ထိုင်း – ကမ္ဘောဒီးယားနယ်စပ်ရှိ အနည်းဆုံး (၆) နေရာတွင် နှစ်နိုင်ငံစစ်တပ်အကြား လက်နက်ကြီးများ အပြန်အလှန် ပစ်ခတ်မှု ဖြစ်ပွားနေပြီး နယ်စပ်ဂိတ်များကို ပိတ်ထားကြောင်း ထိုင်းသတင်းဌာနများတွင် ဖော်ပြသည်။

ယနေ့ (ဇူလိုင်လ ၂၄ ရက်) နံနက် ၇ နာရီကျော်တွင် နှစ်နိုင်ငံနယ်စပ်အငြင်းပွားမှု ဖြစ်ပွားနေသည့် Ta Muen Thom ဘေးမဲ့တောအရှေ့ဘက် မီတာ ၂၀၀ ခန့်အကွာရှိ ထိုင်းတပ်စခန်းကို ကမ္ဘောဒီးယားဘက် စတင်ပစ်ခတ်ခဲ့ခြင်းကြောင့် တိုက်ပွဲ အပြန်အလှန် ဖြစ်ပွားနေကြောင်း သိရသည်။

ထိုင်းဘက်ခြမ်းရှိ အနည်းဆုံး ၅ နေရာသို့ ကမ္ဘောဒီးယားဘက်မှ BM21 အတွဲလိုက် ဒုံးလက်နက်များ အသုံးပြု၍ နယ်စပ်မှတဆင့် ပစ်ခတ်ခဲ့ရာ ပန့်ဆီဆိုင်နှင့် လူနေအိမ်များအနီး ကျရောက်ပေါက်ကွဲ ခဲ့ခြင်းကြောင့် Sisaket ခရိုင်တွင် ကနဦး ၈ ဦးသေဆုံး၍ ၁၃ ဦး ထိခိုက်ဒဏ်ရာရရှိကြောင်း ထိုင်းတာဝန်ရှိသူများက အတည်ပြုသည်။

အလားတူ နှစ်ဘက်တိုက်ပွဲအတွင်း ထိုင်းစစ်တပ်မှ F-16 တိုက်လေယာဉ် (၆) စင်းအထိ တပ်ဖြန့်ထားပြီး နံနက် ၁၁ နာရီအချိန်တွင် ကမ္ဘောဒီးယား စစ်ရေးပစ်မှတ် ၂ နေရာသို့ တိုက်ခိုက်ခဲ့ကြောင်း ထိုင်းဘုရင့်တပ်မတော် အမှတ်(၂) စစ်ဒေသမှ ထုတ်ပြန်သည်။

ထို့အပြင် ကမ္ဘောဒီးယားနိုင်ငံ ဖနွမ်းပင်အခြေစိုက် ထိုင်းသံရုံးမှလည်း ထိုင်းနိုင်ငံသားများ ကမ္ဘောဒီးယားနိုင်ငံမှ အမြန်ထွက်ခွာရန် သတိပေးထားပြီး ၎င်းတို့၏ သံရုံးဝန်ထမ်းများကို ရုတ်သိမ်းလိုက်ကြောင်း ထိုင်းသတင်းများတွင် ရေးသားသည်။

အခြားတစ်ဘက်တွင် ဘန်ကောက်မြို့၌ တာဝန်ထမ်းဆောင်နေသည့် ကမ္ဘောဒီးယား သံရုံးဝန်ထမ်းအားလုံးကို ပြန်သွားရန် ထိုင်းဘက်မှ ညွှန်ကြားထားပြီး ထိုင်းနှင့် သံတမန်ဆက်ဆံရေးကို အနိမ့်ဆုံးအဆင့် လျော့ချမည်ဖြစ်ကြောင်း ကမ္ဘောဒီးယားဘက်မှ ကြေညာသည်။

လက်ရှိတွင် ထိုင်းနှင့် ကမ္ဘောဒီးယား နှစ်နိုင်ငံ စစ်ရေးပဋိပက္ခမှာ အရှိန်မြင့်တက်လာခြင်းကြောင့် နယ်စပ်ဒေသတွင် နေထိုင်ကြသော ထိုင်းပြည်သူများကို ထိုင်းအစိုးရနှင့် စစ်တပ်တာဝန်ရှိသူများက ဘေးလွတ်ကင်းရာ ရွှေ့ပြောင်းပေးနေပြီး ထိုင်းစစ်သားများ၏ လှုပ်ရှားမှုများကို လူမှုကွန်ယက်ပေါ် မျှဝေခြင်းများ မပြုလုပ်ရန်လည်း သတိပေးထားသည်။

Photo Credit: