ချက်ကို ထပ်မံထုတ်ပြန်ခဲ့သည်။

ရွေးကောက်ခံ အရပ်သားအစိုးရထံမှ အာဏာသိမ်းယူထားသည့် စစ်ကောင်စီမှ ဦးစီးကျင်းပမည့် အထွေထွေရွေးကောက်ပွဲကို ၂၀၂၅ ခုနှစ် ဒီဇင်ဘာလကုန် သို့မဟုတ် ၂၀၂၆ ခုနှစ် ဇန်နဝါရီ လဆန်းတွင် ကျင်းပသွားမည်ဖြစ်ကြောင်း စစ်ခေါင်းဆောင် မင်းအောင်လှိုင်က ပြောဆိုထားသည်။