ယခုရက်ပိုင်း မိုးအဆက်မပြတ်ရွာသွန်းမှုကြောင့် သျှမ်းပြည် ကလောမြို့မှာ ရေကြီးမှုဖြစ်ပွားပြီး နေအိမ်ပျက်စီးမှုရှိကြောင်း သတင်းရရှိသည်။
ယနေ့ (ဇူလိုင် ၂၈)ရက် နံနက်ပိုင်းတွင် မိုးသည်းထန်စွာ ရွာသွန်းမှုကြောင့် ကလောမြို့ရှိ ကလောချောင်း ရေကြီးရေလျှံမှုဖြစ်ပြီး ချောင်းဘေးရှိ နေအိမ်များ ရေကြီးမှုဖြစ်ပွားခဲ့ကြောင်း ကလောဒေသခံတစ်ဉီးက သျှမ်းသံတော်ဆင့်ကိုပြောသည်။
“ မနက်ပိုင်းကတော့ ကလောချောင်းရေ တော်တော်တက်၊ နေအိမ်တွေ တော်တော်များများ ရေဝင်တယ်။ မိုးဆက်တိုက်ရွာတာနဲ့ ရေကြီးမှုက ဖြစ်နေတာပဲ။ ရှေ့ဆက်လည်း ရေထပ်ကြီးနိုင်တယ်။ မိုးရွာရင်တော့ သတိထားနေရမယ်” ဟု အသက် ၄၀အရွယ်ရှိ ကလောမြို့ ဒေသခံအမျိုးသားတစ်ဉီးက သျှမ်းသံတော်ဆင့်ကိုပြောသည်။
ထို့ပြင် ကလောမြို့ ရေကြီးမှုဖြစ်လာလျှင် ကလောချောင်းမှ တဆင့် အင်းလေးကန်အတွင်းသို့ ရေများစီးဝင်နိုင်သည့်အတွက် အင်းလေးဒေသလည်း ရေကြီးမှု ကြုံရနိုင်ကြောင်း အင်းလေး ဒေသခံများက ပြောသည်။
“ အခု ၂ ရက်အတွင်းမှာ မိုးကအဆက်မပြတ်ရွာနေတော့ ရေက ၁ ပေလောက်တော့ တက်လာတယ်။ မိုးကလုံးဝ မနားပဲ ရွာနေတာ။ အခုတော့ နေအိမ်တွေရေမြှုပ်တဲ့အထိတော့မဖြစ်သေးဘူး။ ပုံမှန်မိုးရွာလို့ ရေတတ်တာလောက်ပဲရှိသေးတယ်” ဟု အင်းလေးဒေသခံ လူငယ်တစ်ဦးက ပြောသည်။
အလားတူ မိုးသည်းထန်စွာရွာသွန်းခြင်း အဆက်မပြတ်ရွာသွန်းပြီး တောင်ကျရေ ကြောင်အော့င်ပန်းမြို့ ရပ်ကွက်၃ ရှိ နေအိမ်များလည်း ရေကြီးရေလျှံဖြစ်နေကြောင်း သိရသည်။
” အောင်ပန်းက ရေကြီးတာ ခါးထိရောက်တယ်။ အခု ရေလွတ်ရာပြောင်းရွှေ့နေကြပြီ” ဟု အောင်ပန်းမြို့ ဒေသခံ အမျိုးသမီးတစ်ဉီးက ပြောသည်။
လက်ရှိ ကလော ၊ အောင်ပန်း ၊ ညောင်ရွှေ ဘက်မှ စီးဆင်းလာသောရေသည် အင်းလေးကန်ထဲသို့စီးဝင်လာမည်ဖြစ်ပြီး အင်းလေးကန်လည်း ရေကြီးလာနိုင်သောကြောင့် ဒေသခံများက စိုးရိမ်နေသည်။
ထိုအပြင် အင်းလေးကန်၏ ရေထွက်ပေါက်သည် မိုးဗြဲဆည်တစ်ခုထဲရှိသည့်အတွက်ကြောင့် ရေပြန်ကျနိုင်နှုန်းလည်း အချိန်ကြာမြင့်နိုင်သည်ဟု ဒေသခံတစ်ဦးက ဆိုသည်။
“ ကလော ၊ အောင်ပန်းဘက်က ရေတွေကြီးနေတာတွေ့တယ်။ အဲဘက်ကရေအားလုံးက ဒီအင်းလေးကန်မှာလာစုမှာ ။ နောက် ၁ ရက် ၂ ရက်လောက်မိုးဆက်ရွာနေသေးတယ်ဆိုရင်တော့ ရေဆက်တက်လာနိုင်တယ်။ အရင်နှစ်လိုမဖြစ်ဖို့တော့မျှော်လင့်တာပေါ့။ အင်းလေးကန်ရဲ့ရေထွက်ပေါက်က မိုးဗြဲဘက်တစ်ခုပဲရှိတယ်။ အဲကြောင့်ရေတက်ပြီးဆိုရင် ပြန်ကျဖို့ကကြာတယ်။ အခုလောဆယ်တော့သတိထားနေရတာပေါ” ဟု အထက်ပါ ဒေသခံ လူငယ်က ပြောသည်။
ယခင်နှစ် ၂၀၂၄ စက်တင်ဘာလက ရာဂီမုန်းတိုင်ကြောင့် နာရီပိုင်းအတွင်း အင်းလေးဒေသ ရေရုတ်တရက်မြင့်တက်လာပြီး ရေကြီးမှု မကြုံစဖူး နေအိမ်ခေါင်မိုး နစ်မြှုပ်သည့်အထိဖြစ်ပွားခဲ့ကြောင်း သိရသည်။
Leave a Comments